Read Mizo_Old_version Isaia 58 Bible Online

Isaia 58 - Mizo_Old_version bible

Isaia 58

¹“Ring takin au rawh, inren suh, tawtawrâwt angin i aw chhuah tuar tuar la, ka mite hnênah an bawhchhiatna chu hrilh la, Jakoba chhûngte hnênah an sualnate hrilh bawk rawh.

²Anni chuan zawn zawng ni tin mi zawng ṭhîn a, ka kawng thute hriat zawng an châk ṭhîn; fel taka ti leh an Pathian rorêlna bânsan ngai lo hnam angin ka hnênah rorêlna fel tak mi dîl ṭhîn a, Pathian rawn hnaih pawh an châk ṭhîn a ni.

³“ ‘Eng vângin nge chaw kan ngheia, i hmuh si loh? Eng vângin nge kan intihretheiha, i hriat si loh?’ an ti ṭhîn. Ngai teh u, in chaw nghei ni chuan nangmahni nawmsak in bâwl a, in hnathawktute zawng zawng in hnehchhiah ṭhîn.

⁴Ngai teh u, innghirnghona leh inhnialna tûr leh, suahsualna kuttuma inchûm tûrin a ni, chaw in nghei ṭhin ni. In aw hi chung lama hriattîr tlâkin chumi ni chuan chaw in nghei ngai lo.

⁵Chutiang chu chaw ngheina ka duh zâwnga chu em ni? Mi a intihretheihna tûr ni a ni em ni? Phûngladin anga a lu kûn tûr leh, a hnuaia saiip puan phaha vut phul tûr em ni? Chûng chu chaw ngheina leh LALPA tâna ni lawm tlâk i ti dâwn em ni?

⁶Hei hi chaw ngheina ka duh zâwnga chu a ni lâwm ni: nghâwngkawl hruite hlihsak leh, hnehchhiahho chhuahtîr leh, nghâwngkawl tinrêng tihtliahsak hi?

⁷Mahni chaw rilṭâmte hnêna sem leh, rethei hnawh chhuahho mahni ina hruai hi a ni lâwm ni? Mi saruak hmuha puan vawm leh, mahni tisa ang pu laka bihrûk loh hi a ni lâwm ni?

⁸“Chumi hunah chuan i êng chu zîng ni chhuak angin a lo chhuak ang a, i damna tûr chu a lo chawr chhuak thuai ang; i felna chuan i hma a hruai ang a, LALPA ropuina chu i hnudâltu a ni ang.

⁹Chumi hunah chuan i ko vang a, LALPAN a chhâng ang; i au vang a, anin, ‘Heta hi ka awm,’ a ti ang. In zîng ata nghâwngkawl te, zungṭanga mi kawh te, sual taka ṭawng te hi i tihbova,

¹⁰rilṭâmte tân i inphala, tihretheihte i tihtlai bawk chuan, i êng chu thim zîngah a êng chhuak ang a, i thim mupna chu chhûn ang a ni tawh ang.

¹¹Tin, LALPA chuan a hruai zel ang chia, hmun rovah pawh a titlai ang chia, i ruhte pawh a tichak bawk ang; tin, huan tuia châwm ang leh, tuihna kang ngai lo ang i ni tawh ang.

¹²Tichuan, i laka lo la chhuak tûrte chuan hmun hlui chhe tawhte chu an rem leh ang a; chhuan tam tak lungphûmahte chuan i rem chho leh ang; tichuan, nang chu, ‘A chhe lai siamṭhatu,’ ‘Mi awmna tûra kawngte siamṭhatu,’ an ti ang che.

¹³“Chawlhni bawhchhe lo tûra, ka ni thianghlima i duh zâwng ti lo tûra i kephah chu i hawi kîrtîra, Chawlhni lâwmawm i tiha, LALPA ni thianghlim chu zahawm i tiha, mahni kawng zawng lova, mahni nawmsak bâwl lova, mahni thu sawi lova i chawimawi chuan,

¹⁴LALPA chungah chuan i lâwm ang a; leilung hmun sângahte chuan ka chuantîr ang chia, i pu Jakoba rochun thilin ka châwm ang che.” LALPA kâ chuan chu chu a sawi tawh a ni.