Read Mizo_Old_version Isaia 61 Bible Online

Isaia 61 - Mizo_Old_version bible

Isaia 61

¹“Thuhnuairawlhte hnêna chanchin ṭha hril tûra LALPAN hriak mi thih avângin, Lalpa PATHIAN thlarau chu ka chungah a awm; ani chuan, thinlung lungchhiate tuam tûr te, salte hnêna chhuahna thu leh mi tângte hnêna tân in hawnna thu sawi tûr te,

²LALPA lungawi kum thu leh kan Pathian phuba lâk ni thu sawi tûr te, lungngai zawng zawng thlamuan tûr te,

³vut aiah pangpâr ṭhi hrui te, lungngaih aiah hlimna hriak te, nguina thlarau aiah fakna silhfên te an hnêna pêkah, Zion-a lungngaia awmte tân ruat tûr tein mi tîr a ni; ani chu chawimawia a awmna tûrin, felna thing, LALPA phunte, tih an nih theih nân.”

⁴Tin, hmun hlui chhe tawhte chu an rem leh ang a, tûn hmaa khaw lo ṭiau tawhte chu an din ṭha leh ang a, khawpui chhe tawh, chhuan tam tak ṭiaunate chu an siam ṭha leh ang.

⁵Tin, ram dang mite chuan in ran rualte chu dingin an tlattîr ang a, hriat ngai loh mite chu in leilettuahte leh in grêp hrui enkawltuahte an awm ang.

⁶Nangni erawh chu “LALPA puithiamte” tia vuahin in awm ang a, miten “Kan Pathian rawngbâwltute” an ti ang che u. Hnam tin sum in ei ang a, an ropuina chu in inchhuan phah ang.

⁷In mualpho aiah a leh hnih in hmu ang a, in zah aiah in chanvovah hlimin in zai ang; chutichuan, in ramah chuan a leh hnih in luah ang a; kumkhaw hlimna in hnênah a awm ang.

⁸Kei LALPA hian rorêlna fel ka ngaina si ṭhîn a ni; tichuan, anmahni ka rulhna chu tihtakmeuhvin an hnênah ka pe ang a, an hnênah kumkhaw thu ka thlung bawk ang.

⁹An thlahte chu hnam tin zîngah hriat an ni ang a, an fate chu mi tin zîngah hriat an ni bawk ang. Anmahni hmu apiangin LALPA malsâwm chi an ni tih an hria ang.

¹⁰ LALPA-ah chuan nasa takin ka hlim ang a, ka nunna hi ka Pathianah chuan lâwm takin a awm ang; mo neitu chu pangpâr ṭhi hruia a inchei ṭhîn ang leh, mo chu a incheinatea a inchei ṭhîn ang hian, ani chuan chhandamna silhfênte mi bel a, felna kawrfualin mi tuam ta si a.

¹¹Leilungin a thil chawr a chhuahtîr ang leh, huanin a chhûnga thil chînte a chawrtîr ang hian, Lalpa Pathian chuan felna leh fakna chu hnam tinrêng hmaah a chawrtîr dâwn si a.