Read Mizo_Old_version Isaia 24 Bible Online

Isaia 24 - Mizo_Old_version bible

Isaia 24

¹Ngai teh, LALPA chuan lei hi a tiruakin, a tiram dâwn a, a khaikhup ang a, a awmate chu a tidarh dâwn.

²Tin, vântlâng chunga tih angin puithiam chungah pawh tih a ni ang; bawihpa chunga a awm angin a pu chungah pawh a awm ang; bawihnu chunga a awm angin a pi chungah pawh a awm ang; leitu chunga a awm angin hralhtu chungah pawh a awm ang; pûktîrtu chunga a awm angin pûktu chungah pawh a awm ang; a pung ûma pûktîrtu chunga a awm angin a hnêna a pung petu chungah pawh a awm ang.

³Lei hi tihruah fai kêlh leh tihchhiat fai kêlhin a awm ang; chu thu chu LALPAN a sawi tawh si a.

⁴Lei hi a ṭapin a chuai e, khawvêl hi a chauvin a chuai e, leia mi chungnungte chu an chau ve.

⁵Lei hi a awmnate hnuaiah chuan a bawlhhlawh zo ta; dânte chu an bawhchhiata, thuruat chu an tihdanglama, kumkhaw thuthlung chu an bawhchhiat avângin.

⁶Chuvângin, ânchhe lawhnain lei hi a ei zo va, a awmate chu thiam loh chantîrin an awm ta; chuvângin, leia awmte chu an kâng hlum a, mi tlêm tê chauh an la awm.

⁷Uain thar chu a ṭap e, grêp hrui chu a chau ve, thinlunga hlim zawng zawngte chu an rûm e.

⁸Khuangtête hlimna chu a reh e, lâwm taka awmte thâwm chu a tâwp e, ṭingṭang hlim ri chu a reh e.

⁹Hla sa chungin uain an in lo vang; zû chu a intute tân kha tak a ni ang.

¹⁰Buaina khawpui chu tihchimin a awm ta; tu mah rêng rêng an luh loh nân in tin khârin a awm ta.

¹¹Uain avângin kawtthlêrahte chuan ṭap thâwm a awm a; hlimna zawng zawng tihthimin a awm a, he ram hlimna hi a bo ta.

¹²Khawpuiah chuan ṭiauna hnutchhiahin a awm a, a kulh kawngkhâr chu vuak chhiatin a awm ta.

¹³Lei lailîa mi tin zîngah hetiang hian a la awm dâwn si a, olive thing vuak hnua rah a la awm ṭhîn ang leh, grêp lawh hnua grêp hmaih lawh tûr a la awm ṭhîn ang mai hian.

¹⁴Chûngte chuan an aw an chhuah ang a, an au vang; LALPA ropuina avângin tuifinriat aṭangin ring takin an au ve.

¹⁵Chumi avâng chuan LALPA chu khawchhak lamah chawimawi rawh u, LALPA, Israel-ho Pathian hming ngei chu, tuifinriat kam ruamahte chuan chawimawi rawh u.

¹⁶Kâwlkil tâwpa hla sakte kan hria, “Mi felte hnênah ropuina awm rawh se,” tih hla hi. Nimahsela, kei chuan, “Ka chêr tawlh tawlh a, ka chêr tawlh tawlh a, ka chung a pik e! Vervêk taka titute chuan vervêk takin an ti a; a ni, vervêk taka titute chuan vervêk tak takin an ti,” ka ti a.

¹⁷Aw leia awm, hlauhawmna te, khuarkhurum te, thang te chu i chungah a awm e.

¹⁸Tichuan, heti hi a ni ang a, hlauhawm thâwm aṭanga tlâna chu, khuarkhurumah a tla ang a; khuarkhurum chhûng ata chhuak chhova chu, thangah a âwk ang; chung lama tukverhte chu hawnin a awm si a, leilung nghahchhante chu a nghîng bawk a ni.

¹⁹Lei hi a keh chhe vek a, lei hi tihralin a awm zo va, lei hi nasa takin a nghîng a.

²⁰Lei hi zu rui mi angin a pai thlawk thlawk ang a, bâwkte sâwi angin a sâwi luai luai ang; a bawhchhiatna chu a chungah rit takin a awm ang a; tichuan, a tlu ang a, a tho leh tawh lo vang.

²¹Tin, chumi niah chuan heti hi a ni ang a, LALPA chuan chung lama mi chungnungho pâwl lian tak chu a hrem ang, leia lei lalte nên.

²²Tin, mi tângho khuarkhuruma hruai khâwma an awm angin chûngho chu hruai khâwmin an awm ang a, tân inah khungin an awm ang a, ni rei tak hnuah chuan hremin an awm ang.

²³Chumi hunah chuan thla khi zak takin a awm ang a, ni khi mualpho takin a awm ang; sipaihote LALPA chu Zion tlângah leh, Jerusalem khuaah leh, a upaho hmaah chuan ropui takin lalah a awm dâwn si a.