Read Mizo_Old_version Isaia 47 Bible Online

Isaia 47 - Mizo_Old_version bible

Isaia 47

¹“Aw Babulon fanu nula, chhuk la, vaivutah ṭhu rawh; aw Kaldai fanu, lalṭhutphah tel lovin leiah ṭhu rawh. Awm no leh nuamsa an ti dâwn tawh si lo che a.

²Buh râwt sawmna lungte la la, chhangphut siam rawh. I inkhuhna puan kha dah la, i fên fual kha hlîp la, i ke kha hawng la, luite dai kai rawh.

³I saruak chu khuh lohvin a awm ang a, a ni, i zahmawh chu a lang ang; phuba ka la ang a, mi tu mah ka ren lo vang.”

⁴Min tlantu chu, a hming sipaihote LALPA a ni, Israel-hote Mi Thianghlima chu.

⁵“Aw Kaldai fanu, ngawi rengin ṭhu la, thim hnuaiah lût rawh, ‘Ram tin lalnu’ an ti dâwn tawh lo che a ni.

⁶Ka mite chungah ka thinur a, ka rochan chu ka tibawrhbâng a; i kutah ka pe chia, nang chuan an chungah khawngaihna rêng rêng i lantîr lo va; tarho chungah lam pawh i nghâwngkawl rit tak chu i nghat ta chawrh a.

⁷Tin, ‘Kei hi kumkhuain lalnuah ka awm ang,’ i ti a; chutichuan, chûng thilte chu i rilruin i ngaihtuah lo va, a tâwpna tûr lah chu i hre reng hek lo.

⁸“Chutichuan, nang nun khaw nawm bâwla, ngaihsam taka awma, mahni rilrua, ‘Keimah ka ni, keimah lo chu mi dang rêng rêng an awm lo; hmeithaiah ka ṭhu lo vang a, fate chân thu ka hre hek lo vang,’ titu, hei hi hre rawh:

⁹hêng thil pahnih, fate chânna leh hmeithaina hian ni khat thil thu-ah, mitkhapkâr lovah a tlâkbuak zâwk dâwn che a ni. I dawi hmanna chu tam hlein, i invênna chu tam rei rui mah sela, chûng chu nasa tak maiin i chungah a lo thleng dâwn a ni.

¹⁰I suahsualna chu i ring a, ‘Tu mân min hmu lo ve,’ i ti vei si a; i finna leh i hriatna chuan a tikhawlo chia; ‘Keimah ka ni, keimah lo chu mi dang rêng rêng an awm lo,’ i rilruin i ti bawk a.

¹¹Chuvângin, thil ṭha lo i chungah a lo thleng ang a; a vên dân i thiam lo vang. Vânduaina pawhin a tlâkbuak ang chia; chu chu i tibo thei lo vang. ṭiauna pawh vawilehkhatah i chungah a lo thleng thut ang a, chu chu i hre lâwk lo vang.

¹²I invênna leh i dawi hmanna, i naupan têt ata i intihhah ṭhinnate chu dinpui ta che; i sâwtpui theih dâwn phawta, i hnehpui theih dâwn phawt chuan.

¹³I remruat a tam êm avângin i hah ta a nih hi; tûnah chuan vân semtute, arsi thlîrtute, thla kipa thu hrilh lâwktute chu ding sela, i chunga thil lo la thleng tûrte lakah chuan chhanhim che rawh se.

¹⁴Ngai teh, buhpâwl ang mai a ni ang a, meiin a kâng ang; meialh thiltihtheihna lakah chuan an inchhanhim lo vang; intihlumna tûr meihawl ang a ni lo vang a, ai tûr mei ang pawh a ni hek lo vang.

¹⁵Chutiang chuan i intihhah ṭhinna thilte chu i tân a awm dâwn a ni; i naupan têt ata i laka sumdâwngtute chu mahni kawng ṭheuhvah an vâk bo vang a; chhanhimtu tûr che tu mah rêng rêng an awm lo vang.