Read Mizo_Old_version Isaia 39 Bible Online

Isaia 39 - Mizo_Old_version bible

Isaia 39

¹Chumi lai chuan Baladana fapa Babulon lal Merodak-baladana chuan lehkhate leh lâwmman Hezekia hnênah a thawn a, a nâ tih leh a dam leh ta tih a lo hriat avângin.

²Tichuan, Hezekia chu an chungah a lâwm a, an hnênah a thil hlu dahna in - tangkarua te, rangkachak te, englo rimtui te, hriak hlu tak te, a râlthuam dahna in chhûng zawng zawng te, a ro ṭha zawng zawng chu a entîr a. A ina mi leh a ram chhûnga mi Hezekian an hnêna a entîr loh thil rêng rêng a awm lo.

³Chumi lai chuan zâwlnei Isaia chu Lal Hezekia hnênah a lo kal a, a hnênah, “Nichina mite khân eng nge an sawi? Khawi aṭangin nge i hnênah an lo kal?” a ti a. Tin, Hezekia chuan, “Ram hla tak ata, Babulon aṭangin ka hnênah an lo kal a ni,” a ti a.

⁴Tichuan, ani chuan, “I inah hian eng nge an en kha?” a ti a. Tin, Hezekia chuan, “Ka in chhûnga awm zawng zawng chu an en vek; ka ro ṭha zînga mi ka entîr loh eng mah a awm lo,” tiin a chhâng a.

⁵Tichuan, Isaian Hezekia hnênah chuan, “Sipaihote LALPA thu hi hre rawh:

⁶‘Ngai teh, i in chhûnga awm zawng zawng leh vawiin thlenga i puten an khâwl khâwmte chu Babulon khuaah kalpuiin a awm vek ang; eng mah rêng rêng hnutchhiahin a awm lo vang; chutiang nite chu a la thleng dâwn,’ LALPAN a ti.

⁷‘Tin, i fapa, i rîla rah, i hrin tûrte ngei zînga mi chu, an kal bopui ang; anni chu Babulon lal inah chuan mi tilrehah an la awm ang,’ a ti,” a ti a.

⁸Tichuan, Hezekian Isaia hnênah chuan, “LALPA thu i sawi hi a ṭha e,” a ti a. Amah vêk chuan, “Ka dam chhûng hian remna leh thutak a awm dâwn si a,” a ti bawk a.