Read Mizo_Old_version Leviticus 12 Bible Online

Leviticus 12 - Mizo_Old_version bible

Leviticus 12

¹Tin, LALPAN Mosia a bia a,

²“Israela thlahte hnênah, ‘Hmeichhiain nau a paia, fapa a hrin chuan ni sarih a bawlhhlawh ang a; hmeichhe dân pângngai hun laia a bawlhhlawh angin a bawlhhlawh ang.

³Tin, a ni riat niin naute serh hmâwr vun tan tûr a ni.

⁴Thisen avânga inthianin ni sawmthum leh ni thum a la awm cheu tûr a ni; a inthen ni a kim hma loh chuan thil thianghlim rêng rêng a khawih tûr a ni lo va, hmun thianghlimah pawh a lût tûr a ni hek lo.

⁵Hmeichhia a hrin erawh chuan, hmeichhe dân pângngai hun laia a bawlhhlawh angin chawlhkâr hnih a bawlhhlawh ang; tin, thisen avânga inthianin ni sawmruk leh ni ruk a la awm cheu tûr a ni.

⁶“ ‘Tin, fapa emaw, fanu emaw avânga a inthenna ni a kim veleh, hâlral thilhlanah berâmno kum khat mi leh sual thawi nân pârvano emaw, ṭhuro emaw inbiakna puan in kawngka bulah puithiam hnênah a rawn keng tûr a ni.

⁷Tin, anin LALPA hmaah a hlân ang a, inremna a siamsak ang a; tichuan, a thisen chhuahna ata tihthianghlim a ni ang. Hei hi mipa emaw, hmeichhia emaw hringtu tâna dân a ni.

⁸Tin, a neihin berâmno a tlin loh chuan ṭhuro tuak khat emaw, pârvano tuak khat emaw a keng tûr a ni: pakhat chu hâlral thilhlanah, pakhat chu sual thawi nân. Chutiang chuan puithiamin inremna a siamsak ang a; tichuan, a thianghlim tawh ang,’ tiin sawi rawh,” tiin.