Read Mizo_Old_version Leviticus 13 Bible Online

Leviticus 13 - Mizo_Old_version bible

Leviticus 13

²“Mi a tisa vun a vûn emaw, a khir emaw, a bawl emaw, a vuna phâr hri ni âwma a lan chuan puithiam Arona hnênah emaw, a fapa, puithiamte zînga tu ber emaw hnênah hruai tûr a ni.

³Tin, puithiam chuan tisa vuna hri chu a lo en ang a; tin, a hri awmna laia hmul chu a lo vâra, a hri chu a tisa vun aia thûka a lan chuan phâr hri a ni a. Tin, puithiam chuan amah chu a lo en ang a, mi bawlhhlawh a nih a puang tûr a ni.

⁴A tisa vuna bawlte chu a lo vâra, vun aia thûka a lan lohva, a hmul chu a vâr loh chuan hri veitu chu puithiamin ni sarih a khung hrang ang.

⁵Tin, puithiam chuan ni sarih ni chuan amah chu a en ang a; tin, ngai teh, a hri chu a ngai renga a hmuha, a hri chu a ṭai darh loh chuan puithiam chuan ni sarih vêk a khung hrang leh ang.

⁶Tichuan, puithiam chuan ni sarih ni chuan a en leh ang a; tin, ngai teh, hri chu a lo thîma, hri chu a vuna a ṭai darh loh chuan puithiam chuan a thianghlim tih a puang tûr a ni; khir mai a ni a, a puante a su ang a, a lo thianghlim ang.

⁷Amaherawhchu, a thianna tûra puithiam a inentîr hnua a khir chu a vuna a ṭai darh zau chuan, puithiam a inentîr leh tûr a ni.

⁸Tin, puithiam chuan a lo en ang a; tin, ngai teh, a khir chu a vuna a ṭai darh chuan puithiam chuan a bawlhhlawh tih a puang ang. Phâr a ni.

⁹“Phâr hri miin a vawn chuan puithiam hnênah hruai tûr a ni.

¹⁰Tin, puithiamin a lo en ang a; tin, ngai teh, vuna a vâra a lo vûn chhuaha, a hmul a tihvâra, a vûng chu a lâwn chuan,

¹¹phâr benvawn a tisaah a awm a ni a. Puithiamin a bawlhhlawh tih a puang ang a, khung hran tûr a ni lo, bawlhhlawh a ni si a.

¹²Tin, a phâr chu vuna a ṭai darh zauva, a hri veitu chu a vun, a lû aṭanga a ke lêr thlenga puithiam hriat theih chin phârin a bawm chuan,

¹³puithiam chuan a en ang a; tin, ngai teh, phârin a tisa zawng zawng a bawm chhuah tawh chuan hri veitu chu a thiang tih a puang tûr a ni. A vâr zo tawh a, a thianghlim tawh a ni.

¹⁴Amaherawhchu, a tisa a lo lâwn chuan a lo bawlhhlawh ang.

¹⁵Puithiam chuan a tisa lâwng chu a lo en ang a, a bawlhhlawh tih a puang tûr a ni; tisa lâwng chu a bawlhhlawh a ni. Phâr a ni.

¹⁶Amaherawhchu, tisa lâwng chu a lo danglam leha, a lo vâr leh chuan puithiam hnênah a kal ang a.

¹⁷Tin, puithiamin a lo en ang a; tin, ngai teh, a hri chu a lo vâr chuan puithiam chuan hri veitu chu a bawlhhlawh lo tih a puang tûr a ni. A thianghlim tawh a ni.

¹⁸“Tin, tisa vun a lo khawihlia, a lo dama,

¹⁹a khawihlina hmuna a lo vâr pâwn emaw, vâr sen deuhva a lo bawl emaw chuan puithiam entîr tûr a ni.

²⁰Tin, puithiam chuan a lo en ang a; tin, ngai teh, vun aia thûka a lana, a hmul chu a lo vâr chuan puithiamin a bawlhhlawh tih a puang tûr a ni. Phâr hri a ni a, khawihliah a lo piang chhuak a ni.

²¹Amaherawhchu, puithiamin a lo ena, hmul vâr a awm lohva, vun aia a thûk lohva, a thîm deuh chauh a nih chuan, puithiamin ni sarih a khung hrang ang a;

²²tin, vuna a ṭai darh chuan puithiamin a bawlhhlawh tih a puang tûr a ni. Hri a ni.

²³Amaherawhchu, a bawl vâr chu a awmna ngaia a awma, a ṭai darh loh chuan khawihli ser mai a ni a; puithiamin a thianghlim tih a puang tûr a ni.

²⁴“Tin, tisa vun a kana, a kâng lâwng chu vâr sen deuh emaw, a vâr emawa a lo bawl chhuah chuan,

²⁵puithiamin a lo en ang a; tin, ngai teh, a bawl lai taka hmul chu a vâra, vun aia thûka a lan chuan phâr a ni a, kângah chuan a lo piang chhuak a ni. Tichuan, puithiamin a bawlhhlawh tih a puang tûr a ni. Phâr hri a ni.

²⁶Amaherawhchu, puithiamin a lo ena, tin, ngai teh, a lo bawla, a hmul vâr a awm lohva, vun aia thûk lova thîm deuh chauh a nih chuan puithiamin ni sarih a khung hrang ang.

²⁷Tin, puithiamin ni sarih niah amah chu a en ang a, vuna a ṭai darh zau chuan puithiamin a bawlhhlawh tih a puang tûr a ni. Phâr hri a ni.

²⁸Tin, a bawl chu a awmna ngaia a awm renga, vuna a ṭai darh lohva, thîm deuh chauh a nih chuan mei kan pâwn mai a ni a, puithiamin a thianghlim tih a puang tûr a ni; kâng ser mai a ni si a.

²⁹“Tin, hmeichhia emaw, mipa emawin a luah emaw, a khabe hmul laiah emaw hri a vei chuan,

³⁰puithiamin hri chu a lo en ang a; tin, ngai teh, vun aia thûka a lana, hmul eng sîn tak a awm chuan puithiamin a bawlhhlawh tih a puang tûr a ni; pupangliah a ni a, lû leh khabe hmul phâr a ni.

³¹Tin, puithiamin pupangliah hri chu a ena, vun aia thûk lova a lana, a hmul dum a awm loh chuan puithiamin pupangliah hri veitu chu ni sarih a khung hrang ang.

³²Tin, ni sarih niah puithiamin hri chu a en ang a; tin, ngai teh, pupangliah chu a ṭai darh lohva, hmul eng a awm lohva, pupangliah chu vun aia thûka a lan loh chuan,

³³meh tûr a ni a, pupangliah lai erawh chu a mêt tûr a ni lo. Tin, puithiamin pupangliaha chu ni sarih dang a khung hrang leh ang a.

³⁴Tin, ni sarih ni chuan puithiamin pupangliah chu a en leh ang a; tin, ngai teh, pupangliah chu a vuna a darh lohva, vun aia thûka a lan loh chuan puithiamin a thianghlim tih a puang tûr a ni; tin, a puante a su ang a, a lo thianghlim tawh ang.

³⁵Amaherawhchu, pupangliah chu a inthen fai hnua vuna a ṭai darh zau chuan,

³⁶puithiamin amah chu a lo en ang a; tin, ngai teh, pupangliah chu vuna a ṭai darh chuan, puithiam tân chuan hmul eng chu zawn a ngai kher lo vang; a bawlhhlawh a ni.

³⁷Amaherawhchu, pupangliah chu a ngai renga a hmuha, hmul dum a ṭo chuan pupangliah chu a dam a ni a, a thianghlim a ni; puithiamin a thianghlim tih a puang tûr a ni.

³⁸“Tin, hmeichhia emaw, mipa emaw, an tisa vunah bawl, bawl vâr tak a awm chuan,

³⁹puithiamin a en ang a; tin, ngai teh, an tisa vuna bawl chu a vâr thîm deuh chauh a nih chuan bawl mai a ni a, vuna lo piang a ni a; a thianghlim a ni.

⁴⁰“Mi a sam a tlâk kawlh chuan lukawlh a ni a; nimahsela, a thianghlim a ni.

⁴¹A chhîp sam a tlâk kawlh chuan chalkawlh a ni a; nimahsela, a thianghlim a ni.

⁴²Amaherawhchu, lukawlhah emaw, chalkawlhah emaw, hri sen deuhva vâr a awm chuan, a lukawlh emaw, a chalkawlh emawa lo piang phâr a ni.

⁴³Tichuan, puithiamin a lo en ang a; tin, ngai teh, a lukawlh emaw, a chalkawlh emawa hri lo pâwng chhuak chu a sen vâr hiara, tisa vuna phâr anga a lan chuan,

⁴⁴mi phâr a ni a, a bawlhhlawh a ni. Puithiamin a bawlhhlawh tih a puang ngei ngei tûr a ni; a phârna chu a lu-ah a ni.

⁴⁵“Phâr hri vei chu a puante pawh thlêr a ni ang a, a sam te a thlah ang a, a hmui chung lam a tuam ang a, ‘Ka bawlhhlawh e! Ka bawlhhlawh e!’ tiin a au tûr a ni.

⁴⁶Phârin a bawm chhûng chu bawlhhlawh a ni ang a; a bawlhhlawh a, amahin a awm hrang tûr a ni; a awmna tûr chu daipâwn a ni.

⁴⁷“Silhfên pawh, sahmul silhfên emaw, la zai sîn silhfên emaw pawh, tah emaw, phiar emaw pawh, la zai sîn emaw, sahmul emaw pawh, savun emaw, eng pawh savuna siamah emaw phâr hri a awma,

⁴⁸

⁴⁹chu hri chu silhfênah emaw, savunah emaw, tahah emaw, phiarah emaw, eng pawh savuna siamah emaw a hring deuh emaw, a sen deuh emawa a lo lan chhuah chuan, phâr hri a ni a, puithiam entîr tûr a ni.

⁵⁰Tin, puithiamin hri chu a lo en ang a, hri kaina chu ni sarih a khung hrang ang.

⁵¹Tin, ni sarih niah hri chu a en ang a, hri chu silhfên, tahah emaw, phiarah emaw, eng atân pawha an hman savunahte emaw a ṭai chuan hri chu phâr nghet tak chi a ni a; a bawlhhlawh a ni.

⁵²Silhfên chu, tah emaw, phiar emaw, sahmul emaw, la zai sîn emaw, savuna siam chi rêng rêng emaw, phâr awmna tawh phawt chu a hâl tûr a ni, phâr nghet tak chi a ni si a; hâl ngei tûr a ni.

⁵³Tin, puithiamin a lo ena, silhfên, tah emaw, phiar emaw, savuna siam chi rêng rêng pawha hri chu a ṭai loh chuan,

⁵⁴hri awmna chu puithiamin sûk thu a pe ang a, ni sarih dang a khung hrang leh ang.

⁵⁵Tin, hri awmna sûk hnu chuan puithiamin a en leh ang a; tin, ngai teh, hri lan dân chu a danglam loh chuan hri chu ṭai lo mah sela, a thianghlim chuang lo va, i hâl tûr a ni; a nghet chi a ni, a chhûng lam emaw, a pâwn lam emawa kawlh pawh ni rawh se.

⁵⁶Tin, puithiamin a lo ena, sûk hnua thîm deuh chauh a nih chuan silhfên ata emaw, savun ata emaw, tah ata emaw, phiar ata emaw chu a pawt thla ang.

⁵⁷Tin, hri chu silhfên tahah emaw, phiarah emaw, savuna siamahte emaw a la lan cheu chuan, a lo chhuak leh a ni a; hri awmna chu i hâl tûr a ni.

⁵⁸Tin, silhfên chu tah emaw, phiar emaw, eng pawh savuna siam chi rêng rêng emaw i sûka, hriin a kiansan chuan sûk leh tûr a ni a; tichuan, a lo thianghlim tawh ang.

⁵⁹Hei hi silhfên, sahmul emaw, la zai sîn emaw, tah emaw, phiar emaw, savuna siam chi rêng rêngte emawa phâr hri awm, a thianghlim leh a thianghlim loh puan dân tûr chu a ni,” tiin.