Read Mizo_Old_version Isaia 5 Bible Online

Isaia 5 - Mizo_Old_version bible

Isaia 5

¹Ka duh taka thu, grêp huan chungchâng thu chu, ka duh taka tân hlain ka sa teh ang. Ka duh taka chuan tlâng lei ṭha tak maiah grêp huan a nei a;

²a vêlin lei a lai khuar a, a lungte chu a chhar fai a, grêp hrui ṭha ber mi a phun a, a laiah chuan in sâng a sa a, chutah chuan grêp sâwrna khur pawh a lai a; tin, grêp raha rah tûrin a beisei a; nimahsela, grêp suak maiin a lo rah ta zawk a.

³Tûnah hian, aw Jerusalem-a awmte leh Juda mite u, khawngaih takin kei leh ka grêp kâra thu hi min ngaihtuahsak teh u khai.

⁴Ka grêp huanah hian ka tih tawh ang lo liam kha chuan, a chungah eng nge tih leh chuan tûr lo la awm ta ni le? Eng vângin nge, grêp raha rah tûra ka beisei nên khân, grêp suaka a lo rah mai kha ni le?

⁵Tûnah hian ngai teh u, ka grêp huan chunga ka tih tûr chu ka hrilh ang che u: a hlîng pal chu ka la bo vang a, ei zawhin a awm ang; a lung pal chu ka tichim ang a, rah behin a awm ang.

⁶Ka tiram vek ang a; sah novin a awm lo vang a, laih phutin a awm hek lo vang; buar leh hnimhlîngneite a ṭo zâwk ang. Chhûmte pawh a chunga ruah rêng rêng sûrtîr lo tûrin thu ka pe bawk ang.

⁷Sipaihote LALPA grêp huan chu Israela chhûngte hi an ni a, Juda mite hi a kûng duhawm tak chu an ni si a. Rorêlna fel a beisei a; nimahsela, ngai teh, hnehchhiahna a lo awm ta zâwk a; felna a beisei a; nimahsela, ngai teh, mangang au thâwm a lo awm ta zâwk a ni.

⁸Ram lailiah anmahni chauh an awm theihna tûra, mi tel vena hmun rêng rêng awm lo khawp hiala in leh in inzawmtîr zêl leh, lo leh lo inzawmtîr zêl ṭhîntute chung chu a pik e!

⁹Sipaihote LALPA chuan ka bengah heti hian a ti, “Tihtakzetin in tam tak, lian tak tak, mawi pui puite chu, luahtu awm lovin a la ram ang.

¹⁰Grêp huan ṭîn sâwm hmunah bath khat chauh a la haw dâwn a, buh chi homer khat tuhin ephah khat chauh a la haw dâwn si a,” tiin.

¹¹Zu um tûra zîng tak taka thova, uainin a tihruih bûng hma lohva zân rei tak tak thlenga awm ṭhînte chu an chung a pik e!

¹²ṭingṭang leh perhkhuangte, khuangtê leh phênglâwngte, uain nên an ruaiṭhehnaahte chuan an awm ṭhîn a; nimahsela, LALPA hnathawh chu an ngaisâng ṭhîn lo va, a kut thiltih chu an ngaihtuah ngai hek lo.

¹³Chuvângin, ka mite chu hriatna an neih loh avângin sala hruaiin an awm ta a; an mi zahawmte chu an ril a ṭâm a, an mipuite chu tuihâlin an dangro zo ta.

¹⁴Chuvângin, Seol chuan a duhna chu a lo tizau va, a kâ chu teh rual loh khawpin a âng ta a; an ropuina te, an mipui te, an ropui bûng bûngna te, an zînga lâwm taka awmte nên chuan an lût thla ta duah duah a.

¹⁵Mi tête chu tihkûnin an awm a, mi liante chu tihtlâwmin an awm a, chapo mitte chu tihhniamin a awm ta.

¹⁶Sipaihote LALPA erawh chu rorêlnaa chawisânin a awm ta zâwk a, Pathian, Mi Thianghlim chu felnaa tihthianghlimin a awm ta.

¹⁷Tin, berâmnote chu an tlatna hmuna an tla angin an tla dial dial ang a, mi thau pui pui hmun rama thilte chu vâkvaihoten an ei ang.

¹⁸Bumna hruihruala khawlohna hnûka, tawlailîr hruizêna sualna hnûk chu an chung a pik e!

¹⁹“Kan hmuhna tûrin ti thuai sela, a thiltih tûr chu ti rang rawh se; kan hriat theihna tûrin Israel-ho Mi Thianghlima remruat chu lo hnaiin lo thleng rawh se,” ti ṭhîntute chu.

²⁰Thil ṭha lo chu thil ṭha tia, thil ṭha chu thil ṭha lo ti ṭhîna, êng chu thima ngaia, thim chu ênga ngai ṭhîna, thil thlum chu thil khâa ngaia, thil khâ chu thil thluma ngai ṭhîntute chu an chung a pik e!

²¹Mahni ngaiha fingte leh mahni mit hmuha bengvârte chu an chung a pik e!

²²Uain in kawnga mi chak tak, zu chawhpawlh kawnga thahrui nei mite chu an chung a pik e!

²³Tham ei avânga mi sual thiam chantîr ṭhîna, mi fel felna lâksak ṭhîntute chu.

²⁴Chuvângin, meialhin buhpâwl a kâng ral duak duak ṭhîn ang leh, hnim ro chu meialha a tlu zawih zawih ṭhîn angin an zung chu ṭawihna angin a awm ang a, an pâr chu vaivut angin a chho chuai chuai ang; sipaihote LALPA dân chu an duh lohva, Israel-ho Mi Thianghlim thu chu an ngaihnêp avângin.

²⁵Chuvângin, LALPA thin chu a mite chungah a thawk a, a kut chu an chungah a lek a, a vua a; tichuan, tlângte chu a khûr dur dur a, an ruangte chu kawtthlêr laiahte chuan bawlhhlawh ang maiin a awm rem rum a. Chuti kauva a tih pawh chuan a thinur chu a la reh si lo va, a kut chu a la lek ta cheu va.

²⁶Hnam tin hla taka mite tân chhinchhiahna a târ chhuak ang a, kâwlkil ata ko tûrin a faifûk ang; tichuan, ngai teh, anniho chu rang takin an lo kal thuai ang.

²⁷An zîngah tu mah an hah lo vang a, an inchhuih hek lo vang; tu mah an muthlu lo vang a, an muhîl hek lo vang; an kâwnghrên chu phelh dulin a awm hek lo vang a, an pheikhawk chilhna chu a chat hek lo vang;

²⁸an thalte chu zum tak a ni a, an thal ngul zawng zawngte chu kawih sain a awm ṭhup a; an sakawr tinte chu meilung ang maia ngaih a ni ang a, an tawlailîr kête chu ṭhâwngaleivir ang maia ngaih a ni bawk ang.

²⁹An thâwm ri hum hum chu sakeibaknei hâhum ang mai a ni ang a, sakeibaknei vânglaite hâhum ang maiin an ri hum hum ang; a ni, an ri hum hum ang a, an sa seh tûr chu an seh ang a, him takin an kal bopui ang a, chhanchhuaktu tûr tu mah an awm lo vang.

³⁰Chumi niah chuan tuifinriat ri hum hum angin an chungah an ri hum hum ang. Tichuan, miin ram chu an han thlîr chuan, ngai teh, thim leh manganna hlîr a ni a, êng lah chu, chumia chhûmahte chuan tihthimin a awm a.