Read Mizo_Old_version Isaia 26 Bible Online

Isaia 26 - Mizo_Old_version bible

Isaia 26

¹Chumi niah chuan Juda-ho ramah he hla hi an sa ang: “Khawpui nghet tak kan nei a; ani chuan chhandamna chu kulh bangte leh kulhpuite tân a ruat ang.

²Hnam fel, thutak zâwmtu chu a luh theihna tûrin kulh kawngkhârte chu hawng rawh u.

³I chunga rilru nghattu chu, nangmah a rin che avângin thlamuang tak maia awm tûrin i vêng ang.

⁴LALPA chu kumkhuain ring rawh u, LALPA JEHOVA-ah chuan kumkhaw Lungpui a awm si a.

⁵Ani chuan sâng taka awmte chu a titlâwm ta si a, khawpui sâng tak chu; chu chu a dah hniam a, lei thleng rawkin a dah hniam a, vaivut thleng rawkin a titlu a.

⁶Kê chuan a rap bet ang; retheite kê leh pachhiate pên ngei chuan,” tih hi.

⁷Mi fel kawng chu dikna a ni a; nang thinlung dik tak pu chuan mi fel kawng chu i tirual ṭhîn.

⁸A ni, aw LALPA, i rorêlna kawngah chuan kan nghâk reng chia; kan nunna duh zâwng chu i hming lam leh nangmah hriat rengna lam hi a ni.

⁹Ka nunnain zânah ka duh chia; a ni, ka kawchhûnga ka thlarau awm hian zîng takah ka zawng ang che; i rorêlnate chu leia a lo awm apiangin khawvêla awmte chuan felna chu an zir ṭhîn si a.

¹⁰Mi suaksual chu duhsakin awm mah sela, felna a zir chuang hlei lawng e; dikna ramah chuan dik lo takin a ti ang a, LALPA ropuina a hmu chuang lo vang.

¹¹ LALPA, i bân i phar a, an hmu si lo; i mite tâna i ṭhahnemngaihna chu hmu se, an zak ang; a ni, nangmah dotute chu meiin a kâng ral ang.

¹²LALPA, nangin remna min ruatsak ang; nangin kan hna zawng zawng pawh min thawhsak si a.

¹³Aw LALPA, kan Pathian, nangmah chang ni lovin, lal dangte pawhin kan chungah thu an nei tawh ṭhîn a; nimahsela, nangma ṭanpui ngeiin i hming hi kan lam tawh ang.

¹⁴Anni chu an thi ta a, an nung tawh lo vang; an ral ta a, an tho tawh lo vang; chuvângin, nangin anni chu i hremin i tichhia a, an hriat rengna zawng zawng pawh i tiboral ta.

¹⁵He hnam hi i tipung ta a, aw LALPA, he hnam hi i tipung ta; nang chu chawimawiin i awm ta; he ram hi a ramri zawng zawng i tizau ta.

¹⁶ LALPA, an mangan laiin an zawng ruai ṭhîn chia, i hremna chu an chunga a tlâk laiin an ṭawngṭai mawlh mawlh a.

¹⁷Hmeichhe nau pai, hrin hun hnai tawh chu a na ṭhîn a, nau vei nâa a chiau vawng vawng ṭhîn ang hian, aw LALPA, keini pawh i hmaah kan awm ṭhin kha.

¹⁸Nau kan pai a, kan nâ a, thlî ang lek kan hrin kha; leiah hian chhanchhuahna kawng rêng kan tikaw lo va, khawvêla awmho lah an tlu hek lo.

¹⁹I mitthite chu an nung leh ang a; ka mi ruangte chu an tho leh ang. Vaivuta awmte u, harh ula, hlim takin zai rawh u; i daifîm chu thlaite daifîm ang a ni a, lei hian mitthite chu a paih chhuak dâwn si a.

²⁰Hawh u, ka mite u, in pindan chhûngahte lût ula, in kawngte chu inkhâr khum rawh u; lungnih lohna hi a kian hma loh chu, mit khap kâr lek pawh ni se, biru rawh u.

²¹Ngai teh u, LALPA chu an sualna avânga leia awmte hrem tûrin a awmna ata a lo chhuak dâwn a ni; lei pawh hian a thisente chu a tilang ang a, mi an thahte chu a khuh tawh lo vang.