Read Mizo_Old_version Isaia 66 Bible Online

Isaia 66 - Mizo_Old_version bible

Isaia 66

¹ LALPA chuan heti hian a ti: “Vân ka ṭhutphah a ni a, lei ka ke nghahchhan a ni. In eng ang nge mi saksak ang? Khawii hmun nge ka chawlhna tûr chu?

²Hêng thil engkim hi ka kutin ka siam a ni a; chutichuan, hêng thil engkim hi a lo awm ta a ni,” LALPAN a ti. “Amaherawhchu, mi, rethei taka awm, rilrua inchhîr ngawih ngawih, ka thua khûr ṭhîna lam hi ka en zâwk ang.

³Bâwngpa talhtu chu mihring thattu ang a ni a; berâmnova inthawi chu ui nghâwng titliaktu ang a ni a; thilpêk hlântu chu vawk thisen hlântu ang a ni a; beraw hâltu chu milem malsâwmtu ang a ni. Mahni kawng kawng an thlang ta a, an thil tenawmahte chuan an rilru a lâwm ṭhîn;

⁴ka koh lai khân tu mân mi chhân lohva, thu ka sawi lai khân benga an hriat lohva, ka mit hmuha thil sual chu an tih zâwka, ka thil lawm loh zâwng chu an thlan avângin, kei pawhin anmahni bumna tûrte chu ka thlansak ang a, an hlauh zâwngte chu an chungah ka thlentîr ang,” tiin.

⁵A thua khûr ṭhînte u, LALPA thu hi hre rawh u: “In unau, nangmahni hawtu leh ka hming avânga nangmahni hnawt chhuaktute chuan, ‘In lâwmna kan hmuh theih nân LALPA chu tihropuiin awm rawh se,’ an ti a; nimahsela, an zak tawh zâwk ang.”

⁶Chu! Khawpuia sa mur mur thâwm chu! Biak ina thâwm a nih chu! A hmêlmate thungrûltu LALPA thâwm a nih chu!

⁷“Ani chuan vei hman lovin nau a nei a; na hre hman lovin mipa naupang a hring a.

⁸Chutiang chu tuin nge hre ngai? Chutiangte chu tuin nge hmu ngai? Ni khatah ram a piang thut dâwn em ni? Vawilehkhatah hnam hrinin a awm thut dâwm em ni? Zion chuan nau a vei veleh a fate chu a hring ta pang si a.

⁹Pian hun thlentîr siin ka hrintîr dâwn lo vem ni?” LALPAN a ti. “Kei hrintîr ṭhîntu hian fa ka neihtîr phal dâwn lo vem ni?” i Pathianin a ti.

¹⁰“Jerusalem hmangaihtu zawng zawngte u, Jerusalem chu hlimpui ula, lâwmpui rawh u; amah sûntu zawng zawngte u, lâwm avângin hlimpui rawh u;

¹¹in hnêka, thlamuanna hnutêahte chuan in tlai theih nân leh, in hnêk dâka, a ropuina tam takah chuan in lâwm theih nân,” tih hi.

¹²LALPA chuan heti hian a ti si: “Ngai teh u, remna chu luipui ang maiin a hnên thlengin ka luantîr ang a, hnam tin ropuina chu luitê a kuang liam dûl dûl ang maiin a hnên thlengin ka luantîr bawk ang; tichuan, chu chu in hne ang, a hmathlâk ang che u a, a mal chungah chuan a ṭumtîr ang che u.

¹³Mi, a nuin a thlamuan angin ka thlamuan ang che u; tichuan, Jerusalem-ah chuan thlamuanin in awm dâwn nia.”

¹⁴Tin, chu chu in hmu ang a, in thinlung chu a hlim ang a, in ruhte pawh hlobet hring dup angin a duah hluah hluah ang; LALPA kut chu a chhiahhlawhte lamah a awm tih an hria ang a, a hmêlmate chungah a lungni lo vang.

¹⁵Ngai teh u, a thinur chu thinrimnaa hrithla tûr leh, a zilhhauna chu meialhtea hrithla tûrin, LALPA chu mei nên a lo kal dâwn si a, a tawlailîrte chu ṭhâwngaleivir ang mai a ni ang.

¹⁶Meiin a ni, LALPAN a ngaihtuah dâwn ni; khandaihin a ni, mi zawng zawng a ngaihtuah dâwn ni: LALPA tihhlumte chu tam tak an ni ang.

¹⁷“Huanahte inthawi tuma inzui dum dum tûra intithianghlim leh inthian fai ṭhînte, vawksa leh thil tenawm leh chaichîmsa eite chu an boral tlâng ang,” LALPAN a ti.

¹⁸“An thiltihte leh an ngaihtuahte chu ka hre si a. Hnam tinrêng leh ṭawng tinrêng ka hruai khâwm hun a lo thleng dâwn; tichuan, an lo kal ang a, ka ropuina an hmu ang.

¹⁹An zîngah chuan chhinchhiahna ka awmtîr ang a; tichuan, an zînga hremna pumpelh apiangte chu hnam tin hnênah - Tarsis te, Pul te, thal ngul kuaiho Lud hnênah te, Tubal leh Javan-ho hnênah te, thliarkâr hla tak, ka hmingthan la hre ngai lova, ka ropuina la hmu ngai lohote hnênah chuan - ka tîr ang; tichuan, hnam tin zîngah ka ropuina thu an sawi ang.

²⁰Tichuan, Israela thlahten an thilhlan chu bungbêl thianghlim taka LALPA ina an rawn la lût ṭhîn ang hian, LALPA hnêna thilhlan atân hnam tinrêng zîng ata in unaute zawng zawng chu sakawr chungah te, tawlailîrah te, zâwnnaah te, sabengtung chungah te, sanghâwngsei chungah te, Jerusalem ka tlâng thianghlimah chuan an rawn hruai ang,” LALPAN a ti.

²¹“Tin, chûng zînga mi pawh chu puithiam atânte leh Levia mi atânte ka la ang,” LALPAN a ti.

²²“Vân tharte leh lei thar ka la siam tûr chu ka hmaah a awm reng dâwn angin, in thlahte leh in hming chu a awm reng bawk dâwn a ni,” LALPAN a ti.

²³“Tin, heti hi a ni ang a, thla thar aṭanga thla thar dang thlengin, Chawlhni aṭanga Chawlhni dang thlengin mi zawng zawng ka hmaah chibai mi bûk tûrin an lo kal zut zut ang,” LALPAN a ti.

²⁴“Tin, an kal chhuak ang a, ka laka bawhchhetute ruang chu an en ang: an lungte chu a thiin, an mei chu tihmihin a awm dâwn si lo; mi zawng zawng tân thil tenawm tak an ni ang.”