Read Mizo_Old_version Isaia 38 Bible Online

Isaia 38 - Mizo_Old_version bible

Isaia 38

¹Chûng lai chuan Hezekia chu thih ngamin a na a. Tichuan, Amoza fapa zâwlnei Isaia chu a hnênah a lo kal a, a hnênah, “LALPA chuan heti hian a ti, ‘I chhûngte khawsak dân tûr rêlsak rawh; dam chhuak lovin i thi ngei dâwn si a,’ tiin,” a ti a.

²Chutichuan, Hezekia chu bang lam hawiin a let a, LALPA hnênah a ṭawngṭai a,

³“Aw LALPA, i hmaah thutak leh thinlung ṭha famkim pua ka awm ṭhinzia leh, i mit hmuha thil ṭha ka tih ṭhinzia kha khawngaih takin hre reng ang che,” a ti a. Tin, Hezekia chu a ṭap ta zawih zawih a.

⁴Chutichuan, LALPA thu chu Isaia hnênah a lo thleng a,

⁵“Kal la, Hezekia hnênah sawi rawh, ‘LALPA, i pu Davida Pathian chuan heti hian a ti, “I ṭawngṭaina kha ka hria a, i mittuite pawh ka hmu a; ngai teh, i dam chhûng nite hi kum sâwm leh kum ngain ka tisei ang.

⁶Tin, nang leh he khawpui hi Assuria lal lakah ka chhanhim ang a, he khawpui hi ka hum ang.” ’

⁷Tin, LALPAN a thil sawi hi a ti ngei dâwn tih, hei hi i tân LALPA laka chhinchhiahna tûr chu a ni ang:

⁸ngai teh, Lal Ahaza dâr chin tehnaa ni hlim saw, rahka sâwmin ka tikîr ang,” a ti a. Chutichuan, ni hlim chu rahka sâwm a kîr leh ta a.

⁹Juda lal Hezekia damlo, a dam leh hnua a lehkha ziak chu:

¹⁰“Ka dam chhûng nite chhûnlai takah hian thlân kawngkâahte ka lût dâwn a; Ka dam chhûng kum la bâk tûrte chu chhuhin ka awm ta,” ka ti a.

¹¹“LALPA, LALPA ngei chu, mi nung ramah hian ka hmu dâwn tawh lo va; Khawvêla awmte zîngah hian mihring ka hmu leh dâwn tawh lo a nih hi.

¹²Ka awmna hi sawnin a awm a, berâm vêngtu puan in angin ka hnên ata lâk bovin a awm ta; Puan tahtun a puan a zial angin ka nunna hi ka zial a. Ani chuan thembu aṭangin mi chep chhum hmawk dâwn a; Nangin ni khat leh zan khat thil thu-ah mi titâwp mai dâwn a nih hi ka ti a.

¹³Zîng thlengin ka ngawi hrâm hrâm a; sakeibaknei angin ka ruh zawng zawng a titliak vek a; Nangin ni khat leh zan khat thil thu-ah mi titâwp mai dâwn a nih hi.

¹⁴Vamûr emaw, kânghlai emaw angin ka hrâm ka hrâm a; ṭhûro angin ka rûm ka rûm a; chung lam thlîr nân ka mit a vai zo ta. Aw LALPA, hnehchhiaha ka awm hi; nang chuan a bul mi tumsak ang che.

¹⁵Eng nge ka sawi ang aw? Ani chuan mi bia a, ani vêk chuan a ti ta nghâl a. Ka nunna thawpikna avâng khân ka dam chhûng kum zawng zawngah chuan zawi têin ka kal dêm dêm tawh ang.

¹⁶Aw Lalpa, hetiang thil avâng hian mihringte hi an nung ṭhîn a; Chûngah chauh chuan ka thlarau nunna chu a awm ṭhîn; Chumi avâng chuan mi tidam lehin mi tinung leh ang che.

¹⁷Ngai teh, ka thlamuanna tûrin a ni, thawpikna nasa tak ka neih kha ni; Nimahsela, nang chuan, ka nunna i hmangaih avângin, chhiatna khuarkhurum ata chu i chhanhim ta, Ka sualte zawng zawng kha i hnung lamah chuan i paih vek si a.

¹⁸Thlân hian a fak thei si lo che a; thihna hian a chawimawi thei hek lo che; Khuarkhuruma chhukte chuan i thutak chu an beisei thei lo a ni.

¹⁹Mi nungin, mi nungin, anni ngei chuan, vawiina ka tih ang hian an fak ang che; Pa chuan fate hnênah i thutak chu a hriattîr ang.

²⁰ LALPA chu mi chhandam tûrin a inpeih reng a ni; Chuvângin, kan dam chhûng zawng zawngin, LALPA inah chuan Ka hlate hi ṭingṭangte nên kan sa ang.”

²¹Isaia chuan, “Theipui rah hlâwm khat la sela, damdawi a bela bel mi atân a khawihlîah bel rawh se; tichuan, a dam ang,” a lo ti tawh a ni.

²²Hezekia pawh chuan, “LALPA inah ka chho leh ang tih hriatna eng chhinchhiahna nge lo awm ang?” a lo ti tawh a ni.