Read Mizo_Old_version Isaia 8 Bible Online

Isaia 8 - Mizo_Old_version bible

Isaia 8

¹Tin, LALPA chuan ka hnênah, “Lehkha ziakna phêk hlai tak la la, mihring kawlawmin a chungah ‘Maher-salal-has-baza tân’ tiin ziak rawh;

²tichuan, hretu rinawm, puithiam Uria leh Jeberekia fapa Zekaria chu hriatpuitu atân ka siam ang,” a ti a.

³Tin, zâwlneinu hnênah chuan ka kal a; tichuan, ani chuan nau a pai a, fapa a hring ta a. Chutichuan, LALPAN ka hnênah, “A hmingah Maher-salal-has-baza sa rawh.

⁴Naupang chuan, ‘Ka nu,’ ‘Ka pa,’ tih nachâng a hriat hmain Damaska hausaknate leh Samari laka râllâk sumte chu Assuria lal hmaah an kal bopui dâwn si a,” a ti a.

⁵ LALPA chuan ka hnênah a sawi leh a,

⁶“Hêng chite hian Silo-a tui dam taka luang dêl dêlte chu an duh loh avâng leh, Rezina leh Remalia fapa chunga an lâwm avângin,

⁷ngai teh, LALPA chuan Luipui tui, khauh tak leh tam tak (Assuria lal leh a ropuina zawng zawng) chu an chungah a luantîr ang; tichuan, a kuang zawng zawng chu a lo liam dûl dûlin, a kam zawng zawngah pawh a liam dûl dûl ang.

⁸Juda-ho ram thlengin a tuam lût dûl dûl ang a, a liamin a luang tlang dûl dûl ang a, nghâwng pawh a chîm phâk hial ang; tin, a thla zâr chuan, aw Immanuel, i ram vâng lam zawng zawng hi a awh vek ang.

⁹“Chi tinte u, buai ta nuai nuai che u, kehsawmin in awm dâwn nia; ram hla taka mi zawng zawngte u, beng chhi rawh u. Inrâlthuam rawh u, kehsawmin in awm dâwn nia; inrâlthuam rawh u, kehsawmin in awm dâwn nia.

¹⁰Inrâwn khâwm rawh u, eng mah a ni hlei lo vang e; thu sawi rawh u, a puitling hlei lo vang e, Pathian kan hnênah a awm si a,” tiin.

¹¹ LALPA chuan kut chak takin heti hian ka hnênah a sawi a, he chite kawngah hian ka kal ve lohna tûrin mi thunun a nih hi:

¹²“He chite hian, ‘Phiar an nei e,’ an tih ṭhin nazawng chu, ‘Phiar an nei e,’ ti ve suh u; an ṭih pawh chu ṭih ve lovin, hlau ve hek suh u.

¹³Sipaihote LALPA, amah ngei chu in tithianghlim tûr a ni; amah chu in ṭiha ni sela, amah chu in hlauhva ni rawh se.

¹⁴Tin, ani chu hmun thianghlim a ni ang a; Israela chhûng hnihte tân erawh chuan tlûkna lung leh dâlna lungpui a ni zâwk ang a, Jerusalem-a awmte tân thang leh fal a ni bawk ang.

¹⁵Tichuan, mi tam takin chu chu an chhuihin an tlu ang a, tihkehin an awm ang a, an âwk ang a, manin an awm ang,” tiin.

¹⁶Hriattîrna thu zial hi phuar la, dân thu hi ka zirtîrte zîngah nemin chhinchhiah rawh.

¹⁷Tin, kei chuan Jakoba chhûngte laka a hmai thuptu LALPA chu ka nghâk ang a, amah chu ka thlîr reng ang.

¹⁸Ngai teh, kei leh LALPA mi pêk naupangte hi, Israel-ho zîngah hian sipaihote LALPA, Zion tlânga awm laka chhinchhiahna atânte leh thil mak atânte kan ni a.

¹⁹Tin, miin, “Ramhuai aienthiam zâwl leh dawithiam hrâm chuap chuap leh phun nuah nuahte chu râwn rawh u,” an tih hunah che u chuan heti hian chhâng rawh u: “Miten an Pathian chu an râwn zâwk tûr a ni lâwm ni? Mi nungte tân chuan mitthi an râwn tûr em ni?

²⁰Dân Thu leh Hriattîrna Thu chu râwn tûr a ni,” tiin. Chumi thu ang zêla an sawi loh chuan an tân khua rêng rêng a vâr ṭhuai dâwn lo a ni.

²¹Mangang tak leh rilṭâm chungin ram chu an fang ang a; tin, heti hi a ni ang a, an ril a ṭâm hun chuan an thin chu a ur êm êm ang a, an lal leh an Pathian chu ânchhia an lawh bawrh bawrh ang a, an vanvadâk vak vak ang.

²²Tin, lei lam an en ang a, manganna leh thimna, thlaphân nguina chu an hmu ang; tichuan, thim chhah mupah hnawh bovin an awm ang.