Read Mizo_Old_version Isaia 43 Bible Online

Isaia 43 - Mizo_Old_version bible

Isaia 43

¹Tûnah erawh chuan, aw Jakob-hote u, LALPA, nangmahni siamtu leh, aw Israel-hote u, nangmahni dintu chuan heti hian a ti: “Hlau suh u, ka tlan tawh che u hi; in hmingin ka ko che u a, ka ta in ni asin.

²Tuite in dai kai lai pawhin kei in hnênah ka awm ang a; luite in dai kai lai pawhin a chîm pil lo vang che u. Meia in kal tlang lai pawhin in kâng lo vang a, meialhin a tialh hek lo vang che u.

³Kei hi LALPA in Pathian, Israel-ho Mi Thianghlima, nangmahni chhandamtu ka ni si a; nangmahni tlanna atân Aigupta ram ka pe a, Ethiopia leh Seba ramte chu nangmahni aiah ka pe.

⁴Ka ngaiha hlu tak in niha, mi zahawm tak in nih bawka, ka hmangaih bawk che u avângin, nangmahni aiah mite ka pe ang a, in nunna aiah mi tin ka pe ang.

⁵Hlau suh u, in hnênah ka awm si a; in thlahte chu khawchhak lam aṭangin ka rawn hruai ang a, khawthlang lam aṭangin ka hruai khâwm ang che u;

⁶hmâr lam hnênah chuan, ‘Thlah rawh u,’ ka ti ang a; chhim lam hnênah chuan, ‘Hrêng reng suh u,’ ka ti ang. Ka fapate chu hla tak aṭangin rawn hruai ula, ka fanute chu kâwlkil aṭangin rawn hruai rawh u;

⁷ka hming pu apiangte leh ka ropuina tûra ka siam apiangte chu; anmahni chu ka din a, a ni, anmahni chu ka siam a ni.”

⁸Mit nei si mitdelte leh, beng nei si bengngawngte chu hruai chhuak rawh u.

⁹Hnam tinrêng inkhâwm sela, mi tin awm khâwm rawh se. An zîngah tuin nge hei hi sawi theia, tûn hma thilte mi hriattîr thei? Thiam chantîra an awm theihna tûrin an thuhretute chu rawn hruai rawh se; a nih loh leh, bengin hria sela, “Thutak a ni,” ti rawh se.

¹⁰“Mi hriata, mi rina, amah chu ka ni tih in hriat theihna tûrin, nangni hi mi hriatpuitute in ni, ka chhiahhlawh, ka thlana pawh chu,” LALPAN a ti: “Ka awm hma chuan Pathian rêng rêng din an awm lo va, ka awm hnuah pawh an awm hek lo vang.

¹¹Kei, keimah ngei hi, LALPA chu ka ni; keimah lo chu chhandamtu rêng rêng an awm lo.

¹²Keimahin ka sawi a, ka chhandam a, ka hriattîr a, in zîngah khân ram dang pathian rêng rêng an awm loh kha; chuvângin, nangni hi ka thu mi hriatpuitute in ni,” LALPAN a ti; tin, “Kei hi Pathian chu ka ni.

¹³A ni, ni awm achinah khân kei hi amah chu ka ni; tichuan, ka kut ata chhanchhuak thei tu mah rêng rêng an awm lo; hna ka thawk ang a, tuin nge chu chu sût ang?” tiin.

¹⁴ LALPA, nangmahni tlantu, Israel-ho Mi Thianghlima chuan heti hian a ti: “Nangmahni avângin Babulon khuaah chuan sipaiho ka tîr a; tichuan, an zain, Kaldai-hote chu, an lâwmna lawngpuiahte chuan tlân bo mi hruaiin ka hruai chhuk ang.

¹⁵Kei hi LALPA, in Mi Thianghlima, Israel-ho Siamtu, in Lal chu ka ni,” tiin.

¹⁶Tuipuia kawng siama, tui tam tak zînga lamlian sialtu,

¹⁷sipai rual ropui tak, tawlailîrte leh sakawrte hruaia, tho leh hauh lo tûra titlu rem rumtu, khâwnvâr phita tihmih anga tichimittu LALPA chuan heti hian a ti:

¹⁸“Tûn hma thilte chu hre reng suh ula, hmasâng thilte chu ngaihtuah hek suh u.

¹⁹Ngai teh u, thil thar ka ti dâwn e; tûn apang hian a ṭiak ang; chu chu in hre dâwn lâwm ni? Thlalêrah meuh pawh kawng ka siam ang a, ram rovah chuan luite ka siam bawk ang.

²⁰Ka mi, ka thlante, mi fakna tilangtu tûra ka tâna ka mi siamte chu in tûr ka pêk theih nân, thlalêrah chuan tuite ka awmtîr avâng leh, ram rovah chuan luite ka awmtîr avângin ramsate pawhin mi chawimawi ang, sihalte, sava nghâwngseite lamin.

²²“Nimahsela, aw Jakob-ho, nangni zawngin mi ko si lo va, aw Israel-ho, nangni zawngin mi ning zâwk a nih hi.

²³Hâlrala in thil hlan ran tête chu mi rawn lâk ngai lo va; in inthawina lamte chuan mi chawimawi ngai hek lo. Thil hlanin rawng ka bâwltîr ngai lo che u a, berawin ka tihah ngai hek lo che u.

²⁴Fu rêng rêng tangkain mi leisak ngai lo va, in inthawinate thauvin mi titlai ngai hek lo; in sualna phurh hnate mi thawhtîr zâwk a, in khawlohnatein nangnin mi tihah ta a ni.

²⁵Kei, keimah ngei hi, keimah leh keimah avâng ngawta in bawhchhiatnate thai bo ṭhîntu chu ka ni; in sualnate pawh ka hre reng lo vang.

²⁶Mi hriatpui rawh u; i ngaihtuah tlâng ang u; thiam chantîra in awm theih nân in thu chu sawi rawh u.

²⁷In pu hmasa ber khân thil a tisual a, in palaite pawhin ka lakah an bawhchhia a.

²⁸Chuvângin, hmun thianghlima mi liante chu ka tibawrhbâng ang a; tichuan, Jakob-ho chu ânchhe dawngah ka siam ang a, Israel-ho chu hau bûrah ka siam bawk ang.