Read Mizo_Old_version Isaia 40 Bible Online

Isaia 40 - Mizo_Old_version bible

Isaia 40

¹“Thlamuan rawh u, ka mite hi thlamuan rawh u!” in Pathianin a ti.

²“Jerusalem-ho hnênah thlamuan lam zâwngin thu sawi ula, an indona chu a kin a, an sualna chu ngaihdam a ni a, an thil tihsual zawng zawng aiah LALPA kut ata a leh hnihin an hmu ta tih hril rawh u.”

³Chu! Autu râwl chuan, “Thlalêrah LALPA kawng buatsaih ula, ram rovah kan Pathian tân lamlian tingîl rawh u.

⁴Kawr tin tihsân a ni vek ang a, tlâng tin mual tin tihhniam a ni bawk ang; kawng kawite tihngîl a ni ang a, a bumboh laite tihrual a ni bawk ang;

⁵LALPA ropuina chu tihlan a ni ang a, mi zawng zawngin chu chu an hmu vek ang; LALPA ka chuan a sawi tawh si a,” a ti.

⁶Chu! Aw chuan, “Au rawh,” a tih chu. Tin, mi chuan, “Eng thu sawiin nge ka au vang?” a ti a. “ ‘Mi zawng zawng hlobet ang an ni a, an ropuina zawng zawng pawh phûl pangpâr ang a ni.

⁷LALPA thaw chuan a chhêm avângin hlobet chu a vuai a, a pâr chu a chuai ṭhîn; mite chu hlobet ang chauh an ni.

⁸Hlobet chu a vuai a, a pâr chu a chuai ṭhîn; kan Pathian thu erawh chu chatuanin a awm reng ang,’ tiin,” a ti a.

⁹Aw Zion hnêna chanchin ṭha hriltu, tlâng sâng takah khian han chho rawh; aw Jerusalem hnêna chanchin ṭha hriltu, ring takin i aw chhuah rawh; chhuah rawh, hlau suh; Juda khuate hnênah chuan, “En teh u, in Pathian hi!” ti rawh.

¹⁰En teh u, Lalpa PATHIAN chu mi chak tak angin a lo kal dâwn hi, a bân chuan a aiah ro a rêl ang; en teh u, a lâwmman chu a hnênah a awm hi, a rulhna chu a hmaah a awm bawk a.

¹¹Ani chuan berâm vêngtu angin a berâm rual chu a châwm ang a, berâmnote chu a bânin a pawm khâwm ang a, a ângchhûnga dahin a kalpui ang a, no hruai laite chu zawi têin a hruai dial dial ang.

¹²Tuin nge tuite chu a kutphah khuar leka teha, vân khi khâp leka teha, leia vaivut hi tehkhâwng pakhat leka thun veka, tlângte chu khîn leka bûka, mualpâwngte chu bûkna leka bûk kha le?

¹³Tuin nge LALPA thlarau chu thil tih dân tûr kawhhmuh le? A nih loh leh tu nge a remruatsaktu nia amah zirtîr le?

¹⁴Ani chuan tu nge a râwna, tuin nge amah chu hriattîra, rorêlna kawng entîra, hriatna zirtîra, hriatthiamna kawng entîr ngai le?

¹⁵Ngai teh, hnam tin chu bâlṭîna tui far khat ang lek an ni a, bûknaa thil dip bâng kai ang leka ruat an ni; ngai teh, ani chuan thliarkârte chu thil tê tak tê angin a la nelh nelh mai ṭhîn.

¹⁶Lebanon meuh pawh tuah tham a ni lo va, a rama rante pawh hâl rala inthawina tham an ni hek lo.

¹⁷Hnam tinrêngte chu a hmaah chuan engmahlo ang an ni a; ani ngaih chuan engmahlo aia tlêm zâwk, boruak mai an ni a.

¹⁸Pathian chu tu nên nge in tehkhin dâwn le? A nih loh leh, eng lem nge amah nên in tehkhin dâwn le?

¹⁹Milem siam chawp hi hna thawk mi chuan a chhûng a, rangkachak chher mi chuan rangkachakin a luan a, chu mi tân chuan tangkaraw khaidiatte a chhûnsak ṭhîn.

²⁰Chutiang thilpêk pe zo lova rethei lutuk chuan thing mawih lo tûr a thlang ṭhîn; milem siam chawp, nghîng lo tûr, a tâna dinsaktu tûr themthiam mi a zawng ṭhîn.

²¹In rilruin in hre ngai lo vem ni? In bengin in hre ngai lo vem ni? A tîr aṭang khân an hrilh lo che u em ni? Leilung pian tirh aṭang khân in hre thiam lo vem ni?

²²Ani chu leilung kualkhungna chunga ṭhua chu a ni, a mit hmuhah chuan lei chunga awmho chu khaute ang lek an ni a; ani chu vân khi puan in chung anga kai pharha, puan in awmna tûra zâra,

²³mi liante engmahlova siam ṭhîna chu a ni; ani chuan leia rorêltute chu engmahlovah a siam ṭhîn.

²⁴A ni, a phun an ni lo; a ni, a tuh an ni lo; a ni, an kûng chuan leiah zung a kai lo; chu lo pawh chu ani chuan anniho chu a chhêm a, an vuai a, ṭhâwngaleivirin buhsi a lâk bo angin a la bo ṭhîn.

²⁵“Tu nên nge mi tehkhina, tu tluk lekah nge mi ruat dâwn?” Mi Thianghlima chuan a ti.

²⁶Chung lamah khian in mitte lên chho ula, khîngte khi tu siam nge ni en rawh u; ani chuan sipaihote khi indawt zêlin a hruai chhuak ṭhîn a, an hmingin a ko ṭheuh ṭhîn a; a chakna ropui êm avâng leh, thiltihtheihna lama a chak avângin pakhat mah kim lo an awm ngai lo.

²⁷Engati nge aw Jakob-ho, hetianga in tih ni, engati nge aw Israel-ho, hetianga in sawi ni: “Ka kawng hi LALPA laka thup a ni a, ro mi rêlna hi ka Pathian laka lâk bo a ni ta,” tih hi?

²⁸In rilruin in hre ngai lo vem ni? In bengin in hre ngai lo vem ni? Kumkhaw Pathian, LALPA, kâwlkil Siamtu chu, a chauh ngai lohva, a hah ngai hek lohzia hi; a hriat thiamzia chu zawn chhuah rual a ni lo.

²⁹Chau hnênahte chuan thiltihtheihna a pe ṭhîn a, chakna rêng nei lote chu a tichak ṭhîn.

³⁰Tleirâwlte meuh pawh an chauvin an hah ang a, tlangvâlte pawh an tlu dêr ang;

³¹LALPA nghâktute erawh chuan an chakna chu an siam ṭha leh ang a; mupuite angin thlain an thlâwk chho vang a, hah lovin an tlân ang a, chau lovin kein an kal ang.