Read Mizo_Old_version Isaia 33 Bible Online

Isaia 33 - Mizo_Old_version bible

Isaia 33

¹Nang rawk tâwk ngai si lova rawktu, vervêk taka tih tâwk ngai si lova vervêk taka titu, i chung a pik e! Mi rawk i bân hunah rawk i la tâwk ve ang a; vervêk taka i tih zawh hunah i chungah vervêk takin an ti ang.

²Aw LALPA, min khawngaih ang che; kan nghah reng che hi. Tûk tin kan bân lo ni la, mangan hunah chuan min chhandamtu lo ni bawk ang che.

³Sa mur mur thâwmah chuan mi tin an tlân bo ta a; nang i thawh meuh chuan hnam tin tihdarhin an awm ta.

⁴In sum râllâka lâk tûr chu pangangin thil a thiar khâwm sup sup ang hian thiar khâwmin a awm ang a; khaukhuapte an zuang sup sup ang hian anniho chu sum chungah an zuang sup sup ang.

⁵LALPA chu châwisanin a awm ta, chung lamah khian a awm si a: ani chuan Zion chu rorêl felna leh felnain a tikhat ta.

⁶I dam chhûng chuan awm nghehna a awm ang a, chhandamna te, finna te, hriatnate a awm ṭeuh vang; LALPA ṭihna chu a ro a ni.

⁷En teh, an pasalṭhate chu pâwn lamah an au va, remna palaite chu an ṭap zawih zawih a.

⁸Lamliante chu a ṭhing ṭhiap ṭhuap a, mi zin veivâk an awm ta lo. Ani chuan thuthlung chu a bawhchhia a, khuate chu a hmusit a, mihring a ngaihsak ta lo.

⁹Ram chu a ṭapin a chau va, Lebanon chu a zakin a vuai a; Saron chu thlalêr ang a ni ta, Basan leh Karmel chuan an hnahte an thing thla a.

¹⁰LALPA chuan, “Tûnah chuan ka tho vang a, tûnah chuan chawisânin ka awm tawh ang.

¹¹Hnim ro in pai ang a, buhpâwl in hring ang; in thaw chu nangmahni kâng ral tûr mei a ni.

¹²Mi tinrêngte chu chinai lung rawh ang, hnimhlîngnei sâm hnu meia an paih ang chu an ni ang,” a ti a.

¹³Hla taka awmte u, ka thiltih hi bengin lo hre rawh u, hnai tea awmte u, ka thiltihtheihzia hi hre rawh u.

¹⁴Zion-a mi sual awmte chuan an hlau va; Pathian zah lo mite chu khurhnain a man ta a. “Kan ral hmang mei, kumkhuaa alh chu, kan zîngah tu nge tuar thei awm ang?” an ti a.

¹⁵Fel taka awma dik taka sawi ṭhîntu, hnehchhiahnate hlâwkpuina rêng rêng lungtena, tham la duh lova kut thinsana, thisen chhuah thu ngaithla duh lova beng hupa, sualna rêng rêng en duh lova maimitchhîng ṭhîna chu:

¹⁶chu mi chu chung lamah a awm ang a; a kulhbîng sâng chu lungpui kulhbîngte chu a ni ang a; a chaw chu a hnênah pêk a ni ang a, a tuite chu a awm ngei ngei ang.

¹⁷I mite chuan lal chu a mawinaah chuan an la hmu ang a, ram parh zau tak an la thlîr ang.

¹⁸“A chhiartu kha khawiah nge a awm tâk? Chhiah chawi bûktu kha khawiah nge a awm tâk? Ralvên in sângte chhiartu kha khawiah nge a awm tâk?” tiin i thinlungin thil râpthlâk tak kha i ngaihtuah ang.

¹⁹Mi kawlh tak, ṭawng ril tak i hriat theih lohva ṭawng mite, ṭawng hrang i hriat thiam lohva ṭawngte chu i hmu tawh lo vang.

²⁰Kan kûtna khawpui Zion chu en teh; i mitte chuan Jerusalem chu awmna muanawm tak, puan in eng tik maha sawn lo tûr, a kaih marna khen eng tik maha phawi lo tûr, a kaihna hrui rêng rêng chat lo tûr ang chu a hmu ang.

²¹Chutah chuan LALPA, lui zau tak tak leh lui tête awm thliah thluahna hmun chu, ropui takin kan hnênah a awm zâwk ang; chûng tui chungah chuan indona lawng lian pui karfung nei mi rêng rêng a kal lo vang a, lawng lian ropui tak pawhin a kal pêl hek lo vang.

²²LALPA chu kan Rorêltu a ni a, LALPA chu dân min petu a ni a, LALPA chu kan Lal a ni; ani chuan min chhandam ang.

²³I hruite chu tihdulin a awm a, an puanzâr ngul bul chu an tinghet thei lo va, puanzâr chu an zâr thei lo. Chumi lai tak chuan râllâk sum tam tak chu semin a awm a, kebaite pawhin râllâk sum an la ta a.

²⁴Chumi khuaa awm chuan, “Ka damlo ve,” a ti lo vang a, a chhûnga mi awmte chu an sual ngaihdam a ni ang.