Read Mizo_Old_version Isaia 55 Bible Online

Isaia 55 - Mizo_Old_version bible

Isaia 55

¹“Hawh u, tuihâl apiangte u, tuiahte hian lo kal rawh u; tangka nei lote pawh, lo kal ula, lei ula, ei rawh u. A ni, lo kal ula, uain leh hnutetui tangka pe lovin, a man pawh pe lovin lei rawh u.

²Chaw ni si lovah eng vângin nge tangka in sên? Puar leh fânna ni si lovah eng vângin nge in tha in sên? Ka thu ngun takin ngaithla ula, thil ṭha chu ei rawh u, in nunna chu thil thauvah chuan hlim rawh se.

³In beng rawn dawh ula, ka hnênah lo kal rawh u. Ngaithla ula, in nunna chu a nung ang; tin, in hnênah kumkhaw thu ka thlung ang, Davida hnêna khawngaihna tiam tlatte chu.

⁴Ngai teh, ani chu mi tin tân hretuah ka ruat a, mi tin tân hruaitu leh hotuah ka ruat a ni.

⁵Ngai teh, i hriat ngai loh hnam chu i ko vang a, nangmah hre ngai lo hnam chu i hnênah an lo tlân ang, LALPA i Pathian avâng leh Israel-ho Mi Thianghlima avâng chuan; ani chuan a chawimawi si chia.”

⁶Hmuh awla a awm lai hian LALPA chu zawng ula, a hnaih lai hian ko rawh u.

⁷Mi suaksual chuan a awm dân chu bânsan sela, mi fel lo chuan a ngaihtuahte chu bânsan bawk rawh se; LALPA hnênah kîr leh rawh se; tichuan, anin a lo khawngaih ang; kan Pathian hnênah kîr leh rawh se, anin a ngaidam nasa khawp dâwn si a.

⁸“Ka ngaihtuahte hi i ngaihtuahte a ni si lo va, i awm dânte chu ka awm dân a ni hek lo,” LALPAN a ti.

⁹“Vân khi lei aia a sâng zâwk angin, ka awm dânte hi in awm dânte aiin a sâng zâwk si a, ka ngaihtuahte pawh hi in ngaihtuahte aiin a sâng zâwk bawk a ni.

¹⁰Ruah leh vûr chu vân aṭangin a sûr ṭhîn a, khi lamah khian a kîr leh ngai lo va, lei hi a châwm zâwk a, thil a ṭotîrin a chawrtîr a, buh chi thehtu hnênah buh chi a pe a, eitu hnênah ei tûr a pe ṭhîn;

¹¹chutiang bawkin ka kâ aṭanga ka thu chhuak chu a awm ang: eng mah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang.

¹²Hlim taka chhuakin, thlamuang taka hruai chhuahin in awm dâwn si a; tlâng liante leh tlâng tête chuan in hmaah hla an sa chhuak phut ang a, phûl thing zawng zawngte chuan an kut an bêng bawk ang.

¹³Hnimhlîngnei aiah fâr a ṭo zâwk ang a, buar aiah lenhmui a ṭo zâwk ang; chu chu LALPA tân hmingṭhatna tûr leh kumkhaw chhinchhiahna, tihborala awm lo tûr a ni ang.”