Read Mizo_Old_version Leviticus 1 Bible Online

Leviticus 1 - Mizo_Old_version bible

Leviticus 1

¹ LALPAN Mosia a ko va, inbiakna puan in aṭangin a bia a,

²“Israela thlahte chu bia la, an hnênah, ‘In zînga tu pawhin LALPA hnêna thilhlan in hlanin, ran, bâwng rual zînga mi emaw, berâm leh kêl zînga mi emaw in hlân tûr a ni.

³“ ‘A thilhlan chu bâwng rual zînga mi, hâlral thilhlan a nih chuan a pa, sawisêl bo a hlân tûr a ni; a thilhlan chu LALPA hmaa pawm a nih theih nân inbiakna puan in kawngka bulah a hlân tûr a ni.

⁴Tin, hâlral thilhlan lu chungah chuan a kut a nghat ang a; tichuan, a tân inremna siamna tûrin pawmsak a ni ang.

⁵Tin, LALPA hmaah bâwngpa a talh ang a; tin, Arona fapa puithiamten thisen chu an hlân ang a, inbiakna puan in kawngka bula maichâm chu thisen chuan an theh vêl tûr a ni.

⁶Tin, hâlral thilhlan chu a lip ang a, a chan tûr a ni.

⁷Tin, puithiam Arona fapate chuan maichâmah chuan mei an dah ang a, mei chungah chuan thing an chhep khâwm ang.

⁸Tin, Arona fapa puithiamte chuan sa hrang te, a lu te, a thau te chu maichâma mei chunga thingah chuan an dah fel ang a;

⁹a kawchhûngte leh a kete erawh chu tuiin a sil ang. Puithiam chuan LALPA tâna rimtui tak, meia hlan hâlral thilhlan atân a pum chuan maichâmah a hâl tûr a ni.

¹⁰“ ‘A thilhlan chu hâlral thilhlan atâna ran rual zînga mi, berâm emaw, kêl emaw a nih chuan, a pa, sawisêl bo a hlân tûr a ni.

¹¹Maichâm sîr, hmâr lampangah LALPA hmaah a talh ang a; tin, Arona fapa puithiamte chuan maichâm chu a thisen chuan an theh vêl tûr a ni.

¹²Tin, a chan ang a, a lu nên, a thau nên; tin, puithiamin maichâm chunga mei chunga thingah chuan a dah fel ang;

¹³a kawchhûngte leh a kete erawh chu tuiin a sil ang. Tin, a pumin puithiamin a hlân ang a, maichâmah a hâl tûr a ni; LALPA tâna rimtui tak, meia hlan hâlral thilhlan a ni.

¹⁴“ ‘Tin, LALPA tâna a thilhlan chu sava lam hâlral thilhlan a nih chuan, a thilhlanah ṭhuro emaw, pârvano emaw a hlân tûr a ni.

¹⁵Puithiamin maichâmah a rawn keng ang a, a lu a ṭhuai bung ang a, maichâmah a hâl ang; tin, a thisen chu maichâm pangah chuan an far kangtîr ang a.

¹⁶Tin, a chawkchaweng chu a hmul nên maichâm kiang, chhak lampanga meivâp dahna hmunah chuan a paih ang a.

¹⁷Tin, a thlate chu a ṭhuai thlawn ang a, a tak erawh chu phel lovin; tin, puithiamin maichâmah, mei chunga thingah chuan a hâl tûr a ni. Chu chu LALPA tâna rimtui tak, meia hlan hâlral thilhlan a ni.