Read Mizo_Old_version Isaia 36 Bible Online

Isaia 36 - Mizo_Old_version bible

Isaia 36

¹Tin, Hezekia lal kum sâwm leh kum lina kumah chuan heti hi a ni a, Assuria ram lal Senakeriba chu Juda rama khua kulhpui nei zawng zawng bei tûrin a han chho va, a la ta a.

²Tin, Assuria lal chuan Rabsakea chu sipaiho tam tak hruaiin, Lakis khua aṭangin Jerusalem khuaa Lal Hezekia hnênah chuan a tîr a. Tin, dîl chhakta zâwk tuilâkna kianga puan sutu phûl lamlianah chuan a ding a.

³Chutichuan, lal chhûngte chunga hotua awm Hilkia fapa Eliakima te, lehkhaziaktu Sebna te, chanchin ziaktu Asapha fapa Joa te chu a hnênah an lo chhuak a.

⁴Tin, Rabsakean an hnênah, “Hezekia hnênah heti hian sawi rawh u, ‘Lal ropui tak Assuria lal chuan heti hian a ti: I rinna i nghahna hi eng nge ni le?

⁵Indona atân chuan i remruat leh i chakna hi thu mai mai a ni ka ti. Tu nge i rin a, ka chunga i hel tâk ni le?

⁶Ngai teh, he luang sâwp tiang, Aigupta-ho hi i ring a nih hi; chumi chu miin a rinchhan chuan a kutah a chhun lût ngawt ang; Aigupta lal Pharaoa chu amah ringtu zawng zawng chungah chuan chutiang chu a ni ṭhîn.

⁷A nih loh leh, ka hnênah, “LALPA kan Pathian chu a ni kan rin ni,” i tih chuan, ani chu Hezekian Juda-ho hnênah leh Jerusalem-ho hnênah, “He maichâm hmaah chauh hian in be tûr a ni,” tiin, a hmun sângte leh a maichâmte a lâk bosaka kha a ni lâwm ni?’

⁸Chutichuan, khawngaih takin, ka pu Assuria lal hnênah chuan thu tiam rawh; tichuan, keiin sakawr sânghnih ka pe ang che, nangin a chunga chuang tûrte i hmuh theih dâwn phawt chuan.

⁹Engtin nge tawlailîrte leh sakawr chung chuang mite lam thu-ah Aigupta-ho chunga i rinna nghatin, ka pu chhiahhlawh tê berte zînga hotu pakhat pawh hi i dan zawh dâwn le?

¹⁰Tin, he ram hi tichhe tûra bei tûrin LALPA tel lova lo chho em ka nih? LALPAN ka hnênah, ‘Chu ram chu bei tûrin chho la, tichhe rawh,’ mi ti a ni, tiin,” a ti a.

¹¹Tin, Eliakima leh Sebna leh Joa-te chuan Rabsakea hnênah, “Khawngaih takin i chhiahhlawhte hi Suria ṭawngin min be tawh rawh, chu chu kan hre thei si a; kulh bang chunga mite beng hriatah Juda ṭawngin min be tawh suh,” an ti a.

¹²Nimahsela, Rabsakea chuan, “Ka pu chuan i pu hnên chauhvah leh i hnên chauhvah hêng thu hi sawi tûrin mi tîr em ni? Kulh bang chhûnga ṭhuho, nangmahni nêna mahni êk la ei tûr leh mahni zun la in tûrte hnênah hian mi tîr zâwk a ni lâwm ni?” a ti a.

¹³Tin, Rabsakea chu a ding a, Juda ṭawngin aw ring takin a au va, “Lal ropui tak Assuria lal thute hi ngaithla rawh u.

¹⁴Lal chuan heti hian a ti, ‘Hezekia bumin awm duh suh u, ani chuan a chhanhim thei dâwn si lo che u a;

¹⁵Hezekian, “LALPA chuan matheilovin min chhanhim ang; he khawpui hi Assuria lal kutah pêkin a awm lo vang,” tiin sawi mah sela, LALPA chu Hezekia sawi avângin ring duh chuang hek suh u.’

¹⁶Hezekia thu ngaithla suh u; Assuria lal chuan heti hian a sawi si a: ‘Min rem ula, ka hnênah hian lo chhuak rawh u; tin, ka lo kala, nangmahni ram anga buh leh uain awmna ram, chhang leh grêp huante awmna rama ka kalpui hma loh che u chuan, mi tinin mahni grêp hruia mi leh mi tinin mahni theipui kûnga mi ei ṭheuh ula, mi tinin mahni tuikhur tui in ṭheuh rawh u.

¹⁸“LALPAN min chhanhim ang,” tia Hezekian a thlêm tâk dah che uin, fîmkhur rawh u. Hnam tin pathian zînga mi rêng rêngin an ram chu Assuria lal lakah an chhanhim ta em ni?

¹⁹Hamath leh Arpad-ho pathiante kha khawiah nge an awm tâk? Sepharvaim-ho pathiante kha khawiah nge an awm tâk? Samari khua kha ka lakah an chhanhim ta em ni?

²⁰Chûng ram pathian zawng zawng zînga mi chuan tute nge an ram ka lakah chhanhim ni? LALPA chuan Jerusalem khua hi ka lakah a chhanhim tehchai ang maw?’ tiin,” a ti a.

²¹Anni erawh chu an ngawi reng a, thu pakhat mahin an chhâng lo; lal thupêk chu, “Ani chu chhâng suh u,” tih a ni si a.

²²Chutichuan, lal chhûngte chunga hotua awm Hilkia fapa Eliakima te, lehkhaziaktu Sebna te, chanchin ziaktu Asapha fapa Joa te chu silhfên pawh thlêr inbelin Hezekia hnênah chuan an lo thleng a, Rabsakea thusawite chu an hrilh ta a.