Read Mizo_Old_version Isaia 50 Bible Online

Isaia 50 - Mizo_Old_version bible

Isaia 50

¹ LALPA chuan heti hian a ti: “In nu mâkna lehkha, ka mâkna chu khawiah nge a awm ni? A nih loh leh, ka leibatnate a tu bera hnênah nge ka hralh che u ni? Ngai teh u, in khawlohnate avângin a ni, hralha in awma, in bawhchhiatnate avângin a ni, in nu pawh kha mâka a awm ni.

²Eng vângin nge ka lo kal khân mi rêng rêng an awm loh le? Eng vângin nge ka koh khân mi chhâng tûr rêng rêng an awm loh le? Ka kut hi tlan thei lo tûrin tihtawiin a awm rêng rêng em ni? A nih loh leh, chhanhim tûrin thiltihtheihna rêng rêng ka nei lo vem ni? Ngai teh u, ka zilhhau chauh pawhin tuipui ka tikang ṭhîn a, luipuite chu ram rovah ka siam ṭhîn: tui rêng rêng a awm loh avângin a sanghate chu a uih a, tuihâlin an thi ṭhîn.

³Vân khi thimin ka tuam ṭhîn a, saiip puana khuhna tûrin ka siam ṭhîn,” tiin.

⁴“Mi hah tak chu thua ka tihhahdam thiam nân Lalpa PATHIAN chuan zirtîrte lei mi pe a; ani chuan a tûk a tûk tin a kai harh a, zirtîrten an hriat anga hre tûrin ka beng hi ka kai harh ṭhîn.

⁵Lalpa PATHIAN chuan ka beng mi tih-âwngsak a, kei chu ka hel lo va, ka hawi kîr hek lo.

⁶Ka hnungzâng hi vawtute hnênah ka dawh a, ka biangte hi hmul pawttute hnênah ka dawh bawk a; mualphonaah leh chilah ka hmai ka hup lo.

⁷Lalpa PATHIAN chuan mi ṭanpui dâwn si a; chuvângin, ka zak ngai lo va; chuvângin, meilung ang tlatin ka hawi ṭhîn a, ka mualpho lo vang tih ka hria.

⁸Thiam mi chantîrtu chu a hnai e; tuin nge mi do vang? I ding ve ve ang. Mi dotu chu tu nge ni? Mi rawn hnaih rawh se.

⁹Ngai teh, Lalpa PATHIAN chuan mi ṭanpui ang; tuin nge thiam loh mi chantîr ang? Ngai teh, chûng zawng zawngte chu silhfên angin a la hlui ang a, thîmin a ei chhe vek ang.

¹⁰“In zîngah LALPA ṭiha, a chhiahhlawh thu awih chu tu nge ni? Thima lênga, êng rêng rêng nei lova chuan LALPA hming chu ring sela, a Pathian chungah innghat rawh se.

¹¹Mei chhêma, thingthûtea inhrêng ṭhîn zawng zawngte u, ngai teh u; in meialhah leh in thingthu hâlte zîngah chuan lêng rawh u. Hei hi ka kut aṭanga in la hmuh tûr chu a ni: lungngai taka in la mutna tûr chu.