Read Mizo_Old_version Isaia 7 Bible Online

Isaia 7 - Mizo_Old_version bible

Isaia 7

¹Tin, Uzia fa Jothama fapa Ahaza lal lai chuan heti hi a ni a, Suria lal Rezina leh Israel lal Remalia fapa Peka chu Jerusalem rûn tûrin an chho va; nimahsela, an hneh thei lo.

²Tin, Davida chhûngte chu, “Suria chu Ephraim nên an ṭang dûn ta,” tiin an hrilh a. Tichuan, a thinlung leh a khua leh tuite thinlung chu, ramhnuai thingte thliin a tinghîng suau suau ang hian tihnghînin a lo awm ta a.

³Chutichuan, LALPA chuan Isaia hnênah, “Nang leh i fapa Sear-jasuba chu, dîl chhakta zâwk tuilâkna tâwpah, Puansutu Phûl lamlianah chuan, Ahaza hmuak tûrin kal chhuak tawh ula;

⁴a hnênah, ‘Fîmkhur la, awm hle hle rawh; meichher bung khu mai mai pahnih, Suria lal Rezina leh Remalia fapaa thinurna nasa tak chu hlau suh la, i thinlung chu zâm suh se.

⁵“Juda chu han beiin han tibuai ila, chutah chuan kan tân luhna tûr siamin, a lai takah Tabeela fapa chu lalah i ṭhuttîr ang u,” tiin, Suria leh Ephraim leh Remalia fapa chuan an phiar che avângin,

⁷Lalpa PATHIAN chuan heti hian a ti a: “An thu phiar chu a puitling lo vang a, a hlawhtling hek lo vang.

⁸Suria lu chu Damaska a ni a, Damaska lu chu Rezina lek a ni si a. Kum sawmruk leh kum nga ral hmain Ephraim chu chi tih tlâk lohva awm tûrin tihchhiat vekin a awm ang.

⁹Ephraim lu chu Samari a ni a, Samari lu chu Remalia fapa lek a ni si a. In rin duh loh chuan tihnghehin in awm ṭhuai lo vang,” tiin,’ ti rawh,” a ti a.

¹⁰Tin, LALPA chuan Ahaza a be leh a,

¹¹“LALPA i Pathian hnênah chhinchhiahna dîl rawh; Seol thûk tak ata emaw, vân sâng tak ata emaw,” a ti a.

¹²Ahaza erawh chuan, “Ka dîl lo vang, LALPA pawh ka fiah hek lo vang!” a ti a.

¹³Tin, ani chuan, “Aw Davida chhûngte u, tûnah ngaithla teh u; mihring tihhah hi thil tê tak têah in ruat a ni maw, ka Pathian lam pawh tihhah in duh zêl ni?

¹⁴Chuvângin, Lalpa ngei chuan chhinchhiahna a pe ang che u: ngai teh u, nula thianghlim pakhat a rai ang a, fapa a hring ang a, a hmingah Immanuela a sa ang.

¹⁵Ani chuan thil ṭha lo lam duh loh nachâng a hriat hunah leh, thil ṭha lam duh nachâng a hriat hunah chuan bâwnghnute khal leh khawizu a ei ṭhîn ang.

¹⁶Naupang chu thil ṭha lo lam duh loh nachâng leh, thil ṭha lam duh nachâng a hriat hma pawhin lal pahnih i huatate ram chu a ṭiau dâwn a ni,” a ti a.

¹⁷Ephraim chuan Juda a ṭhen ni ata la thleng ngai lo nite chu LALPA chuan i chungah leh, i khua leh tuite chungah leh, i pa chhûngte chungah chuan a thlentîr ang, Assuria lal ngei chu.

¹⁸“Chumi niah chuan heti hi a ni ang a, LALPA chu Aigupta lui tâwp rêttea tho awm leh, Assuria rama khuai awm chu, ko tûrin a faifûk ang.

¹⁹Tichuan, an lo kal ang a, an zain kawr chhe rek rukah te, lungpui pûkah te, hnimhlîngnei zawng zawngah te, ran tlatna hmun zawng zawngah te an fu ang.

²⁰“Chumi niah chuan Lalpan bakmehchem hawh, Luipui piah rama Assuria lal awm chu hmangin, lu leh ke hmul chu a ziat fai ang a; khabe hmul pawh a ziat bo vek ang.

²¹“Tichuan, chumi niah chuan heti hi a ni ang a, mi pakhatin bâwngla pakhat leh berâm pahnih chauh a vulh ang;

²²nimahsela, heti hi a ni ang a, hnutetui tam tak an la pêk dâwn avângin hnutetui khal a ei ṭhîn ang; ram chhûnga la awm apiangin hnutetui khal leh khawizu an ei ṭheuh dâwn si a.

²³“Tin, chumi niah chuan heti hi a ni ang a, hmun tin, grêp hrui sâng, tangkaraw sâng man awmna apiangte chu buar leh hnimhlîngnei hmun mai a ni tawh ang.

²⁴Ram zawng zawng chu buar leh hnimhlîngnei hlîr a lo nih tâk avângin, chutah chuan thal leh thal ngul kengin an kal ang.

²⁵Tin, tlâng, bâwngtuthlawha laih tawh zawng zawngah chuan, buar leh hnimhlîngnei hlauh avângin i kal lo vang a; bâwngchalte tlattîrna leh berâm chîl mai mai atân a ni tawh zâwk ang,” a ti a.