Read Mizo_Old_version Isaia 28 Bible Online

Isaia 28 - Mizo_Old_version bible

Isaia 28

¹Ephraim-ho zu ruih hmangte chapona lallukhum chung leh, an mawina ropui pangpâr chuai mêk, uain chiah hneha awmho ruam ṭha takin a khum chung chu a pik e!

²Ngai teh, Lalpa chuan mi chak thiltithei tak a nei a; ani chuan rial nasa tak tla dur dur, thlipui thil tichhe rem rum ang leh, tuilian nasa tak liam zur zur ang maiin leiah a paih chawrh ang.

³Ephraim-ho zu ruih hmangte chapona lallukhum chu rah behin a awm ang a;

⁴an mawina ropui pangpâr chuai mêk, ruam ṭha takin a khum chu, nipui hmaa theipui hmin hmasa ber, a entuin a hmuha, a kuta a awm veleha a ei zawh mai ṭhin ang chu an ni ang.

⁵Chumi niah chuan sipaihote LALPA chu, a mi la awm chhunte tân ropuina lallukhum leh mawina lukhum te,

⁶rorêl tûra ṭhua tân rorêlna thlarau te, kulh kawngkhâr bula rawn beiho dang kîrtute tân chakna te a ni ang.

⁷Nimahsela, chûngte pawh chu uain avângin an thle an thle a, zu avângin an pai an pai a; puithiamte leh zâwlneite chu zu avângin an thle an thle a, uain lem zawhin an awm a, zu avângin an pai an pai a; inlârna thu-ah an thle an thle ṭhîn a, rorêlna thu-ah an pai an pai ṭhîn.

⁸Hmun fai rêng rêng awm lo khawpin dawhkân zawng zawng chu luak leh thil bawlhhlawhin a khat a ni.

⁹“Hriatna lam chu tu hi nge a zirtîr dâwn tehchai? Thuchah chu tu hi nge a hriattîr dâwn tehchai? Hnute hnêk bâng hlimte leh hnute hnêktîr tawh lohte hi em ni?

¹⁰Thununna thu chunga thununna thu chherchhuana, thununna thu chunga thununna thu chherchhuana; dân chunga dân chherchhuana, dân chunga dân chherchhuana; hetah tlêm tê, sawtah tlêm tê,” tih hlîr a ni si a.

¹¹A ni; nimahsela, hmui danglam pu mi hmangin, ṭawng hrangin hêng mite hnênah hian thu a sawi tawh zâwk ang:

¹²“Hei hi a ni, chawlhna chu ni, hahte chu chawlhtîr rawh u! Hei hi a ni, intihharhna chu ni,” a tihate chu; nimahsela, an ngaithla duh si lo.

¹³Chuvângin, an kala, zangthala an tlûka, an keh sawma, thanga an awha, mana an awm theihna tûrin, LALPA thu chu anniho tân chuan, “Thununna thu chunga thununna thu chherchhuana, thununna thu chunga thununna thu chherchhuana; dân chunga dân chherchhuana, dân chunga dân chherchhuana; hetah tlêm tê, sawtah tlêm tê,” tih hlîr a ni mai ang.

¹⁴Chumi avâng chuan, mi hmuhsit hmang mite u, he mite, Jerusalem khuaa awmho rorêlsaktute u, LALPA thu hi hre rawh u:

¹⁵“Thihna lakah thu kan thlung ta, Seol nên thu kan intiam ta; vuakna tuilian liam chu a luan tlang hunah pawh keini thleng chuan a luang lo vang; dâwt thute kan inhumhim nân kan hmang a, dâwt hnuaiah kan biru ta si a,” in tih avângin;

¹⁶chu vâng chuan Lalpa PATHIAN chuan heti hian a sawi: “Ngai teh, lung, lung fiah hnu, a kila lung hlu tak phûm nghet tak chu, Zion-ah chuan lungphûm atân ka rem hi; a ringtu chu a hmanhmawh lo vang.

¹⁷Rorêlna fel chu a tihngîlna hruiah ka hmang ang a, felna chu dâr mûm khaiah ka hmang ang; rial chuan inhumhimna dâwt thute chu a chhu bo vek ang a, tuite chuan bihrûkna chu a chîm pil ang.

¹⁸Tin, thihna laka in thu thlun chu phelhin a awm ang a, Seol nêna in thu intiam pawh chu a ding chhuak lo vang; vuakna tuilian liam chu a luan tlang hunah, chumi hunah chuan a rah behin in awm ang.

¹⁹A luan tlang apiangin a la zêl ang che u; a tûk a tûk tin, a chhûn a zânin a luang tlang dâwn si a; thuchah awmze hriat chu thil râpthlâk hlîr a ni ang,” tiin.

²⁰Khum chu thluan nân a tawi lutuk si a, puanthuah chu inkhuh nân a tê lutuk bawk si.

²¹A hna, a hna danglam chu, a thawh theih nân leh, a thiltih, a thiltih danglam chu, a hlen theih nân, LALPA chu Perazim tlânga a tho ang khân a tho dâwn si a, Gibeon ruama a thinur ang khân a thinur dâwn a ni.

²²Chutichuan, mi hmuhsit hmangtute ni tawh suh u; chuti lo chuan, in kawl bunte chu rinawm takin an siam dah ang e; tâwpna, tâwpna thleng ngei tûra ruat tlat chu, lei pum pui chunga a thlen tûr thu Lalpa, sipaihote LALPA hnên aṭang chuan ka hre si a.

²³Beng chhi ula, ka aw hi hre rawh u; ngaithla ula, ka thusawi hi hre rawh u.

²⁴Leilettu chuan chi theh nân lei a let reng ngai em ni? A lei tlangte chu a tikehin a tisawm reng ngai em ni?

²⁵A chung chu a chawh rual zawhin mohuri te chu a theh darh lo vem ni? Zîra te pawh a theh lo vem ni? Buh te pawh a tlarin, barli te pawh a hmun ruatah, vai buhtun te pawh a vau hrûlah a tuh ṭhîn lo vem ni?

²⁶A Pathian chuan ani chu fel takin a thununin a zîrtîr ṭhîn si a.

²⁷Mohuri chu buh chîlna khâwl hriamin an chîl ngai si lo va, zîra chungah chuan tawlailîr ke chu an lirhtîr ngai hek lo; mohuri chu tiangin an vua a, zîra chu talhtumin an vaw zâwk ṭhîn a ni.

²⁸Chhang siamna buh chu râwt sawmin a awm ṭhîn a, kumkhuain a vaw reng dâwn si lo; a tawlailîr ke leh a sakawrte chuan tidarh mah sela, a râwt sawmtîr ngai lo.

²⁹Chûng pawh chu sipaihote LALPA, inrâwnna kawnga mi mak tak leh, finna kawnga mi ṭha tak lakah chuan a chhuak a ni.