Read Mizo_Old_version Isaia 52 Bible Online

Isaia 52 - Mizo_Old_version bible

Isaia 52

¹Aw Zion, harh la, harh la, i chakna inbel rawh; aw Jerusalem, khawpui thianghlim, i silhfên mawi takte chu inbel rawh. Tûn achinah chuan serh tan loh leh mi bawlhhlawh chu i chhûngah an lût tawh dâwn si lo.

²Aw Jerusalem, vaivut i kai kha inthing rawh; tho la, ṭhu rawh! Aw Zion fanu, sala awm, i nghâwng phuarnate kha phelh rawh.

³ LALPA chuan heti hian a ti si a: “Engmahlo atan hralh in ni a; tichuan, tangka lova tlan in ni tawh ang,” tiin.

⁴Lalpa PATHIAN chuan heti hian a ti si a: “Ka mite chu a tîrah chuan Aigupta rama awm tûrin an chhuk a; tin, Assuria miten enga khaw lawilovin an hnehchhiah hlawm a.

⁵Chutichuan, tûnah hetah hian eng nge ka tih dâwn? Ka mite hi engmahlova hruai bovin an awm si a,” LALPAN a ti, “An chunga rorêltute chu an ṭê tuar tuar a,” LALPAN a ti, “Ka hming hi nilênga sawichhiatin a awm a.

⁶Chuvângin, ka mite chuan ka hming an hria ang; chuvângin, chumi niah chuan a sawitu chu ka ni tih an hria ang: ‘Ngai teh, keimah hi ka ni,’” tiin.

⁷Tlângahte chanchin ṭha thlena, remna thu tlângaupuia, thil ṭha chanchin ṭha thlena, chhandamna thu tlangaupuia, Zion hnêna, “I Pathian chu lalah a ṭhu,” titu ke chu a va mawi êm!

⁸Chu! I râl vêngtute aw chu! Aw an chhuaha, hlim takin an zai ho chu; LALPA chu Zion-ah a lo kîr leh hunah chuan inhmatawnin an hmu dâwn si a.

⁹Jerusalem hmun chhe tawhte u, hlim chhuak phut ula, hlim takin zai ho rawh u, LALPA chuan a mite chu a thlamuan ta si a, Jerusalem chu a tlan ta a ni.

¹⁰LALPA chuan hnam tinrêngte mit hmuhah a bân thianghlim chu a hlîm ta; tichuan, kâwlkila mi zawng zawngin kan Pathian chhandamna chu an hmu ang.

¹¹Chhuak rawh u, chhuak rawh u, chuta ṭang chuan chhuak rawh u, thil bawlhhlawh rêng rêng dek suh u; a chhûng ata kal chhuak rawh u; LALPA bungbêl kengtute u, thianghlim takin awm rawh u.

¹²Hmanhmawh takin in kal chhuak dâwn si lo va, tlânchhiain in kal dâwn hek lo; LALPA chuan in hma a hruai ang a, Israel-ho Pathian chu in hnudâltu a ni dâwn si a.

¹³Ngai teh, ka chhiahhlawh chuan fing takin a ti ang; chawimawi leh chawisânin a awm ang a, sâng tak maiin a awm ang.

¹⁴A hmêl chu mihring hmêl ai maha tihchhiat a ni a, a pianhmang pawh mihring pianhmang aia tihchhiat a ni bawk, mi tam takin mak an tih ang bawkin;

¹⁵hnam tam takin mak an ti a, lalho pawh mak tiin an dang reng ang; an hmuh ngai loh an hmuin an hriat ngai loh an hria ang.