Read Mizo_Old_version Isaia 46 Bible Online

Isaia 46 - Mizo_Old_version bible

Isaia 46

¹Bela chu a lo kûn reng a, Neboa chu a lo intihniam reng a; an milemte chu sa chungah leh ran chungah an hlâng a: in thil vah vêlpui ṭhinte chu phurah lek siam a ni a, sa chau tâna phurritah lek siam a ni.

²An lo intihniam rengin, an lo kûn dûn reng a; phurrit chu an chhanhim thei lo va, anmahni ngei pawh chu sala hruaiin an awm ta zâwk a.

³“Aw Jakoba chhûngte leh, Israela chhûngte zînga a la awm chhun zawng zawng, pum aṭanga ka puaka, chhûl aṭanga ka kawm tawhte u, ka thu ngaithla rawh u:

⁴in tarkûn thleng pawhin amaha chu ka ni ang a, in lua kêlsam a ṭo vek thleng pawhin ka pawm ang che u. Keiman ka siam a, keimah vêkin ka pua ang; a ni, kei chuan ka pawm ang a, ka chhanhim ang.

⁵“Thuhmuna ngaih kan nihna tûrin tu nên nge mi tehkhina, tu tlukah nge mi siama, tu nên nge mi tehkhin dâwn?

⁶Iptêa mi rangkachak bun chhuak ṭhîna, tangkaraw bûknaa bûk ṭhînate chuan rangkachak chhertu an ruai a, ani chuan pathianah a siam ṭhîn a; tichuan, an bawkkhup a, a ni, chibai an bûk ṭhîn a.

⁷An kokiah an pu a, an kalpui a, a hmun tûrah chuan an dah ṭhîn a, a ding ta reng a; a awmna ata chu a sawn tawh lo vang. A ni, miin ani chu an au vang a; nimahsela, a chhâng thei si lo vang a, an manganna ata a chhanchhuak thei hek lo vang.

⁸“Aw bawhchhetute u, chu chu hre reng ula, intimipa ula, hre chhuak leh rawh u.

⁹Tûn hma thilte chu hre reng rawh u; kei hi Pathian ka ni a, a dang rêng rêng an awm si lo; kei hi Pathian ka ni, keimah ang rêng rêng an awm lo;

¹⁰keiin a tâwp tûr chu a tîr aṭang rêngin ka sawi ṭhîn a, thil la tih lohte chu hmasâng aṭang rêngin ka sawi ṭhîn; ‘Ka remruat chu a ding chhuak ang a, ka duh zâwng zawng zawng chu ka ti vek ang,’ ka ti a:

¹¹Khawchhak lam ata sava koham tak, ram hla tak ata ka mi ruat chu ka ko va; a ni, ka sawi tawh a, ka hlen bawk ang; ka tum tawh a, ka ti bawk ang.

¹²“Rilru uangthuang, felna hlata awmte u, ka thu ngaithla rawh u;

¹³ka felna chu ka rawn la hnai a, hla takah a awm lo vang, ka chhandamna pawhin rei a rial lo vang; tichuan, ka ropuina Israel-ho tân chhandamna chu Zion-ah chuan ka dah ang.