Read Mizo_Old_version Isaia 59 Bible Online

Isaia 59 - Mizo_Old_version bible

Isaia 59

¹Ngai teh u, LALPA kut chu chhandam thei lo tûrin tihtawiin a awm lo va; a beng chu hre thei lo tûrin a ngawng hek lo.

²In khawlohnate chu nangni leh in Pathian kâra tlain a tiṭhen zâwk che u a, benga a hriat duh lohna tûrin in sualnate chuan a hmai chu a hliahsak bawk che u a ni.

³In kutte chu thisena tihbawlhhlawhin a awm a, in kutzungṭangte lah khawlohnaa tihbawlhhlawhin a awm si a; in hmuite chuan dâwt a sawi a, in lei chu suahsualna thu sawiin a phun nuah nuah ṭhîn.

⁴Tu mân dik takin thupawi an sawi lo va, tu mân thu tak takin thu an sawipui ngai lo. Boruak mai mai hi an ring a, dâwt an sawi ṭhîn a; thil sual tih duhna an pai a, khawlohna an hring ṭhîn.

⁵Rûlmuk tuite an awp keu va, maimawm rîl puan an tah ṭhîn; an tui eitute chu an thi ṭhîn a, tihkeha awmah chuan rûl a lo chhuak ṭhîn.

⁶An maimawm rîl puan chu silhfênahte a chang lo vang a, an thiltihte chu an inbel hek lo vang; an thiltihte chu khawlohna thiltihte a ni a, thil râwng taka tihna chu an kutah a awm bawk a.

⁷An kete chu thil ṭha lo lamah a tlân ṭhîn a, pawisawi lo thisen chhuah tûrin an hmanhmawh ṭhîn; an ngaihtuahte chu khawlohna ngaihtuahnate a ni ṭhîn a; ṭiauna leh chhiatna chu an kawngahte a awm ṭhîn.

⁸Thlamuanna kawng an hre lo va, an kalnaahte chuan dikna rêng rêng a awm ngai lo; an tân kawng kawite an siam a; chuta kal apiang chuan thlamuanna an hre ngai lo.

⁹Chuvângin, rorêlna chu keimahni aṭanga hla takah a awm ṭhîn a, felna chuan min ûm phâk ngai hek lo; êng kan nghâk ṭhîn a; nimahsela, ngai teh, thim a lo ni ṭhîn; ênna kan nghâk ṭhîn a; nimahsela, thim mupah bawk kan kal ṭhîn.

¹⁰Mitdel angin bang kan dap dun dun ṭhîn a, a ni, mit nei lote angin kan dap dun dun ṭhîn; thimhlim ang maiin chhûnah kan inchhuih ṭhîn a; mi chakte zîngah chuan mitthi ang mai kan ni.

¹¹Savawmte angin kan zain kan hûk dur dur ṭhîn a, ṭhurote angin nasa takin kan rûm nghuat nghuat ṭhîn; rorêlna kan nghâk ṭhîn a; nimahsela, a awm hauh si lo va; chhandamna kan nghâk ṭhîn a; nimahsela, keimahni aṭangin hla takah a awm ṭhîn.

¹²Kan bawhchhiatnate hi i hmaah a pung ta si a, kan sualnate hian min hêk ṭhîn a ni; kan bawhchhiatnate hi kan hnênah a awm reng si a, kan khawlohnate zawng kan hria a ni:

¹³kan bawhchhiat te, LALPA kan phatsan te, kan Pathian zui zêl lova kan hawisan te, hnehchhiah thu leh hel thu kan sawi te, dâwt thu kan paia, thinlung ata kan sawi chhuah ṭhinte hi.

¹⁴Tichuan, rorêlna chuan hnung lam min hawisan a, felna chuan hla takah min dinsan ta; thutak chu kawtthlêrah a tlu reng si a, dikna chu a lût thei lo a ni.

¹⁵A ni, thutak a awm ta lo va; thil ṭha lo bânsantu chu râllâkah a insiam ṭhîn; tichuan, LALPAN chu chu a hmu a, rorêlna rêng rêng awm ta lo chuan a tilungni ta lo va.

¹⁶Tin, mi rêng rêng an awm lo tih a hria a, dîlsaktu rêng rêng an awm lo chu mak a ti a; chuvângin, ama bân ngei chuan chhandamna a insiam a; ama felna ngei chuan a inchelh ding ta a.

¹⁷Tin, felna chu âwmphawah a ha a, chhandamna lukhum a khum a; tin, inthuamnaah chuan phuba lâkna silhfênte chu a inbel a, kawrfualah chuan ṭhahnemngaihna a ha a.

¹⁸An thiltihte angin, an thiltihte ang ngeiin ani chuan a thungrûl ang, amah dotute chu thinrimnain, a hmêlmate chu thungrulhnain a thungrûl ang a, thliarkârte chu thungrulhnain a thungrûl ang.

¹⁹Chutichuan, LALPA hming chu thlang lam aṭangin an ṭih ang a, a ropuina chu ni chhuahna aṭangin an ṭih bawk ang; ani chu tui lian thut, LALPA thawa chhêm luan vut vut angin a lo kal dâwn si a.

²⁰“Zion-ah chuan tlantu a lo kal ang a, Jakob-ho zînga bawhchhiatna hawisantute hnênah pawh a lo kal ang,” LALPAN a ti.

²¹“Kei zawng, hei hi a ni, an hnêna ka thuthlun chu ni,” LALPAN a ti: “Ka thlarau i chunga awm leh, ka thu i kâa ka dahte chuan, tûn achinah chatuan thleng pawhin i ka chu an chhuahsan lo vang a, i thlahte ka chu an chhuahsan hek lo vang a, i thlahte thlah lehchhâwng ka pawh tûn aṭanga kumkhuain an chhuahsan hek lo vang,” LALPAN a ti.