Read Mizo_Old_version Isaia 34 Bible Online

Isaia 34 - Mizo_Old_version bible

Isaia 34

¹Hnam tinte u, benga hre tûrin lo hnai rawh u; mi tinte u, ngaithla rawh u! Lei leh a chhûnga awm zawng zawngte chuan bengin hre rawh se, khawvêl leh a chhûng ata chhuak zawng zawngte nên.

²LALPA chuan hnam tinrêng chungah chuan lungnih lohna a neiin, an sipaiho zawng zawng chungah chuan thinrimna a nei si a; anni chu a tiboral vek a, thahah a pe ta a.

³An zînga thahate chu paih chhuahin an awm ang a, an ruang rimchhia chu a chho vut vut ang a, tlângte chu an thisena tihtuiin a awm ang.

⁴Vâna awmho zawng zawngte khi tihralin an awm ang a, vân khi lehkhabu zial mi an zial angin zialin a awm ang a; a awmho zawng zawngte khi, grêp hrui ata a hnah a vuai a, a tla ṭhîn ang leh, theipui kûng ata a hnah vuai a tla ṭhîn ang hian, an vuai zovin an tla vek ang.

⁵Ka khandaih chuan vânah tlai takin a in ta si a: ngai teh, chu chu, rorêl tûrin, Edom-ho chungah leh ka ânchhe lawh mite chungah chuan a chhuk ang.

⁶LALPA khandaih chu thisenin a tlai a, thaunaa tihthauvin a awm ta, berâmnote leh kêlte thisenin, berâmpa kal thautein: LALPA chuan Bozra khuaah chuan inthawina a nei a, Edom ramah chuan thahna nasa tak a nei bawk si a,

⁷Selepate pawh chu an ruala sah thûkin an awm ang a, bâwngpate, bâwngchalte nên; an ram chuan thisen a rui ang a, an vaivut chu thaunaa tihthauvin a awm ang.

⁸LALPA phuba lâk ni a ni tawh si a, Zion avânga inbeihna thua thungrulhna kum chu.

⁹Edom lui tuite chu lawng hnaia chantîrin a awm ang a, a vaivut chu kâta chantîrin a awm bawk ang a, a ram chu lawng hnai kâng hluah hluahah a chang ang.

¹⁰A chhûn a zânin tihmihin a awm lo vang a; a meikhu chu kumkhuain a chho ngut ngut ang. Chhuan awm chhûng zawng zawng chuan chhiain a awm reng ang a; kumkhua pawhin tu mân an pal lo vang.

¹¹Tuivalawng leh sakuhin chumi ram chu an nei zâwk ang a, chingpirinu leh choâk chutah chuan an awm ang. LALPAN a tichhe vek ang a, hmun ruakah chuan a sahal a khai ang.

¹²An mi ṭhate chu ram awp tûrin an ko vang a; nimahsela, chutah chuan koh tûr tu mah an awm lo vang a; an mi lian zawng zawng chu engmahlo an ni ang.

¹³An lal inahte chuan hnimhlîngneite a ṭo vang a, an kulhpui chhûngahte chuan ṭaiṭên leh buarte a ṭo vang; sihalte awmnaah leh savanghâwngseite tân tuallai a ni ang.

¹⁴Tin, thlalêra ramsate chu chinghniate nên an intâwk ang a, sathâr chuan a ṭhian a ko vang a; a ni, zân thil hlauhawm pui chuan chuta chuan awmhmun a khuar ang a, ama tân chawlh hmun tûr a hmu ang.

¹⁵Chutah chuan rûlthal chuan bu a chhep ang a, a tui ang a, a keu vang a, a awp khâwm ang; a ni, chutah chuan mute chu kawppui nei ṭheuhvin an awm khâwm ang.

¹⁶ LALPA lehkhabuah zawng ula, chhiar rawh u: chûng zîngah chuan pakhat mah kim lo a awm lo vang a, pakhat mah kawppui nei lo a awm lo vang. Ka kâ ngeiin thu a pe a, a thlarau ngeiin chûng chu a hruai khâwm ta hlawm si a.

¹⁷Ani chuan an tân ṭhum a vâwrsak a, a kutin hruia tehin ram chu a semsak hlawm a; kumkhuain an nei ang a, chhuan awm chhûng zawng zawngin chutah chuan an awm ang.