Read Mizo_Old_version Leviticus 10 Bible Online

Leviticus 10 - Mizo_Old_version bible

Leviticus 10

¹Tin, Arona fapa, Nadaba leh Abihua-te chuan an mei lâkna chu an la ve ve a, chutah chuan meiling an dah a, rimtui an phul a, LALPA hmaah a thupêk lohvin mei hman loh chi an hlân a.

²Chutichuan, LALPA hma aṭangin mei a lo chhuak a, anni chu a kâng hlum a, LALPA hmaah chuan an thi ta a.

³Chutichuan, Mosian Arona hnênah, “ ‘Mi rawn hnaihtuahte chuan thianghlimin ka lang ang a; mipui zawng zawng hmaah chuan chawimawiin ka awm ang,’ tia LALPAN a sawi kha hei hi a nih hi,” a ti a. Tin, Arona chu a ngawi reng a.

⁴Tichuan, Mosia chuan Arona pami Uziela fapa, Misaela leh Elzaphana-te chu a ko va, an hnênah, “Lo hnai ula, in unaute hi hmun thianghlim ata daipâwnah zâwn chhuak rawh u,” a ti a.

⁵Chutichuan, an lo hnai a, an puithiam kawr ha chungin daipâwnah an zâwn chhuak a, Mosia sawi ang chuan.

⁶Tin, Mosian Arona hnênah leh a fapa Eleazara leh Ithamara-te hnênah chuan, “In sam thlah suh ula, in puante pawt thlêr hek suh u; chuti lo chuan, in thi ang a, mi zawng zawng chungah LALPA a thinur ang; in unau, Israel chhûngkaw pum puiin mei, LALPA hâl chu sûn zâwk rawh se.

⁷Tin, inbiakna puan in kawngka ata chu in chhuak tûr a ni lo; chuti lo chuan, in thi ang, LALPA hriak, thih mi chu in chungah a awm si a,” a ti a. Tichuan, Mosia thu ang chuan an ti ta a.

⁸Tin, LALPAN Arona chu a bia a,

⁹“Nang emaw, i fapate emaw pawhin inbiakna puan in chhûnga in kal laiin uain leh zu rêng rêng in suh u; chuti lo chuan, in thi ang. Chu chu in thlahte zêl thlenga kumkhaw dân tûr a ni ang a;

¹⁰chu chu a thianghlim leh a thianghlim lo leh, a thiang leh a thiang lo in thlei theihna tûr leh,

¹¹LALPAN Mosia hmanga an hnêna a sawi, thupêk zawng zawngte chu Israela thlahte in zirtîr theih nân a ni ang,” tiin.

¹²Tin, Mosian Arona hnênah leh a fapa la dam Eleazara leh Ithamara-te hnênah chuan, “LALPA tâna meia thilhlana mi, chhangphut thilhlan lâk bângte chu la ula, maichâm bulah dawidim tel lovin ei rawh u; thil thianghlim a ni si a.

¹³LALPA tâna meia thilhlana i pual leh i fapate pual a nih avângin hmun thianghlimah in ei tûr a ni; chutianga thu pêk chu ka ni e.

¹⁴A ir thên leh a bawp ding lam thên chu hmun faiah in ei tûr a ni, nang leh i fapate leh i fanuteho nên; Israela thlahte remna thilhlan inthawinaa i pual leh i fapate puala ruat a ni si a.

¹⁵Bawp thên leh ir thên chu LALPA hmaa thên thilhlana thên tûrin, meia thilhlan thau nên an rawn keng tûr a ni a. Chu chu nang leh i fapate nên, kumkhuaa in pual tûr a ni ang, LALPA thupêk ang khân,” a ti a.

¹⁶Tin, Mosia chuan sual thawina kêl chu ngun takin a zawng a; tin, ngai teh, an lo hâl tawh reng a. Tichuan, Arona fapa la dam, Eleazara leh Ithamara-te chungah chuan a thinur a,

¹⁷“Engati nge sual thawina chu hmun thianghlimah in ei loh? Thil thianghlim, mipuiho khawlohna phur tûra LALPA hmaa remna siamsakna tûra a pêk che u a ni si a.

¹⁸Ngai teh u, a thisen chu hmun thianghlimah in la lût hlei nêm; thu ka pêk ang khân hmun thianghlimah chuan in ei ngei ngei tûr a ni asin,” tiin.

¹⁹Tin, Arona chuan Mosia hnênah, “Ngai teh, vawiinah hian LALPA hmaah an sual thawina leh an hâlral thilhlan chu an hlân a ni a; hetiang thil hi ka chungah a lo awm ta mai si a! Vawiinah hian sual thawina chu lo ei ta ila, LALPA ngaiha thil tih âwm a lo ni dâwn maw?” a ti a.

²⁰Tin, Mosian chu chu a hriatin a lungawi ta a.