Read Mizo_Old_version Isaia 31 Bible Online

Isaia 31 - Mizo_Old_version bible

Isaia 31

¹Aigupta rama ṭanpuina zawng tûra zuk kala, sakawrte chunga rinna nghata, a tam avânga tawlailîrte leh an chak êm avânga sakawr chung chuang mite ringa, Israel-ho Mi Thianghlima lam en si lova, LALPA pawh râwn si lote chu an chung a pik e!

²Râwn lo mah sela ani pawh fing tak asin, thil ṭha lo a rawn thlentîr ang a, a thute chu a lamlêt lo vang; thil ṭha lo titute chhûngkua bei tûrin a tho zâwk ang a, thil tisualtute ṭanpuina do tûrin a tho bawk ang.

³Aigupta mite chu Pathian an ni lo va, mihring mai an ni a; an sakawrte chu thlarau a ni lo va, tisa mai a ni. LALPAN a kut a phar hunah chuan a ṭanpuitu chu a pai thlawk thlawk ang a, a ṭanpuia pawh chu a tlu ang a, an za chuan an boral tlâng ang.

⁴LALPA chuan heti hian ka hnênah a sawi si a: “Sakeibaknei leh sakeibaknei vânglaiin a sa a hauh lai chuan, berâm vêngtu tam tak a bei tûrin koh chhuahin awm mah sela, an aw chu a hlau dâwn lo va, an bengchhen avângin a tîm chuang dâwn hek lo ang hian, sipaihote LALPA chu Zion tlângah leh a mual pâwngah bei tûrin a lo chhuk dâwn a ni.

⁵Savate an bu chunga an thlâwk an thlâwk ang hian sipaihote LALPA chuan Jerusalem khua chu a vêng ang; a vêngin a chhanchhuak ang a, a kal hlênin a humhim ang.

⁶“Aw Israela thlahte u, nasa taka in helsan tâka lam chu hawi leh tawh rawh u.

⁷Chumi niah chuan mi tinin mahni tangkaraw milem leh mahni rangkachak milem - sualna atâna nangmahni kuta in insiam chawpte chu an la paih bo dâwn si a.

⁸“Chumi hunah chuan Assuria chu mihring khandaiha tihthlûk ni lovin, khandaih tihthlûkin a awm ang a, khandaih, mihringte ta ni lovin amah chu a ei zo vang. Tin, khandaih lak ata a tlânchhia ang a, a tlangvâlte chu salah an man ang.

⁹Tin, a lungpui chu thil râpthlâk avângin a boral ang a, a mi liante chu chhinchhiahna avângin an mangang ang,” tiin, LALPA, a mei Zion-a awma leh, a rawh tuina mei Jerusalem-a awma chuan a ti.