Read Mizo_Old_version Isaia 54 Bible Online

Isaia 54 - Mizo_Old_version bible

Isaia 54

¹“Aw ching, nang, fa hring ngai lo, hlim takin zai rawh; nang, nau vei ngai lo, hla sa chhuak phutin, au chhuak rawh! Pasal nei mi fate ai chuan khawharnu fate an tam zâwk si,” LALPAN a ti.

²“I puan in hmun chu zauh rawh, i awmnate puan in chung chu kai pharh rawh se; ren suh; i hruite chu tisei la, i kaih marna khente chu tinghet rawh.

³Ding lam leh vei lamah i darh zau dâwn si a; tichuan, i chi thlahte chuan hnam tin an rochung ang a, khawpui ṭiau hnuahte chuan mi an awmtîr leh ang.

⁴Hlau suh, i mualpho dâwn si lo; zak hek suh, mualphovin i awm dâwn si lo; i tleirâwl lai mualphona chu i theihnghilh tawhin, i hmeithaina hmingchhiatna chu i hre reng dâwn tawh si lo.

⁵Nangmah Siamtu chu i pasal a ni si a, a hming chu sipaihote LALPA a ni; Israel-ho Mi Thianghlima chu nangmah tlantu a ni a, ani chu khawvêl zawng zawng Pathian a ni.

⁶“Nupui mâk, rilrua lungngai tak, tlangvâl laia nupui tawh, paih hnu koh leh angin LALPAN a ko che a nih hi,” i Pathianin a ti.

⁷“Mitkhapkâr lek ka ma chia; nimahsela, khawngaihna nasa takin ka hruai leh ang che.

⁸Ka thinur liamin mitkhapkâr i lakah ka hmai ka thup a; nimahsela, kumkhaw ngilneihnain ka khawngaih ang che,” LALPA, nangmah tlantu chuan a ti.

⁹“Chu chu ka tân Nova tuite ang kha a ni si a; ‘Nova tuite chuan lei a chîm pil leh tawh lo vang,’ tia chhia ka chham ang khân, ‘I chungah ka thinur tawh lo vang a, ka zilhhau tawh hek lo vang che,’ tiin chhia ka chham ta a ni.

¹⁰Tlâng liante chu an kal bo vang a, tlâng tête chu sawnin an awm bawk ang; ka ngilneihna erawh hi chu i lak ata a kal bo lo vang a, ka remna thuthlung chu sawnin a awm hek lo vang,” LALPA, a khawngaihtu che chuan a ti.

¹¹“Aw nang tihretheih, tuifâwn vawrh vawrh, thlamuanna nei lo, ngai teh, i lungrem chu lung ṭha miin ka rem ang a, i lungphûmte chu sapphir lungtein ka rem bawk ang.

¹²I chhîp zumte chu rubi lungin, i kawngkhârte chu karbankul lungin, i kulh zawng zawng chu lungmawitein ka siam ang.

¹³Tin, i fate zawng zawng chu LALPA zirtîrin an awm ang a, i fate thlamuanna chu nasa tak a ni ang.

¹⁴Felnaa tihnghehin i awm ang a; hnehchhiahna ata hla takah i awm ang a, i hlau dâwn lo a ni; thil râpthlâk ata hla takah i awm bawk ang a, a hnaih dâwn lo che a ni.

¹⁵Ngai teh, bei tûr chein an la pung khâwm a ni thei e; nimahsela, ka thu a ni lo vang; nangmah bei tûra pung apiangte chu nangmah avângin an tlu ang.

¹⁶Ngai teh, kei chuan thîrdêng, pûm zâpa a hnathawhna tûr hriam chher ṭhîntu chu ka siam a; keimah vêkin tichhe tûrin tichhetu ka siam bawk a ni.

¹⁷“Nangmah beihna tûra hriam chher rêng rêng a sâwt lo vang; lei tinrêng thupawia nangmah rawn khingtute chu thiam loh i chantîr ang. Chu chu LALPA chhiahhlawhte rochan chu a ni a, an felna chu ka hnên ata a ni,” LALPAN a ti.