Read Mizo_Old_version Isaia 37 Bible Online

Isaia 37 - Mizo_Old_version bible

Isaia 37

¹Tin, heti hi a ni a, Lal Hezekia chuan chu chu a hriat veleh a silhfênte chu a pawt thlêr a, saiip puan a inbel a, LALPA inah chuan a lût ta a.

²Tin, a chhûngte chunga hotua awm Eliakima leh, lehkhaziaktu Sebna leh, puithiamho upate chu saiip puan inbelin Amoza fapa zâwlnei Isaia hnênah a tîr a.

³Tin, anni chuan a hnênah, “Hezekian heti hian a ti, ‘Vawiin ni hi manganna leh hmuhsitna ni a ni; nautê chu an pian a hun tawh si a, anmahni hring tûrin chakna a awm tawh si lo.

⁴Rabsakea, a pu Assuria lalin Pathian nung sawichhe tûra a tirha thusawite chu, LALPA i Pathian chuan a bengin a la hria a ni thei e; tichuan, a thusawi, LALPA i Pathianin a benga a hriatahte chuan a la zilhhau vang. Chumi avâng chuan a la awm chhunte tân chuan i ṭawngṭaina chu hlân chho rawh,’ a ti e,” an ti a.

⁵Chutichuan, Lal Hezekia chhiahhlawhte chu Isaia hnênah an lo kal a.

⁶Tin, Isaian an hnênah, “In pu hnênah heti hian in sawi tûr a ni, ‘LALPA chuan heti hian a ti, “I thu hriat, Assuria lal chhiahhlawhten min sawichhiatnate kha hlau suh.

⁷Ngai teh, a kawchhûngah chuan thlarau eng emaw ka awmtîr ang a; tichuan, thuthang a hria ang a, ama ramah a haw leh ang; tichuan, ama ram ngeiah chuan khandaiha tihtlûkin ka awmtîr ang,” a ti e,’ tiin,” a ti a.

⁸Chutichuan, Rabsakea chu a kîr leh a, Assuria lal chuan Libna khua a lo bei lai a va hmu a; Lakis khua ata chu a kal chhuak tih a hre tawh reng si a.

⁹Tin, Assuria lal Senakeriba chuan Tirhaka, Ethiopia ram lal chungchâng thu, “Nangmah bei tûrin a chhuak ta,” tiin mi sawi a hria a. Tichuan, chu chu a hriat veleh Hezekia hnênah palaite a tîr a:

¹⁰“Heti hian Juda-ho lal Hezekia hnênah in sawi tûr a ni: ‘I rin Pathian chuan, Jerusalem khua Assuria lal kutah pêk a ni lo vang, tiin bum che suh se.

¹¹Ngai teh, Assuria lalten ram zawng zawng tichhe vekin an chunga an thiltihte kha i bengin i hria e; tichuan, nang tehlul hi chhanhimin i awm dâwn bîk em ni?

¹²Hnam tin pathiante chuan Gozan-ho te, Haran-ho te, Rezeph-ho te, Eden fa Tel-asar khuaa awm te, min thlahtuten an tihboralte kha an chhanhim em ni?

¹³Hamath lal te, Arpad lal te, Sepharvaim khawpui lal te, Hena lal te, Iva lal te kha khawiah nge an awm tâk?’ tiin,” a ti a.

¹⁴Tin, Hezekia chuan palaite kut ata lehkha chu a hmu a, a han chhiar a; tichuan, Hezekia chu LALPA inah chuan a han lût a, LALPA hmaah chuan a phah ta a.

¹⁵Tin, Hezekia chu LALPA hnênah a ṭawngṭai a,

¹⁶“Aw sipaihote LALPA, Israel-ho Pathian, cherub chunga ṭhua, nang hi, nang chauh hi, leilung luah ram zawng zawng Pathian chu i ni; nang chuan lei leh vân hi i siam a ni.

¹⁷Aw LALPA, i beng rawn dawh la, ngaithla teh; aw LALPA, i mit meng la, en teh; Pathian nung sawichhe tûra mite tîrtu Senakeriba thu zawng zawng hi ngaithla teh.

¹⁸LALPA, Assuria lalten ram zawng zawng leh an lei chu an tichhe ngei tak a,

¹⁹an pathiante chu meiah an paih bawk a; chûngte chu pathian an ni lo rêng a ni, mihring kuta siam, thing leh lung an ni zâwk. Chuvângin, an tiboral a ni.

²⁰Chuvângin, aw LALPA kan Pathian, nang hi, nang chauh hi, LALPA i ni tih leilung luah ram zawng zawng hian an hriat theih nân a lakah min chhandam ang che,” tiin.

²¹Chumi lai chuan Amoza fapa Isaia chuan Hezekia hnênah mi a tîr a, heti hian a ti a, “LALPA, Israel-ho Pathian chuan heti hian a ti a ni: ‘Assuria lal Senakeriba chhiatna tûr lama ka hnêna i ṭawngṭai avângin,

²²hei hi a chungchâng thu LALPAN a sawi chu a ni: Zion fanu nula chuan a hmusit chia, a nuihsan che; Jerusalem fanu chuan a lu a thin khum che.

²³Tu nge i tihhmingchhiata i sawichhiat ni? Tu chungah nge i aw i tihpâwra i mit i tihsân? Israel-ho Mi Thianghlima chung ngeiah.

²⁴I chhiahhlawhte hmangin Lalpa chu i tihmingchhia a, “Ka tawlailîr tam tak nên tlâng hmun zo, Lebanon ram rilahte hian ka lo thleng chho ta a; a sidar thing sâng takte leh a fâr thing ṭha mite hi ka kit ang a; a hmun zo hla ber, a lei ṭha hmun ramngawah chuan ka lût ang.

²⁵Tuichhunchhuah ka lai a, tui ka in ṭhîn a, ka kephah hnuai hian Aigupta lui zawng zawng chu ka tikang vek ang,” i ti a.

²⁶Keiman hmânlai ata chûng chu ka tih a ni a, hmasâng ata chûng chu ka siam a ni tih i hre lo vem ni? Kulhpui nei khuate tichim tûrin ka ti che a ni.

²⁷Chuvângin, a chhûnga awmte chu an chak mang lo va, an hlau va, an lo mualpho tâk kha; phûl hlobet ang leh, hnim hring ang leh, in chunga hlobet ang leh, lo buh ṭhat hma ang lek an nih kha.

²⁸Kei erawh chuan i ṭhut te, i chhuah te, i luh te, ka chunga i thinurziate hi ka hria asin.

²⁹Ka chunga i thinur avâng leh, i ṭawng chaltlaizia chu ka bengah a lo luh chhoh tâk avâng hian, ka hnârvuah chu i hnârah ka vuah ang a, ka thîrbarh chu i hmuiah ka vuah bawk ang a, i lo kalna kawng ngeiah khân ka kîrtîr leh ang che, tih hi,’ tiin.

³⁰Tin, hei hi i tân chhinchhiahna tûr chu a ni ang: kuminah hian buhhli in ring ang a; nakkumah pawh chumi hli bawk chu in ring ang; tin, a kum thumnaah chuan buh tuh ula, ât ula, grêp huante siam ula, a rah ei rawh u.

³¹Tin, Juda chhûngte zînga la dam chhunte chu a chhuk zâwnga zung kaia, a chho zâwnga rahin a awm leh ang.

³²Jerusalem aṭangin a la awm chhunte chu an chhuak ang a, Zion tlâng aṭangin a la dam tûrte chu an chhuak bawk ang. Sipaihote LALPA ṭhahnemngaihna chuan chûng chu a ti ang.

³³Chuvângin, LALPA chuan Assuria lal chungchâng thu-ah heti hian a ti, ‘Ani chuan he khawpui hi a lo thleng lo vang a, hetah hian thal a kâp hek lo vang, phaw nên a kiangah a lo kal hek lo vang a, a beihna tûrin lei kulh a siam hek lo vang.

³⁴A lo kalna kawngah, chumiah ngei chuan a kîr leh ang a, he khawpui hi a lo thleng lo vang, LALPAN a ti.

³⁵Keimah avâng leh ka chhiahhlawh Davida avângin he khawpui hi chhanhim tûrin ka hum dâwn a ni,’ tiin,” a ti a.

³⁶Tichuan, LALPA vântirhkoh chu a va chhuak a, Assuria-ho riahhmunah chuan mi nuai khat leh sîngriat leh sângnga a tihlum a; tin, zîng taka mi an han thawh chuan, ngai teh, mitthi ruang hlîr a lo ni a.

³⁷Chutichuan, Assuria lal Senakeriba chu a chhuak a, a kal bo va, a inah a haw a, Ninevi khuaah chuan a awm ta reng a.

³⁸Tin, heti hi a ni a, a pathian Nisroka inah chuan pathian a biak laiin a fapa Adrammeleka leh Sarezera-te chuan khandaihin an sât hlum a; tichuan, an tlân bo va, Ararat ramah an lût a. Tichuan, a fapa Esar-haddona chuan a aiawhin ro a rêl ta a.