Read Mizo_Old_version Isaia 27 Bible Online

Isaia 27 - Mizo_Old_version bible

Isaia 27

¹Chumi niah chuan LALPA chuan, a khandaih hriam ṭha tak lian pui, rinawm tak chuan leviathan rûlpui chak tak leh leviathan rûlpui chhawknghawlh nghut chu a hrem ang a, tuipuia dragon awm chu a that bawk ang.

²Chumi niah chuan, grêp huan mawi tak chawimawiin hla sa rawh u.

³Kei LALPA hi a vêngtu ka ni; mitkhapkâr tinin tui ka leih ang a, tu mân an khawih loh nân a chhûn a zânin ka vêng ang.

⁴Ka thin a rim tawh lo va. Buar leh hnimhlîngneite lo awm mah se ka thlo vang a, hmun khatah ka hâl ral ang.

⁵Kei min rem duh chuan ka ângchhûngah lo tlu lût se, mi rem rawh se.

⁶Hun lo la thleng tûrah chuan Jakob-ho chuan zung an kai ang a; Israel-ho chu an kuhmûmin an pâr ang; tichuan, lei chung hi rahin a tikhat ang.

⁷Amah vawtute a vuak ang takin amah chu a vaw ve em ni? A nih loh leh, ama thahte thahna ang takin amah chu thahin a awm em ni?

⁸Amah chu i kal botîr laiin a tâwk lekin amah chu i hnial a; khawchhak thli tleh niah chuan a thaw na tak chuan amah chu a lên sawn ta.

⁹Chuvângin, hei hian Jakob-ho khawlohna chu tlen fai a ni ang a, hei hi an sual kal bopuina rah hlîr a ni; Aseri-te leh ni lemte chu tho tawh lo tûr khawpin, maichâm lung zawng zawng chu, tlak lung den phel rem rum ang maia an siam hi.

¹⁰Khua, kulhpui nei chu a khawhar a, awmna, mi hnuchhawn leh kalsan hnu a ni ta si a, thlalêr ang maiin; chutah chuan bâwngno a tla ang a, chutah bawk chuan a bawk ang a, a ṭangte chu a ei ang.

¹¹A zârte chu a vuai hun chuan thliahin a awm ang; hmeichheho an lo kal ang a, an hâl mai ang; hriat theihna rêng rêng nei lo mite an ni si a; chuvângin, an siamtu chuan anni chu a khawngaih lo vang a, anmahni dintu chuan anni chu a duh rêng rêng a duhsak lo vang.

¹²Tin, chumi niah chuan heti hi a ni ang a, LALPA chuan, lui a kuang khata luang dûl dûl aṭangin, Aigupta luitê thlengin a rah a vaw thla ang a; tichuan, aw Israela thlahte u, a mal mala chhiarin in awm ang.

¹³Tin, chumi niah chuan heti hi a ni ang a, tawtawrâwt lian pui an hâm ang a; tichuan, Assuria rama boral lek lekhote leh, Aigupta rama hnawh chhuahho awmte chu an lo kal ang a; Jerusalem khuaa tlâng thianghlimah chuan LALPA chu chibai an bûk ang.