Read Mizo_Old_version Isaia 51 Bible Online

Isaia 51 - Mizo_Old_version bible

Isaia 51

¹“Felna ûmtute u, LALPA zawngtute u, ka thu ngaithla rawh u: nangmahni chherna lungpui lam leh, khuarkhuruma nangmahni laih chhuahna khur lam kha en rawh u.

²In pu Abrahama lam leh nangmahni hringtu Sari lam en rawh u; ani chu pakhat chauh a nih lai khân ka ko va, mal ka sâwm a, mi tam takah ka siam tâk kha.

³LALPA chuan Zion chu a thlamuan ta si a; a hmun chhe tawhte zawng zawng chu a thlamuan a, a thlalêr chu Eden angin a siam a, a ram ro chu LALPA huan angin a siam bawk a; chutah chuan lâwmna leh hlimna te, lâwm thu sawina leh hla sa thâwm te a awm ang.

⁴“Aw ka mite u, ka thu hi ngaithla ula; aw ka hnamte u, ka thu-ah hian beng lo chhi rawh u: keimah aṭangin dân thu a lo chhuak dâwn si a, mi tin ênna tûrin ka rorêlna chu ka chawlhtîr ang.

⁵Ka felna chu a hnai e, ka chhandamna chu a chhuak tawh a, ka bânte hian mi tin ro a rêlsak ang, thliarkârte chuan mi nghâk ang a, ka bân hi an ring ang.

⁶Vân lamahte khian in mit lên chho ula, hnuai lama leilung chu en rawh u. Vân khi meikhu angin a la zâm ral ang a, leilung hi silhfên angin a la hlui ang, a chhûnga awmte chu chutiang bawkin an la thi ang; ka chhandamna erawh chu kumkhuain a awm ang a, ka felna pawh tihbovin a awm lo vang.

⁷“Felna hretu, ka dân thu thinlunga pai mite u, ka thu ngaithla rawh u; mihringte sawichhiatna hlau suh ula, an hauna che u avângin mangang hek suh u.

⁸Thîmin silhfên a ei chhe vek angin, anni chu a ei chhe vek dâwn si a, sûlrûlin sahmul a ei angin anni chu a ei dâwn a ni; ka felna erawh chu kumkhuain a awm ang a, ka chhandamna chu chhuan zawng zawng thlengin a awm ang.”

⁹Aw LALPA bân, harh la, harh la, chakna inbel rawh; hmânlai, hmasâng chhuante awm laia i harh ang khân harh rawh. Nang hi Rahab sât sawmtu, dragon chhuntu kha i ni lâwm ni?

¹⁰Nang hi tuifinriat, tui thûk zau tak tui tikangtu, tuifinriat mawng thûk chu tlante kal kaina tûr kawnga siamsaktu i ni lâwm ni?

¹¹Tin, LALPA tlante chu an kîr leh ang a, hla sa chungin Zion chu an thleng ang a, chatuana lâwmna an lu chungahte a awm tawh ang. Lâwmna leh hlimna an hmu ang a; lungngaihna leh rûmna chu a bo tawh ang.

¹²“Nangmahni thlamuantu che u ka ni a; mihring thi leh mai tûr, hlobet ang lek hi engati nge in hlauh le?

¹³Kei LALPA hi nangmahni siamtu ka ni a, vânte khi kai pharha, leilung nghahchhan siamtu ka nih in theihnghilh ta elo? Engtizia nge nangmahni hnehchhiah duhtute thinur hlau rêng rênga in la awm fo le?

¹⁴Sal hruai bo chu rang taka chhuahin a awm ang a; khuarkhurumah a thi lo vang a, chaw a tlachham hek lo vang.

¹⁵Kei LALPA i Pathian, a fâwnte chu ri hum hum khawpa tuifinriat chawk lettu chu ka ni si a: ka hming chu sipaihote LALPA a ni.

¹⁶Tin, vân khi ka kaih pharh theiha, leilung nghahchhante ka phûm theiha, Zion-ho hnênah, ‘Ka mite in ni e,’ ka tih theih nân ka thute chu i kâah ka dah a, ka kutin ka hûm che a ni.”

¹⁷Aw Jerusalem, LALPA kut ata a thinrimna nova mi in nu, harh la, harh la, tho rawh; nang chuan pai paina no berhbua mi i in a, i in fai kêlh a.

¹⁸A fapa hrin zawng zîngah chuan amah hruaitu tûr tu mah an awm lo va; a fapa châwm len zawng zawng zîngah chuan a kuta chelh tu mah an awm hek lo.

¹⁹Hêng thil pahnih hian a tlâkbuak tâk che hi; tuin nge ṭahpui dâwn che aw? Ṭiauna leh chhiatna te, ṭâm leh khandaihte hian; engtin nge ka thlamuan ang che aw?

²⁰I fapate chu an chau va, sathâr lêna a âwk angin thlêr lu lam zawng zawngah chuan an mu phung a; LALPA thinrimna leh i Pathian zilhhaunain an khat hlawm a ni.

²¹Chuvângin, nang tihretheih leh uain rui ni si lova mi rui, hei hi hre rawh:

²²i LALPA Jehova, i Pathian, a mite thu sawipui ṭhîntu chuan heti hian a ti, “Ngai teh, pai paina no, ka thinrimna no berhbu ngei chu, i kut ata ka la chhuak ta; i in leh tawh lo vang.

²³Nangmah tiretheitute kutah ka dah ang; anni chuan i nunna hnênah, ‘Kan zawh tûr chein bawkkhup rawh,’ an tih kha; tichuan, nangin zawhtute hnênah chuan i hnungzâng chu lei ang leh kawtthlêr angin i dawh kha,” tiin.