Read Mizo_Old_version Isaia 6 Bible Online

Isaia 6 - Mizo_Old_version bible

Isaia 6

¹Lal Uzia a thih kum khân Lalpa chu lalṭhutphah sâng tak chawisâna a ṭhu ka hmu a, a silhfên hmâwr fual chuan biak in chu a tikhat ta vek a.

²A kiangah chuan seraf-te an ding a, thla paruk an nei ṭheuh va: an thla pahnihin an hmai an khuh a, pahnihin an kephahte an khuh a, pahnihin an thlâwk a.

³Tin, “Sipaihote LALPA chu a thianghlim e, a thianghlim e, a thianghlim e; lei pum pui chu a ropuinain a khat,” tiin an inau tawn an inau tawn ṭhîn a.

⁴Tichuan, a autu au thâwmah chuan a kawngka bul lungphûm lamin a nghîng ta dur dur a, in chu meikhuin a khat ta a.

⁵Chu veleh, kei chuan, “Hmui bawlhhlawh pu mi ka niha, hmui bawlhhlawh pu mite zînga awm ka nih avângin ka chung a va pik êm! Ka boral ta a nih hi; ka mitin Lal, sipaihote LALPA chu a hmu ta si a,” ka ti a.

⁶Chutichuan, seraf pakhat, maichâm ata chaicheha a cheh, meiling kengin ka hnênah a lo thlâwk a,

⁷ka ka a han dep a, “Ngai rawh, hei hian i hmui a tawk ta; tichuan, i khawlohna lâk bo a ni ta a, i sual pawh tlen fai a ni ta,” a ti a.

⁸Tin, “Tu nge ka tirh ang a, tu nge kan tân kal ang?” tiin Lalpa aw chu ka hria a.

⁹Tichuan, keiin, “Kei heta hi ka awm, mi tîr ta che,” ka ti a. Tin, ani chuan, “Kal la, he chite hi hrilh rawh: ‘Bengin a hriat zawng hria ula, a ngaihna erawh chu hre suh u; a hmuh chu hmu ula, hriat erawh chu hre suh u,’ tiin.

¹⁰He chite thinlung hi tithau la, an bengte tingawng la, an mitte maimitchhîntîr rawh; chuti lo chuan, an mitin an hmu ang a, an bengin an hria ang a, an thinlungin an hre bawk ang a, an hawi kîr leh ang a, tihdamin an awm dah ang e,” a ti a.

¹¹Tin, kei chuan, “Lalpa, eng chen nge ni ang?” ka ti a. Tin, ani chuan a chhâng a, “Khawpuite mihring awm awm lova a rama, inte urtu awm lova ram chu a ṭiau veka,

¹²Lalpan mite chu hla taka a sawna, ram chhûngah hmun kalsan hnu tam tak a awm hma loh chuan.

¹³Tin, a chhûngah chuan sâwm zîngah pakhat pawh la awm sela, ei zawhin an awm leh nghâl ang; nimahsela, ṭhîl leh sasua kih hnua a bul a la awm reng ṭhîn angin, chi thianghlim chu a bul la awm reng chu a ni,” tiin.