Read Mizo_Old_version Isaia 63 Bible Online

Isaia 63 - Mizo_Old_version bible

Isaia 63

¹Edom ram aṭanga lo kal, Bozra khua aṭanga silhfên tihsen sin saw tu nge ni? A puan sina ropui tak, nasa taka chakna nêna lo kal saw? “Keimah, fel taka thu sawia, chhandam kawnga mi chak taka kha ka ni.”

²Eng vângin nge i puan sin kha a sena, i silhfênte pawh kha grêp sâwrna khura rap sâwrtu silhfên anga a awm ni?

³“Keimah chauhvin grêp sâwrna khurah ka rap sâwr a, mipui zîng aṭangin mi pakhat mah ka hnênah an awm ve lo. Anni chu ka thinurin ka rap a, ka thinrimin ka chîl a; an nunna thisen chu ka silhfênahte hian thehin a awm a, ka puan zawng zawng hi ka tibawlhhlawh ta a.

⁴Phuba lâk ni chu ka thinlungah a awm a, ka mi tlante kum chu a lo thleng ta bawk si a.

⁵Ka han en a, ṭanpuitu tûr rêng rêng an awm lo va, chelh dingtu rêng rêng an awm lo chu mak ka ti a; chuvângin, keima bân ngei hian chhandamna mi thlen a, ka thinrimna chuan mi chelh ding ta a.

⁶Mi tin chu thinrimin ka rap bet a, ka thinrimin ka tirui a, an nunna thisen chu leiah ka leih baw ta.”

⁷ LALPAN thil engkima min vûr avângin, LALPA ngilneihzia thute leh LALPA fakna thute ka sawi ang; a khawngaihnate leh a ngilneihna a nasat avângin, Israela chhûngte laka a ṭhatna nasa taka an chunga a vûr thu pawh kha ka sawi bawk ang.

⁸Ani chuan, “Ka mite, fa a dera ti lo tûrte an ni ngei mai,” a ti si a; chutichuan, anmahni chhandamtuah a lo awm ta a.

⁹An manganna zawng zawngah chuan ani chu a mangang ve ṭhîn a, vântirhkoh, a hmaa awm chuan anni chu a chhanhim bawk ṭhîn; a hmangaihna leh a khawngaihnain a tlan ta hlawm a; hmasâng ni zawng zawngah chuan anmahni a puain anmahni a pawm ṭhîn.

¹⁰Nimahsela, an hel a, a Thlarau Thianghlim chu an tilungngai ta a; chuvângin, anmahni dotua awm tûra tihlamlêtin a awm a, amah ngei chuan anni chu a bei ta a.

¹¹Chumi lai chuan a mite chuan Mosia hmasâng nite chu an hre reng a, heti hian an ti: “Tuifinriat aṭanga a berâm rual vêngtute nêna anmahni hruai chhotu kha khawiah nge? A Thlarau Thianghlim an zînga dahtu kha khawiah nge?

¹²A bân ropui tak Mosia ding lama kaltîrtu kha khawiah nge? Kumkhaw hming insiam nâna an hmaa tui tiṭhentu kha khawiah nge?

¹³An inchhuih lohna tûra tui thûk taka, thlalêra sakawr hruai anga anmahniho hruaia kaitu kha khawiah nge?”

¹⁴Ruama ran chhukte angin LALPA thlarau chuan anniho chu a chawlhtîr a; chutiang chuan, hming ropui tak i insiam nân i mite chu i hruai kha.

¹⁵Vân aṭang khân rawn thlîr thla la, i thianghlimna leh i ropuina awmna aṭang khân rawn en teh. I ṭhahnemngaihna leh i chaknate kha khawiah nge? I thinlunga i ngaihna leh i lainatnate kha ka lakah tihrehin a awm ta.

¹⁶Abrahaman min hre lovin, Israela pawhin min ngaihsak lo mah sela, nang chu kan Pa i ni si a; nang chu, aw LALPA, kan Pa i ni a, i hming chu chatuan ata keimahni min tlantu a ni.

¹⁷Aw LALPA, nangin eng vângin nge i kawng aṭangtea min vah botîr ṭhina, nangmah ṭih lo tûra kan thinlung min tihkhauhsak ṭhin le? I chhiahhlawh, i ro luah hnamte avâng hian lo kîr leh rawh.

¹⁸I mi thianghlimte chuan rei lo te chauh an nei a; min dotute chuan i hmun thianghlim chu an rap chhe ta.

¹⁹An chunga ro i rêl ngai lohte ang, i hming pu ngai lote ang chu kan lo ni ta.