Read Mizo_Old_version Leviticus 11 Bible Online

Leviticus 11 - Mizo_Old_version bible

Leviticus 11

¹Tin, LALPAN Mosia leh Arona a bia a,

²“Israela thlahte chu bia ula, ‘Lei chunga sa zawng zawng zînga nungcha in ei tûrte chu hêng hi a ni:

³sa zînga a tin kâka, tin kâk chhuak, chaw ṭhial nawn chi tawh phawt chu in ei thei ang a.

⁴Amaherawhchu, chaw ṭhial nawn chi emaw, tin kâk chhuak emaw zînga mi hêngte hi chu in ei tûr a ni lo: sanghâwngsei, chaw chu ṭhial nawn mah sela, a tin a kâk loh avângin, in tân a bawlhhlawh a ni;

⁵tin, sazupui, chaw chu a ṭhial nawn na a, a tin a kâk loh avângin, in tân a bawlhhlawh a ni;

⁶tin, zupui, chaw chu a ṭhial nawn na a, a tin a kâk loh avângin, in tân a bawlhhlawh a ni;

⁷tin, vawk, a tin chu a kâk a, a kâk chhuak na a, chaw a ṭhial nawn loh avângin, in tân a bawlhhlawh a ni.

⁸An sa in ei tûr a ni lo va, an ruang pawh in khawih tûr a ni lo; in tân a bawlhhlawh a ni.

⁹“ ‘Tuia chêng zawng zawngah hêngte hi in ei thei ang: tuifinriat leh lui leh tuia awm, pângparh leh phuhlip nei tawh phawt chu in ei thei ang.

¹⁰Tuia chêng zawng zawngte leh tuia nungcha awm zawng zawng zînga tuifinriata mi te, luia mi te, pângparh leh phuhlip nei lo apiangte chu in tâna thil tenawm a ni.

¹¹In tân thil tenawm a ni ang; an sa in ei tûr a ni lo va, an ruangte chu thil tenawmah in neih tûr a ni.

¹²Tuia mi, pângparh leh phuhlip nei lo tawh phawt chu in tân thil tenawm a ni.

¹³“ ‘Tin, sava zînga mi chu hêng hi thil tenawma in neih tûr a ni; ei loh tûr a ni a, thil tenawm an ni: mupui te, lungdûp te, muârla te,

¹⁴mutê te, ngawihûp chi rêng rêng te,

¹⁵choâk chi rêng rêng te,

¹⁶sava sâng te, vabak te, tuifinriat sava te, mu chi rêng rêng te,

¹⁷hrângkir te, luidung mû te, chingpirinu te,

¹⁸chhimbuk sialki nei te, tuivalawng te, mulukawlh te,

¹⁹kânghlai te, dîl sava chi rêng rêng te, chhuangtuar leh bâkte.

²⁰“ ‘Thla nei, ke palia kal chi zawng zawng chu in tân thil tenawm a ni.

²¹Amaherawhchu, thla nei, ke palia kal chi pawh lei chunga perh nâna an keṭang chung lama bawp nei zawng zawng zînga mi hêngte hi in ei thei ang.

²²Hêngte pawh hi in ei thei ang: khaukhuap chi rêng rêng te, khauêkṭhingṭial chi rêng rêng te, perhpâwng chi rêng rêng leh khau chi rêng rêngte.

²³Amaherawhchu, thla nei, ke pali nei, a kala kal chi zawng zawng chu in tân thil tenawm a ni vek ang.

²⁴“ ‘Tin, hêng avângte hian bawlhhlawh in lo kai ang; tu pawh, hêng sa ruang khawih apiang chu tlai lam thlengin an bawlhhlawh ang a;

²⁵tin, tu pawh hêng ruang latu apiangte hian an puante an su tûr a ni a, tlai lam thlengin an bawlhhlawh ang:

²⁶ran a tin kâka, tin kâk chhuak lo, chaw pawh ṭhial nawn lo chi zawng zawng chu in tân thil bawlhhlawh a ni a; tu pawh chûng khawih apiang chu an bawlhhlawh ang.

²⁷Tin, fuliafa zawng zawng zînga ke bâwra kal apiangte chu in tân thil bawlhhlawh a ni a; an ruang khawih apiang chu tlai lam thlengin an bawlhhlawh ang.

²⁸Tin, an ruang latu apiang chuan an puante an su tûr a ni a, tlai lam thlengin an bawlhhlawh ang. In tân thil bawlhhlawh a ni.

²⁹“ ‘Tin, leia a bawha bawkvâk chi zînga in tâna thil bawlhhlawh chu hêngte hi a ni: bui te, chaichîm te, tangkeu chi rêng rêng te,

³⁰chawkê te, tangkâwng te, laitel te, kâwlchawr te, laikîng te.

³¹Hêng hi a bawha bawkvâk chi zawng zawng zînga in tâna thil bawlhhlawhte chu an ni. Tu pawhin hêng thi hnute hi an khawih chuan tlai lam thlengin an bawlhhlawh ang.

³²Tin, an thiha eng pawh an delh chu a bawlhhlawh zêl ang; hmanrua hman tawh phawt chu thing bungbêl emaw, puan emaw, savun emaw, saiip emaw pawh ni sela, tuiah chiah tûr a ni. Tin, tlai lam thlengin a bawlhhlawh ang; chumi zawhah chuan a thianghlim tawh ang.

³³Hlum bêl, a enga pawh a tlâkna apiang chu in tikeh zêl tûr a ni; a chhûnga awm zawng zawng chu a bawlhhlawh a ni:

³⁴chumi bêla ei mi awm zawng zawng pawh, chumia awm tuia chiah tawh rêng rêng chu thil bawlhhlawh a ni ang; tin, in mi, in theih chi zawng zawng pawh, chumi bêla mi rêng rêng chu thil bawlhhlawh a ni ang.

³⁵Tin, thil eng pawh an ruang a eng lai pawhin a delh tawh phawt chu thil bawlhhlawh a ni zêl ang; chhang urna emaw, ur lumna bêl emaw pawh tihkeh vek tûr a ni; a bawlhhlawh tawh a, in tân thil bawlhhlawh a ni ang.

³⁶Amaherawhchu, tuikhur emaw, tuizêm, tui tling khâwm emaw chu a bawlhhlawh lo vang a, an ruang khawih apiang erawh chu a bawlhhlawh ang.

³⁷Tin, chi, chîn tûr rêng rêng chu an ruang a eng lai pawhin lo delh ta ang sela, a bawlhhlawh lo va.

³⁸Amaherawhchu, chi, tuia chiah hnu chu an ruang a eng lai pawhin delh sela, in tân thil bawlhhlawh a ni.

³⁹“ ‘Ran in ei theih chi rêng rêng eng pawh thi sela, a ruang khawih apiang chu tlai lam thlengin a bawlhhlawh ang.

⁴⁰A sa ei apiang chuan a puante a su tûr a ni a, tlai lam thlengin a bawlhhlawh ang. A ruang latu pawhin a puante a su tûr a ni a, tlai lam thlengin a bawlhhlawh ang.

⁴¹“ ‘Tin, rannung lei chunga a bawha bawkvâk chi zawng zawng chu thil tenawm an ni a; ei tûr an ni lo.

⁴²A tlenga tleng chi leh ke palia kal chi emaw, ke tam tak nei chi emaw, lei chunga a bawha bawkvâk chi rêng rêng chu in ei tûr a ni lo, thil tenawm an ni si a.

⁴³A bawha bawkvâk chi rêng rêngin in intitenawm tûr a ni lo va; in bawlhhlawh phahna tûrin, chûng chuan in intibawlhhlawh tûr a ni lo.

⁴⁴Kei hi LALPA in Pathian ka ni si a; chuvângin, intithianghlim ula, thianghlimin awm rawh u; kei ka thianghlim si a. Lei chunga chêng, a vaha vâk, a eng ang chi mahin intibawlhhlawh suh u.

⁴⁵In Pathian ni tûra Aigupta ram ata hruai chhuak chhotu che u LALPA chu ka ni si a. Kei ka thianghlim si a; chuvângin, nangni pawh in thianghlim tûr a ni.

⁴⁶“ ‘Hei hi sa leh savate leh nungcha, tuia chêng chi tinrêng leh, leia a bawha bawkvâk chi tinrêngte chungchâng thua dân tûr chu a ni,

⁴⁷thianghlim leh thianghlim lo thleina tûr leh, nungcha ei theih mi leh nungcha ei theih loh mi thleina tûrin,’ ti rawh u,” tiin.