Read Mizo_Old_version Isaia 65 Bible Online

Isaia 65 - Mizo_Old_version bible

Isaia 65

¹“Mi lam ngai lote zawnin ka awm a, mi zawng ngai lote hmuhin ka awm a. Ka hming pu lo hnam hnênah chuan, ‘Mi en rawh u, mi en rawh u,’ ka ti a.

²Mi hel hmangte tân nilêngin ka bânte ka phar ṭhîn, chûngho chu anmahni ngaihtuahte ang zêla kawng ṭha lova kal ṭhînte,

³huanahte inthawia, leirawhchan chungahte englo rimtui hâla, ka hmaichhan ngeia mi tithinur ṭhînte,

⁴thlân zîngahte ṭhua, hmun fianrialtea riak ṭhînte, vawksa eia, an bêltea thil tenawm tuihâng âwm ṭhînte,

⁵‘Nangmah chauhvin ding rawh, mi rawn hnaih suh, nang ai chuan ka thianghlim zâwk hi,’ ti ṭhînte chu an ni. Chûngho chu ka hnâra mei khu awm, nilênga mei nung reng ṭhîn chu a ni.

⁶Ngai teh u, ka hmaah ziakin a awm: ka ngawi reng lo vang a, ka thungrûl zâwk ang, a ni, an ângchhûngah nangmahni khawlohna leh in pute khawlohnate chu ka thungrûl ve ve ang,” LALPAN a ti;

⁷“Chûngho chuan tlâng lian chungahte englo rimtui hâlin tlâng tê chungahte ka hming an sawichhe ṭhîn; chuvângin, an hnathawh chu a hmasa berin an ângchhûngah ka tehsak ang.”

⁸ LALPA chuan heti hian a ti: “Grêp bâwrah uain thar an hmu a, miin, ‘Tichhe suh, khatah khân malsâwmna a awm si,’ an ti ang khân, ka chhiahhlawhte avângin ka ti ve ang, an zaa ka tihchhiat vek loh nân.

⁹Jakoba aṭangin chi pakhat ka tichhuak ang a, Juda aṭangin ka tlângte luahtu tûr ka tichhuak ang; ka mi thlante chuan chu chu an luah ang a, ka chhiahhlawhte chu chutah chuan an awm ang.

¹⁰Ka mi, mi zawngtute tân chuan, saron chu berâm rualho huang a ni ang a, Akor ruam chu bâwng rualho bawhna hmun tûr a ni ang.

¹¹Nimahsela, nangni LALPA kalsana, ka tlâng thianghlim theihnghilha, Vânneihna Siamtua tân dawhkân buatsaiha, Chantâwka Khawrêlsaktui tân uain chawhpawlh sa chhûng khat ṭhînte u,

¹²ka koh lai che u khân mi in chhân duh lohva, thu ka sawi lai khân benga in hriat duh lohva, ka mit hmuha thil sual chu in tih zâwka, ka thil lawm loh zâwng chu in thlan avângin, khandaihin in chan tâwka khawrel chu ka siamsak ang che u a, in zain thahnaah chuan in kûn vek ang.”

¹³Chuvângin, Lalpa PATHIAN chuan heti hian a ti: “Ngai teh u, ka chhiahhlawhte chuan an ei ang a, nangni erawh chu rilṭâmin in awm ang; ngai teh u, ka chhiahhlawhte chu an hlim ang a, nangni erawh chu in zak ang;

¹⁴ngai teh u, ka chhiahhlawhte chu thinlunga an lâwm avângin hlim takin an zai ang a, nangni erawh chu thinlunga in lungngaih avângin in ṭap ang a, thlarauva in vui avângin in chiau vak vak ang.

¹⁵In hming chu chhechham nân ka mi thlante hnênah in hnutchhiah ang a, Lalpa PATHIAN chuan a tihlum ang che u; tin, a chhiahhlawhte chu hming dangin a ko tawh ang;

¹⁶chutichuan, leiah hian mahni mal insâwm chawptu chu thutak Pathianah chuan mal a insâwm ang a; leiah hian chhechhamtu chuan thutak Pathian chhâlin chhia a chham ang; tûn hma mangannate chu theihnghilha a awm tâk avâng leh ka mit laka thupa a awm tâk avângin.

¹⁷“Ngai teh u, vân tharte leh lei thar ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang.

¹⁸Nimahsela, ka thil siamah chuan kumkhuain lâwmin hlim rawh u; ngai teh u, Jerusalem chu hlimnaah ka siam a, a mite chu lâwmnaah ka siam a nih hi.

¹⁹Jerusalem chungah chuan ka hlim ang a, ka mite chungah pawh ka lâwm ang; a chhûngah chuan ṭap thâwm chu hriat a ni tawh lo vang a, chiau thâwm pawh hriat a ni tawh hek lo vang.

²⁰Chuta ṭanga chhuak chu nausên ni rei lo tê dam an awm lo vang a, putar a dam chhûng nite tlingtla lo an awm hek lo vang; naupang chu kum za mi niin a thi dâwn si a, mi sual kum za chauh dam chu ânchhe dawng a ni dâwn a ni.

²¹Inte an sa ang a, chûngah chuan an chêng ang; grêp huante an siam ang a, a rah an ei bawk ang.

²²Mi dang awmna tûrin in an sa tawh lo vang a, mi dang eiah grêp huan an siam tawh lo vang. Thing dam chhûng nite ang hian ka mite dam chhûng nite chu a awm dâwn si a, ka mi thlante chu an thawh chhuah chungah chuan rei tak an lâwm dâwn a ni.

²³A thlâwnin an thawk rim lo vang a, vânduaina mai tûrin fa an hring hek lo vang; LALPA malsâwm mi thlahte an ni si a, an fate chu an hnênah an awm ang.

²⁴Heti hi a ni ang a, annin mi koh hma pawhin ka chhâng ang a; thu an la sawi lai mêk pawhin ka bengin ka hria ang.

²⁵Chinghnia leh berâmno chu an tla dûn tawh ang a, sakeibaknei chuan bâwngpa angin buhpâwl a ei tawh ang a, vaivut chu rûl chaw a ni ang. Ka tlâng thianghlim rêng rêngah chuan an tina tawh lo vang a, an tichhe tawh hek lo vang,” LALPAN a ti.