Read Mizo_Old_version Isaia 42 Bible Online

Isaia 42 - Mizo_Old_version bible

Isaia 42

¹“Ka chhiahhlawh, ka chelh reng, ka thlan, ka rilruin a lawm êm êma hi en teh u; a chungah ka thlarau ka dah ta; Jentailte hnêna pêk tûrin rorêlna thu a la chhuak ang.

²A au lo vang a, aw a chhuah hek lo vang a, kawtthlerah a aw chu a hriattîr hek lo vang.

³Luang sâwp a titliak fithla lo vang a, la khu pawh a timit lo vang; rorêlna chu thutakin a kengkawh ang.

⁴Leiah hian rorêlna a awmtîr hma loh chuan ani chu a chau lo vang a, a beidawng hek lo vang; tin, thliarkârte chuan a dân thu chu an nghâk reng dâwn.”

⁵Pathian, LALPA, vân siamtu leh kai pharhtu, lei leh a chhûng ata chhuak zawng zawng tizautu, a chunga mite hnêna thâwkna petu leh a chunga kalte hnêna thlarau petu chuan heti hian a ti:

⁶“Kei LALPA hian felnain ka ko a che, i kut ka chelh ang a, ka humhim ang chia, mitdelte mit tivâr tûr leh, mi tângte rip chhûng ata hruai chhuak tûr leh, thim zînga ṭhute tân in ata hruai chhuak tûrin, mite thuthlung atân leh Jentailte tiêngtu atân ka ruat ang che.

⁸LALPA chu ka ni, chu chu ka hming a ni; ka ropuina hi mi dang hnênah ka pe lo vang a, fak ka hlawhna hi milem siam chawpte hnênah ka pe hek lo vang.

⁹Ngai teh u, tûn hma thilte chu a lo thleng ta, thil tharte ka sawi a nih hi; a ṭiah hmain a chanchin ka hrilh che u a nih hi.”

¹⁰Tuifinriata zuk kalte leh, a chhûnga awm zawng zawngte leh, thliarkârte leh a chunga awm zawng zawngte u, LALPA chawimawiin hla thar sa ula, kâwlkil aṭang pawhin amah fakna hla sa rawh u.

¹¹Thlalêr leh a khawpuite chuan an aw chhuah rawh se, Kedar-ho awmna khuate chuan. Sela khuaa awmte chu hlim takin zai sela, tlâng chhîp aṭangte chuan au rawh se.

¹²LALPA chu tiropui sela, thliarkârahte chuan a fakna thu hril rawh se.

¹³LALPA chu mi chak tak angin a chhuak ang a, indo mi angin thinurna a chawk tho vang; a au vang a, a ni, ring takin a au vang; amah dotute chungah chuan chak takin a che ang.

¹⁴“Rei tak ka ngawi reng tawh a; ka awm hle hlein ka insûm hrâm hrâm ṭhîn. Tûnah erawh chuan hmeichhe nau vei angin ka au tuar tuar ang a; ka thaw huam huamin ka thaw hlawp hlawp bawk ang.

¹⁵“Tlângte leh mual pâwngte chu ka tichhia ang a, a hnim zawng zawngte chu ka tiro vek ang; luite chu thliarkârahte ka siam ang a, dîlte chu ka tikang ang.

¹⁶Mitdelte chu an hriat ngai loh kawngah ka rawn hruai ang a; an hriat ngai loh kalkawngahte chuan ka hruai ang. An hmaah chuan thim chu êngah ka siam ang a, kawng kawi laite chu ka tingîl bawk ang. Chûng thil chu ka ti ang a, anni pawh ka thlahthlam lo vang.

¹⁷Milem siam chawpte ringa, milem chhûnte hnêna, ‘Kan pathiante in ni,’ titute chu hawi kirtîrin an awm ang a, nasa takin an mualpho vang.

¹⁸“Bengngawngte u, bengin hre rawh u; mitdelte u, in hmuh theih nân en rawh u.

¹⁹Ka chhiahhlawh lo chu tu mit nge del? A nih loh leh, ka tirhkoh tirh angin tu beng nge ngawng? Mi remtu angin tu mit nge dela, LALPA chhiahhlawh angin tu mit nge del?

²⁰Thil tam tak i hmu a; nimahsela, i rilruah i vawng reng ṭhîn lo; a bengte chu a âwng a; nimahsela, a hre ṭhîn lo.”

²¹Dân chu a felna avânga tihlena tihzahawm chu LALPA chuan ṭha a ti a.

²²Nimahsela, hêng mite hian rawk leh suam an tâwk a, humah an tla a, tân inah an tâng bo va; sal atân man an ni a, chhantu tu mah an awm lo.

²³In zîngah hian chûngah chuan tu nge bengchhi tûr awm che u? Hun lo la thleng tûr atân ngaithlaa hre tûr tu nge awm che u?

²⁴Tuin nge Jakob-ho râllâka lâk tûra pea, Israel-ho rûkrute hnênah pe ni? LALPA, a chunga thil kan tihsualna chuan a pêk a ni lâwm ni? A kawngahte an kal duh si lo va, a dân thu lah an awih hek lo.

²⁵Chuvângin, a thinur nasa tak chu an chungah a leih a, indo râpthlâk an chungah a thlentîr a, chu chuan anmahni chu a kâng a.