Read Mizo_Old_version Isaia 45 Bible Online

Isaia 45 - Mizo_Old_version bible

Isaia 45

¹“LALPA chuan a hriak thih Kura, hnamte chu a hmaah tudawl tûr leh, lalho kâwnghrênte phelhsak tûr leh, a hmaa kawngkhârte hawnsak tûr leh, kulh kawngkhârte khâr lova awmtîr tûra a kut ding lam ka chelha hnênah chuan, heti hian a ti:

²‘Kei i hmaah ka kal ang a, a bumboh laite chu ka tirual ang; dâr kawngkhârte chu ka tichhe rem rum ang a, a kalhna thîr tlâwnte chu ka tibung ang.

³LALPA, i hminga kotu che, Israel-ho Pathian ngei chu ka ni tih i hriat theih nân thim zînga rote chu ka pe ang chia, hmun fianrialtea sum thuhrûkte pawh ka pe ang che.

⁴Jakob-ho ka chhiahhlawhte leh Israel-ho ka thlante avâng chuan i hmingin ka ko che a ni; mi hre ngai lo mah la, hming ka saksak ang che.

⁵Kei hi LALPA chu ka ni, a dang rêng rêng an awm lo; keimah lo chu Pathian rêng rêng an awm lo. Keimah lo chu a dang rêng rêng an awm lo tih ni chhuahna lam aṭang leh thlang lam aṭanga an hriat theihna tûrin, mi hre ngai lo mah la, i tai ka hrênsak ang che. Kei hi LALPA chu ka ni, a dang rêng rêng an awm lo.

⁷Eng ka siam ṭhîn a, thim pawh ka siam ṭhîn a ni; remna ka siam ṭhîn a, sualna pawh ka siam ṭhîn a ni; kei hi LALPA, chûng thil zawng zawng ti ṭhîntu chu ka ni,’ tiin.

⁸“Vânte u, chung lam aṭang khân far thlâktîr rawh u, vân dumte khân felna rawn leih thla rawh se; chhandamna an chawr chhuahtîr theih nân lei hi inhawng sela, felna nên ṭo duntîr rawh se. Kei, LALPA hian chu chu ka siam a ni.

⁹“Mahni Siamtu hnialtu chu a chung a pik e! Leia lampei zînga lampei mai mai chu! Hlum chuan a vawtu hnênah, ‘Eng nge i siam ni?’ a ti dâwn em ni? A nih loh leh, i hnathawh chuan, ‘A kutin thiam rêng a nei lo,’ a ti dâwn em ni?

¹⁰A pa hnêna, ‘Eng nge i hrin ni?’ titu leh, a nu hnêna, ‘Eng nge i hrin dâwn ni?’ titu chu an chung a pik e!”

¹¹LALPA, Israel-ho Mi Thianghlima, anmahni Siamtu chuan heti hian a ti: “Thil lo la thleng tûr thu chu mi zâwt ula; ka fapate thu-ah leh ka kut hnathawh thu-ah hian thu min pe rawh u.

¹²Lei hi ka siam a, a chunga mihring awm hi ka siam bawk a. Keiman ka kut ngei hian vân ka kai pharh a, a sipaihote chu thu ka pe bawk a ni.

¹³Kura chu felna neiin ka kai harh a, a kawng zawng zawng chu ka tingîl ang; ani chuan ka khawpui chu a siam leh ang a, an tlanna man duh vâng ni lovin, lâwmman duh vâng ni hek lovin, ka salte chu a chhuahtîr ang, sipaihote LALPAN a ti,” tiin.

¹⁴ LALPA chuan heti hian a ti: “Aigupta thawk rimho leh Ethiopia sumdâwng mi leh Seba-ho mi sâng takte chu in hnên lamah an lo kal ang a, in taah an awm tawh ang; nangmahni an zui ang che u, khaidiat bunin a ni an lo kal dâwn ni; tichuan, bawkkhupin chibai an bûk ang che u a, ‘Pathian chu nangmahniah a awm ngei mai, a dang rêng rêng an awm lo; pathian dang rêng rêng an awm lo,’ tiin in hnênah khawngaihna an dîl ang,” tiin.

¹⁵Aw Israel-ho Pathian, Chhandamtu, Pathian inthup ṭhîna chu i ni ngei mai.

¹⁶Mualpho takin an awm ang, a ni, an zain zak takin an awm ang; milem siamtute chu zahnaah chuan an lût tlâng ang.

¹⁷Israel-ho erawh chu kumkhaw chhandamnaa LALPA chhandamin an awm ang; chatuan thleng pawhin in mualphovin in zak hek lo vang.

¹⁸ LALPA, vân siamtu chuan (ani chu Pathian, leilung hi dina siamtu chu a ni; ani chuan leilung hi a tinghet a, engmahlovah a siam lo va, mihring awm nân a din zâwk a ni) heti hian a ti si a: “Kei hi LALPA chu ka ni, a dang rêng rêng an awm lo.

¹⁹A rûkin ram thim hmunah thu ka sawi ngai lo va; Jakoba thlahte hnênah, ‘Engmahlovah mi zawng rawh u,’ ka ti ngai hek lo; kei LALPA hian felna thu ka sawi ṭhîn a, thu dik tak ka hril ṭhîn.

²⁰“Inkhâwm ula, lo kal rawh u; hnam tin zînga hremna pumpelhhote u, lo hnai tlâng rawh u. An thing milem siam chawp keng ṭhîna, mi chhanhim thei hlei lo pathian hnêna ṭawngṭai ṭhîntute chuan hriatna rêng rêng an nei lo.

²¹Sawi ula, rawn tichhuak rawh u; a ni, inberâwn hlawm rawh se. Hmasâng ata tuin nge hriattîr? Hmânlai ata tuin nge sawi? Kei LALPA hian ka tih a ni lâwm ni? Keimah lo chu Pathian dang rêng rêng an awm lo; Pathian fel leh chhandamtu ka ni; keimah lo chu a dang rêng rêng an awm lo.

²²Kâwlkila mi zawng zawngte u, ka lam lo hawi ula, chhandamin awm rawh u; kei hi Pathian ka ni si a, a dang rêng rêng an awm lo.

²³‘Khûp tinrêng chu ka hmaah an ṭhingṭhi tawh ang a, lei tinrêng pawhin ka hnênah chhechhamin thu an tiam tawh ang,’ tiin mahni leh mahni inchhâlin chhia ka chham ta, thu chu felna hlîrin ka kâ aṭangin a chhuak tawh a, a lo lêt leh tawh lo vang.

²⁴Miin, ‘LALPAah chauh felna leh chakna a awm,’ tiin ka hnênah an la sawi ang. Ama hnên ngeiah mi an lo kal ang a, a chunga lungni lo zawng zawngte chu mualpho takin an awm tawh ang.

²⁵Israela thlahte zawng zawng chu LALPAAH chuan a ni, thiam chantîra an awma, LALPA chu an chhuan dâwn ni,” tiin.