Read Mizo_Old_version Isaia 62 Bible Online

Isaia 62 - Mizo_Old_version bible

Isaia 62

¹A felna chu ênna anga a chhuaha, amah chhandamna chu khâwnvâr alh anga a chhuah hma loh chuan, Zion avângin ka ngawi reng lo vang a, Jerusalem avângin ka awm hle hle lo vang.

²Hnam tinin i felna chu an hmu ang a, lal zawng zawngin i ropuina chu an hmu bawk ang; hming thar, LALPA kâin a vuah tûr chuan an ko vang che.

³LALPA kuta mawina lallukhum leh i Pathian kuta ropuina lukhum i ni bawk ang.

⁴“Mâk” an ti leh tawh lo vang che; i ram pawh chu “Tihṭiau” an ti leh tawh hek lo vang; “Duhlai” an ti tawh zâwk ang chia, i ram pawh chu “Pawmlai” an ti bawk ang; LALPA i chungah a lâwm si a, i ram pawhin pasal a nei dâwn a ni.

⁵Tlangvâlin nula nupuia an nei ṭhîn ang hian i fapaten nupuiah an nei ang che; mo neitu chu mo chungah a lâwm angin, i Pathian chu i chungah a lâwm ang.

⁶Aw Jerusalem, i kulh chungah râlvêngtute ka vêntîr a; a chhûn a zânin eng tikah mah an ngawi lo vang. Jerusalem hi a tihngheha, leiah hian fakawma a siam hma loh chuan, nangni LALPA hriatpuitua awmte u, awm hle hle hlek suh ula, amah pawh chu awm hle hletîr hlek suh u.

⁸LALPAN, “I buh chu nangmah dotute chawah a pe leh tawh hauh lo vang a, ram dang miten i thawh chhuah uain chu an in tawh lo vang; a sengtute chuan an ei tawh zâwk ang a, LALPA chu an fak ang; a lotute chuan ka hmun thianghlim hung chhûng kawtlaiah chuan an in tawh ang,” tiin, a kut ding lam leh a bân chak tak chhâlin chhia a chham ta.

¹⁰Chhuak ula, kulh kawngkaahte chhuak rawh u! Mite tân kawng buatsaih ula; chhûng pâwng ula, lamlian chu chhûng pâwng rawh u! Lungte chu chhar fai ula; mite tân chhinchhiahna târ chhuak rawh u.

¹¹Ngai teh u, LALPAN kâwlkil thlengin heti hian a hriattîr a ni: “Zion fanu hnênah heti hian sawi rawh u, ‘En teh, nangmah chhandamna a lo thlen dâwn hi; en teh, a lâwmman chu a hnênah a awm hi, a rulhna chu a hmaah a awm bawk a,’ ” tiin.

¹²Tichuan, anni chu - Mi thianghlimho, LALPA tlante, an ti ang a; nang chu - Zawn chhuah, Kalsan loh khawpui, an ti ang che.