Read Mizo_Old_version Isaia 56 Bible Online

Isaia 56 - Mizo_Old_version bible

Isaia 56

¹ LALPA chuan heti hian a ti: “Dik takin ro rêl ula, fel takin ti rawh u, ka chhandamna chu a lo thleng dâwn dâwnin, ka felna chu a lo lang dâwn dâwn ta si a.

²Chutiang ti mi leh, chumi pawm tlattu mihring fapa chu, a eng a thâwl e; Chawlhni bawhchhe lova serh ṭhîntu leh, thil ṭha lo rêng rêng ti lo tûra a kut vêng ṭha ṭhîntu chu.”

³Tin, ram dang mi, LALPA zawmtu chuan, “LALPAN a mite lakah mi tihrang ngei ang,” ti suh se; mi tilreh chuan, “Thing ro mai ka nih hi,” ti hek suh se.

⁴“Ka Chawlhnite serha, ka lâwm zâwng thilte thlanga, ka thuthlung pawm tlattu mi tilrehte chungchâng thu-ah chuan LALPAN heti hian a ti si a:

⁵‘An hnênah ka in chhûngah leh ka kulh chhûngahte chuan, fanu leh fapa neite ai mah chuan hriat rengna ṭha zâwk leh hming ṭha zâwk ka pe ang; an hnênah kumkhaw hming, tihboral tawh loh tûr ka pe ang,’ tiin.

⁶Ram dang mite pawh, Chawlhni bawhchhe lova serh ṭhîn leh, ka thuthlung pawm tlat apiang, LALPA rawng bâwl tûr leh, LALPA hming ngaina tûr leh, a chhiahhlawhahte awm tûra LALPA zawm apiangte chu;

⁷anni ngei chu ka tlâng thianghlimah chuan ka hruai ang a, ka ṭawngṭaina inah ka tihlim ang; hâlrala an thil hlante leh an inthawinate chu ka maichâmah chuan lawmin a awm ang; ka in chu mi tinrêng tân ṭawngṭaina in an ti dâwn si a,” tiin.

⁸Lalpa PATHIAN, Israel hnawh chhuahhote hruai khâwmtu chuan, “Hruai khâwm sate bâkah mi dang pawh ka la hruai khâwm ang,” a ti a.

⁹Ramsa zawng zawngte u, a ni, ramhnuaia sa awm zawng zawngte u, ei tûrin lo kal rawh u.

¹⁰A râlvêngtute chu an mit a del a, hriatna nei lo hlîr an ni a; ui aw nei lo hlîr an ni a, an bauh thei lo; mumang neia, mu renga, mut duh mi an ni a.

¹¹A ni, uite chu duhâm tak an ni a, tâwk tih lêm an nei ngai lo; chûng chu berâm vêngtu thil hre thei lote an ni; mahni kawng kawng, mahni hlâwkna lam ṭheuh an hawi hlawm, an zavai maiin.

¹²“Lo kal rawh u, uain ka la ang a; tichuan, zuin kan inthun khat dâwn nia; naktûk chu vawiin ang hi a ni leh ang a, ni ropui nasa deuh mai a ni ang,” an ti ṭheuh va.