Read Mizo_Old_version Isaia 3 Bible Online

Isaia 3 - Mizo_Old_version bible

Isaia 3

¹Ngai teh u, Lalpa, sipaihote LALPA chuan, Jerusalem hnên ata leh Juda-ho hnên ata chu an rin pui leh an rin ber, an rin pui chaw zawng zawng leh an rin ber tui zawng zawng chu an lâksak mêk a nih hi;

²mi chak leh indo thiamte nên, rorêltu leh, zâwlnei leh, aienthiam leh upate nên;

³sawmnga hotu leh, mi zahawm leh, remruattu leh, themthiam leh aikaihthiamte nên.

⁴Tichuan, an mi liantea awm tûrin naupangte ka pe ang a, nausênten an chungah ro an rêl ang.

⁵Tichuan, mite chu hnehchhiahin an awm ang, mi tin inhnehchhiahin an awm ang a, mi tin mahni ṭhenawmte nên inhnehchhiahin an awm ang; naupang chu upa chungah chapo takin an awm ang a, mi chhe tê pawh mi zahawm chungah chapo takin an awm bawk ang.

⁶Miin a unau a pa inah chelhin, “Nang chuan silhfên i nei a, kan rorêltuah awm la, he chhiatna hi i kutah awm rawh se,” a tih hunah,

⁷chumi hunah chuan ani chuan a aw a chhuah ang a, “Kei zawng siamṭhatuah ka awm dâwn lo ve, ka inah ei tûr a awm si lo va, silhfên a awm hek lo; mite rorêltuah mi siam lo vang,” tiin.

⁸A ropuina hmusita an ṭawng leh thiltihte chu LALPA do zâwng a nih avângin Jerusalem chu a chhe zo va. Juda-ho chu an tlu zo ta a ni.

⁹An hmêl lan dânin anmahni a hêk chawp a, an sualna chu Sodom ang maiin an lantîr a; an zêp lo. An nunna chung chu a pik e! Thil ṭha lovin an inthungrûl chawp si a.

¹⁰Mi fel thu-ah chuan, “An la ṭha dâwn,” ti rawh u, an thiltih rahte chu an ei dawn si a.

¹¹Mi sual chung chu a pik e! An la chhe dâwn a ni, an kuta thiltih thungrulhna chu an hnênah pêk a la ni dâwn si a.

¹²Ka mite zawng anmahni hnehchhiahtute hi naupangte an ni a, hmeichhiaten an chungah ro an rêl ta. Aw ka mite u, in hruaitute chuan an hruai sual che u a, in kalna kawngte chu an tichhe ṭhîn.

¹³ LALPA chu sawipui tûrin a lo ding chhuak a, mite ro rêl tûrin a lo ding ta a.

¹⁴LALPA chuan a mite upaho chungah leh an mi lianho chungah ro a rêl ang; Lalpa, sipaihote LALPA chuan, “Nangmahniho hi in ni, grêp huan ei zotute chu; mi retheite laka sum lâk chu in inahte a ni a awm ni.

¹⁵Engtizia nge ka mite chu in nem sâwra, retheite hmai chu in râwt sawm ni?” a ti a.

¹⁶Chu lo pawh chu LALPA chuan, “Zion fanute chu chapo taka an awma, dâk âwr âwr leh mi melh hraw hrawa an kala, an kal chu ti awh awha an kala, an kete an pên rîk chhawng chhawng avângin,

¹⁷Lalpa chuan Zion fanute chhîpah chuan pân khir a awmtîr ang a, LALPA chuan an zahmawhte pawh a tilang ang,” a ti a.

¹⁸Chumi niah chuan Lalpan an incheimawinate chu a lâksak ang, kebun te, lên lukhum te, nghâwngkawl te chu;

¹⁹bengbeh uai diah diah te, bânbun te, inkhuhna puan te chu;

²⁰lu cherna te, kebun khaidiat te, kâwnghrên te, rimtui bâwm te, invênna te chu;

²¹hming nemna zungbun te, hnâr vuah te chu;

²²kût ni thuamhnaw te, kawrfual te, puan sîn te, iptê te chu;

²³dârthlalang te, puan zai sîn te, diar te, intuam mawina puan te chu.

²⁴Tin, heti hi a ni ang a, mawsawla rimtui tak aiah thil ṭawih a awm ang a; kâwnghrên aiah hruizên a awm ang a; sam hniar siau aiah lu kawlhna a awm ang a; puan mawi tak aiah saiip puan ven a awm ang a; hmêlṭhat aiah thîr linga deh chhiatna a awm ang.

²⁵I mite chu khandaiha tihtlûkin an awm ang a, i mi chak takte chu indonaah an tlu ang.

²⁶A kulh kawngkhârte chu an âwm inchûmin an ṭap ang a; ani chu a ruak ang a, leiah a ṭhu ang.