Read Mizo_Old_version Isaia 32 Bible Online

Isaia 32 - Mizo_Old_version bible

Isaia 32

¹Ngai teh, fel taka rorêl tûr lal a lo awm ang a, dik taka ti ṭhîn hotute an lo chhuak bawk ang.

²Thlipui laka bîkna hmun ang leh thli hrâng laka inhumhimna ang a ni ang; thlalêra lui luang ang leh ram rova lungpui lian tak hlim ang mai chu.

³An mit chuan chiang takin a hmu ang a, an beng pawhin fiah takin a hre tawh ang.

⁴Rilrua hmanhmawh chuan hriat thiam a zir ang a, dangâwkte pawh nâl takin an ṭawng thei ang.

⁵Mi sual chuan tu ma zah a kai lo vang a, mi duhâm chuan ngaihsân a hlawh hek lo vang.

⁶Mi sual chuan thu â a chhâk chhuak a, suahsual dân tûr a suangtuah a, a thiltih leh a kam chhuakte chu LALPA elsênzâwng hlîr a ni; rilṭâmte ei tûr a lâksak a, tuihâlte in tûr a tihbuaksak ṭhîn.

⁷Mi duhâm chu khawlo tak a ni; retheite chu dâwta tichhe tûrin thil sual a phiar chhuak a, pachhiate chu an diknaah pawh a dang tlat ṭhîn.

⁸Mi ṭha erawh chuan dik takin thil a ti a, thu dik a ṭan tlat ṭhîn.

⁹Hmeichhe nuam tâwlte u, tho ula, ka thu hi ngaithla teh u; fanu ngaihsamte u, ka thusawiah hian beng chhi rawh u.

¹⁰Hmeichhe ngaihsamte u, kum khat leh ni eng zât emaw chinah chuan in mangang tawh ang; grêp lawh tûr lah a awm dâwn si lo va, grêp lawh khâwm tûrah chuan eng mah a haw dâwn hek lo.

¹¹Hmeichhe awm mai maite u, khûr rawh u; mi ngaihsamte u, mangang takin awm rawh u; inhlîp ula, saruakah insiam ula, in kâwngahte chuan saiip puan veng rawh u.

¹²Lo duhawmte avâng leh grêp hrui rah duh mi avâng chuan an âwm an chûm an chûm ang.

¹³Ka mite ramah hian hnimhlîngneite leh buarte chu a tla ang, a ni, khawpui hlim taka hlimna in zawng zawng chungahte chuan.

¹⁴Lal in chu kalsanin a awm dâwn si a, mi tamna khawpui chu chhuahsanin a awm ang; a mual pâwng leh a râlvên bûk chu kumkhaw pûkah te, ramsabengtung lâwmna te, ran rual tlatna hmun te a ni a;

¹⁵chung lam aṭangin a thlarau a rawn pe leh ang a, thlalêr chu lei ṭha tak hmunah a chang ang a, lei ṭha tak hmun chu ramngawa ngaiha a awm hun chuan.

¹⁶Rorêl felna chu thlalêrah chuan a chêng ang a, felna chu lei ṭha tak hmunah chuan a awm ang.

¹⁷Tin, felna hnathawh chu remna a ni ang a, felnaa thil chhuak chu kumkhuaa muang taka awmna leh ring tlata awmna a ni a.

¹⁸Tichuan, ka mite chu râlmuanga awmnaah leh, in nghet takahte leh chawlhna hmun muanawm takahte chuan an awm tawh ang.

¹⁹Nimahsela, ramngaw chu tithlu tûrin rial a tla dur dur ang a; khawpui chu tihtlâwm dêrin a awm ang.

²⁰Tui luanna zawng zawng kama chi theh ṭhîna, bâwngpa leh sabengtung thlah ṭhîntute u, in eng a thâwl e.