Read Mizo_Old_version Isaia 9 Bible Online

Isaia 9 - Mizo_Old_version bible

Isaia 9

¹Nimahsela, thlaphânga awm tawhi tân chuan nguina rêng rêng a awm tawh lo vang. Hmânlai chuan Zebulun ram leh Naphtali ram chu hmuhsitawmin a awmtîr a; nimahsela, hun hnuhnûngah chuan ropui takin a awmtîr ta, dîl kamah, Jordan râlah, hnam tin Galili chu.

²Mi, thim hnuaia kalte chuan êng nasa tak an hmu ta; thihna hlim rama awmte chungah ngei chuan êng chu a lo êng ta.

³Hnam chu i titam ta a, an hlimna pawh i tipung ta; buh seng laia hlim angin i hmaah an hlim ta a, miin râllâk sum an sema an hlim ang maiin.

⁴A ritphurhna nghâwngkawl leh a kokia zâwn fung, a hnehchhiahtu talhtum chu, Midian-ho hneh ni ang khân i tihtliahsak ta si a.

⁵Indona hmuna mi râlthuama an inthuamna zawng zawngte leh an silhfên thisen kai hniang hnuangte chu hâla tuah ral tûr lek a ni si a.

⁶Kan tân Naupang a lo piang a, Fapa pêkin kan awm ta a; rorêlna chu a kokiah a chuang ang a: a hmingah chuan Maka, Remruattua, Pathian Chaka, Chatuan Pa, Remna Lal, an ti dâwn si a.

⁷A ram a zau zêl ang a, a ramah remnain tâwpintai a nei lo vang; Davida lalṭhutthlêngah a ṭhu ang a, dik tak leh fel taka rorêlin a rawn tinghet ang, tûn aṭanga kumkhuain. Sipaihote LALPA ṭhahnemngaihna chuan chûng chu a ti ang.

⁸Lalpa chuan Jakob-ho ramah thu a thawn a, Israel-ho chungah a tla ta a.

⁹Tichuan, mi zawng zawng, Ephraim-ho leh Samari-a awm, chapo tak leh rilrua uangthuang taka,

¹⁰“Leirawhchante chu chim mah sela, lung chang chherin kan rem mai ang; theipui thingte chu sah chhumin awm mah sela, sidar thingtein kan thlâk mai ang,” titute chuan an la hria ang.

¹¹Chuvângin, LALPA chuan Rezina dotute chu amah do tûrin a chawisâng ang a;

¹²a hmêlma, a hma lama Suria-hote, a hnung lama Philistia-hote chu a chawk tho vang; tichuan, kâ ângin Israel-ho chu an ei zo vang. Chuti kauva a tih pawh chuan a thinur chu a la reh si lo va, a kut chu a la lek ta cheu va.

¹³Nimahsela, mite chuan anmahni vawtu lam chu an hawi chuang si lo va, sipaihote LALPA chu an zawng chuang hek lo.

¹⁴Chuvângin, LALPA chuan Israel-ho aṭang chuan a lu leh a mei, tûmkau leh phûngladin ang maiin ni khat thilah a chhawk vek ang.

¹⁵Upa leh mi zahawmte chu a lu chu an ni a; dâwt zirtîr ṭhîn zâwlneite chu a mei chu an ni.

¹⁶Hêng mite hruaitute hian an hruai sual ṭhîn a ni; an hruaiate chu tihboralin an awm ṭhîn.

¹⁷Chuvângin, Lalpa chu an tlangvâlhote chungah a lâwm lo vang a, an fahrahte leh hmeithaite chu a khawngaih hek lo vang; an zain Pathian zah lo mi leh thil ṭha lo titute an ni ṭheuh va, kâ zawng zawng chuan thu lawilo a sawi ṭheuh si a. Chuti kauva a tih pawh chuan a thinur chu a la reh si lo va, a kut chu a la lek ta cheu va.

¹⁸Suahsualna chu mei angin a alh hluah hluah si ṭhîn a; buar leh hnimhlîngneite chu a kâng ral ṭhîn, a ni, ramhnuai thing bit zîngahte chuan a kâng hluah hluah a, a khu chho ngut ngut ṭhîn.

¹⁹Sipaihote LALPA thinur avângin ram chu a kâng chhia a, mite pawh chu meia tuah tûr thing ang an ni a; tu mân mahni unau pawh an zuah lo.

²⁰Tichuan, miin an ding lama mi an chuh ang a, an ril a la ṭâm cheu vang; an vei lama mi an ei ang a, an tlai chuang lo vang; mi tinin mahni bân tî an ei ṭheuh vang.

²¹Manase-hovin Ephraim-ho an ei ang a, Ephraim-hovin Manase-ho an ei ang; tin, an pahnih chuan Juda-ho an do dûn ang. Chuti kauva a tih pawh chuan a thinur chu a la reh si lo va, a kut chu a la lek ta cheu va.