Read Mizo_Old_version Isaia 57 Bible Online

Isaia 57 - Mizo_Old_version bible

Isaia 57

¹Mi ṭha an thi a, tu mân pawi an ti lo; Pathian ngaihsak mite pawh an thi a, tu mân chhiatna thleng tûr laka lâk bo an ni tih an ngaihtuah lo.

²Mi fel chu a thi a, thil ṭha lovin a khawih phâk lo va, dik taka ti ṭhînte chu thlamuang takin an khumah an mu siai siai ṭhîn.

³“Nimahsela, nangni dawithiamnu fapa, uire leh nawhchizuar thlahte u, hetah lo hnai rawh u.

⁴Tu nge nuihza siam nân in hman ṭhin le? Tu nge in chhiat khuma, lei in chhuah khum ṭhin le? Nangni sasaw zînga, thing buk hnuai tina intizauthauva, ruam chhûngtea lung khi bulahte naupang that ṭhînte u, bawhchhiatna fa, dâwt theihna thlahte in ni lâwm ni?

⁶Luikawr ruam lung mâm zîngah chuan i chanvo a awm a; chûng, chûngte ngei chu i chanpual chu a ni; chûngte tân ngei chuan thilhlanin mi i leih a, thilpêk i hlan kha. Chûng thilah chuan tihlungawiin ka awm dâwn em ni?

⁷Tlâng sâng zo tak chungah chuan i khum chu i dah a; Moleka hnênah i kal a.

⁸Tin, kawngkhârte leh kawngkabiang phênahte chuan i hriat rengna chu i tung a; ka lakah ni lovin mi dang lakah i inhlîp a, i han chho si a, i khum i zauh va, an hnênah thu i thlung a; an khum chu i hmuhnaah chuan i hmangaih a.

⁹Tin, hriak nên lal hnênah i kal a, i rimtuite chu i ti nasa zual a, i palaite chu hla takah i tîr a, Seol thleng rawkin i intihhniam kha.

¹⁰I kalna kawng sei avâng khân i hah a; nimahsela, ‘Beiseina rêng rêng a awm lo,’ i ti si lo va. I chakna tihharhna i hmu a; chuvângin, i chauh tâk loh kha.

¹¹Tu nge i hlauhva i ṭiha, dâwt i sawi ṭhina, kei mi hriat tâk lohva, i rilrua i ngaihtuah tâk loh le? Rei tak ka ngawi reng lo vem ni? Hlauh pawh mi hlauh loh hi.

¹²I felna thu hi ka sawi ang; i thiltihte zawng i tân eng mah a hnemhnâng lo vang.

¹³I au hunah chuan i milim lâk khâwmte chuan chhanhim che rawh se; nimahsela, anniho chu thliin a la ang a, thawin a lên bo vek ang. Kei mi ringtu erawh chuan ram hi a nei ang a, ka tlâng thianghlim hi a luah ang.”

¹⁴Tin, ani chuan, “Chhûng pâwng rawh u, chhûng pâwng rawh u, kawng buatsaih rawh u, ka mite kawng ata tlûkna tûr chu paih rawh u,” a ti ang.

¹⁵Mi chungnung, chawisân, chatuana awm, a hming Thianghlima chuan heti hian a ti si a: “Kei hmun chungnung leh thianghlimah ka awm a, mi thuhnuairawlhte rilru tiharh tûr leh inchhîr ngawih ngawihte thinlung tiharh tûrin, mi, rilrua inchhîr ngawih ngawiha thuhnuairawlh tak hnênah pawh ka awm a ni.

¹⁶Kumkhuain ka do dâwn si lo va, ka thinur fo dâwn hek lo; chutichuan, mi rilru ka hmaah a chau vang a, nunna ka siamte pawh chu an chau bawk ang.

¹⁷A duhâma a khawlohna avângin ka thin a ur a, ka vua a, ka hmai ka hup a, ka thin a ur a ni; ani lah chu a thinlung awm dân pângngaiah luhlul takin a awm zêl a.

¹⁸A awm dânte chu ka hmu a, amah chu ka tidam ang; ka hruai bawk ang a, amah leh a sûnpuitute hnênah thlamuannate ka pe leh ang.

¹⁹Kei chuan hmui rah ka siam ṭhîn a: ‘Remna, remna, hla taka awm hnênah leh hnai taka awm hnênah chuan awm rawh se,’” LALPAN a ti, “Ani chu ka tidam ang.”

²⁰Mi suaksualte erawh chu tuifinriat fâwn fâwn ṭhîn ang chu an ni; an awm hle hle thei si lo va, a tuite chuan bawlhhlawh leh chirhdiak a vawrh chhuak ṭhîn.

²¹Ka Pathian chuan, “Mi suaksualte tân chuan muanna rêng rêng a awm lo,” a ti a.