Read Mizo_Old_version Leviticus 14 Bible Online

Leviticus 14 - Mizo_Old_version bible

Leviticus 14

²“Hei hi phâr inthen nia a tih dân tûr a ni ang: puithiam hnênah hruai tûr a ni a;

³tin, puithiam chu daipâwnah a kal chhuak ang a; tin, puithiam chuan a en ang a; tin, ngai teh, phâr chu a phârna hri a dam chuan,

⁴puithiam chuan a inthian tûra chu sava nung thiang pahnih leh, sidar thing leh la zai sen leh husop kensak tûrin thu a pe ang.

⁵Tin, puithiam chuan sava pakhat chu hlum bêlah lui tui chungah talh tûrin thu a pe ang a.

⁶Sava nung chu sidar thing te, la zai sen te, husop te nên chuan a keng ang a, lui tui chunga sava talh thisenah chuan a hnim vek ang.

⁷Tin, phârna laka inthian tûra chu vawi sarih a theh ang a, a thianghlim tih a puang ang a; tin, sava nung chu ramah a chhuah ang.

⁸Tin, a inthian tûra chuan a puante a su ang a, a inmêt kâwng vek ang a, a inbual tûr a ni; tichuan, a lo thianghlim ang. Chumi zawhah chuan riahhmunah a kal ang a; amaherawhchu, a puan in pâwn lamah ni sarih a awm tûr a ni.

⁹“Tin, heti hi a ni ang a, a ni sarih ni chuan a sam zawng zawng leh a khabe hmul leh a mit ko hmulte a mêt kâwng ang a, a hmul zawng zawng a mêt kâwng ang; tin, a puante a su ang a, a inbual tûr a ni; tichuan, a lo thianghlim tawh ang.

¹⁰Tin, ni riat ni chuan berâmno a pa pahnih sawisêl bo leh berâmno a nu pakhat sawisêl bo, kum khat mi leh chhangphut thilhlan atân chhangphut dip tak, epha hmun sâwma ṭhena hmun thum hriaka hmeh leh hriak log khat a keng tûr a ni.

¹¹Tin, a thiantu puithiam chuan inthian tûra leh chûng thil chu, inbiakna puan in kawngka bulah LALPA hmaah a dah ang a.

¹²Tin, puithiam chuan berâmno pakhat chu hriak log khat nên chuan a la ang a, bawhchhiat thawi nân a hlân ang a, LALPA hmaa thên thilhlan atân thên tûr a ni.

¹³“Tin, sual thawina leh hâlral thilhlan an talh ṭhinna hmun, hmun thianghlimah chuan berâmno a pa chu a talh tûr a ni; sual thawina chu puithiam pual a ni ang bawkin, bawhchhiat thawina pawh chu puithiam pual a ni si a; thil thianghlim tak a ni e.

¹⁴Puithiam chuan bawhchhiat thawina thisen chu a la ang a, inthian tûra beng ding lam hmâwrah te, a kut ding lam zungpuiah te, a ke ding lam zungpuiah te a hnawih ang.

¹⁵Tin, hriak log khata mi chu puithiam chuan a la ang a, ama vei lam kutphahah a chhûng ang a;

¹⁶puithiam chuan a kut vei lama hriakah chuan a zungṭang ding lam a hnim ang a, hriak chuan LALPA hmaah a kutzungṭangin vawi sarih a theh ang.

¹⁷Tin, a kuta hriak la awm zawng chuan inthian tûra beng ding lam hmâwr te, a kut ding lam zungpui te, a ke ding lam zungpuitea bawhchhiat thawina thisen chungah te chuan a hnawih ang.

¹⁸Puithiam chuan a kuta hriak la awm zawng chuan inthian tûra lu a hnawih ang a; tin, puithiam chuan LALPA hmaah inremna a siamsak tûr a ni.

¹⁹Tin, puithiam chuan sual thawina chu a hlân ang a, a thianghlim lohna avânga inthian tûra chu inremna a siamsak ang a; tin, chumi zawhah chuan hâlral thilhlan chu a talh ang.

²⁰Tin, puithiam chuan hâlral thilhlan leh chhangphut thilhlan chu maichâmah chuan a hlân ang a, puithiam chuan inremna a siamsak ang a; tichuan, a lo thianghlim tawh ang.

²¹“Tin, mi rethei a niha, chutiang chu a tlin loh chuan, berâmno a pa pakhat bawhchhiat thawina, inremna siamsak nâna thên tûr leh, chhangphut thilhlan atân chhangphut dip tak epha hmun sâwma ṭhena hmun khat, hriaka chawhpawlh, hriak log khat nên a keng ang a;

²²tin, ṭhuro tuak khat emaw, pârvano tuak khat emaw, a neih theih zâwk zâwk apiang; pakhat chu sual thawina, pakhat chu hâlral thilhlanah a ni ang.

²³Ni riat niah a inthen nân puithiam hnênah, inbiakna puan in kawngka bulah LALPA hmaah a rawn keng tûr a ni.

²⁴“Tichuan, puithiamin bawhchhiat thawina berâmno leh hriak log khat chu a la ang a; tin, thên thilhlanah LALPA hmaah puithiam chuan a thên ang.

²⁵Tin, bawhchhiat thawina berâmno chu a talh ang a; puithiam chuan bawhchhiat thawina thisen chu a la ang a, inthian tûra beng ding lam hmâwrah te, a kut ding lam zungpuiah te, a ke ding lam zungpuiah te a hnawih ang.

²⁶Tin, puithiam chuan hriak chu ama kutphah vei lamah a bun ang a;

²⁷tin, puithiam chuan a kut vei lama hriak ṭhenkhat chu a kut ding lamin LALPA hmaah vawi sarih a theh ang.

²⁸Tin, puithiam chuan a kuta hriak chuan inthian tûra beng ding lam hmâwr te, a kut ding lam zungpui te, a ke ding lam zungpuitea bawhchhiat thawina thisen chung takahte chuan a hnawih ang.

²⁹Puithiam kuta hriak la awm zawngte chuan, LALPA hmaa inremna siamsak tûrin, inthian tûra lu chu a thih tûr a ni.

³⁰Tin, ṭhuro emaw, pârvano emaw, a neih theih zâwk zâwk apianga pakhat chu a hlân ang a;

³¹a neih theih zâwk zâwk apiang, sual thawi nân pakhat, hâlral thilhlanah pakhat, chhangphut thilhlan nên. Chutiang chuan puithiam chuan inthian tûra chu LALPA hmaah inremna a siamsak ang.

³²Hei hi phâr hri vei, inthenna dân ang tlin lote tâna dân a ni,” tiin.

³³Tin, LALPAN Mosia leh Arona a bia a,

³⁴“Luah tûra ka pêk che u Kanaan ram in luh huna, in luah tûr ram khawii inah pawh phâr hri ka dah chuan,

³⁵chumi in neitu chuan, ‘He inah hian hri ni âwm tak awm âwmin ka hria,’ tiin puithiam a hrilh tûr a ni.

³⁶Tin, puithiam chu hri en tûra a luh hma chuan, in chhûnga thil awm zawng zawng chu bawlhhlawha a chan loh nân, in chu tihruah tûrin puithiam chuan thu a pe ang a; chumi zawh chuan puithiam chu in en tûr chuan a lût ang.

³⁷Tin, hri chu a en ang a; tin, ngai teh, hri chuan a hring lam deuh emaw, a sen lam deuh emawa bang a ei khuar tawha, bang aia phaia a lan chuan,

³⁸puithiam chu in ata kawngkaah a chhuak ang a, in chu ni sarih a khâr ang.

³⁹Tin, ni sarih niah puithiam chuan a va en leh ang a; tin, ngai teh, hri chu banga a lo ṭai chuan,

⁴⁰hri awmna lung chu lâk chhuaha, daipâwnah hmun bawlhhlawha paih tûrin puithiam chuan thu a pe ang.

⁴¹Tin, in chhûng lam chu a ziah vêltîr ang a; tin, lung chârna an ziah khawh chu daipâwnah hmun bawlhhlawhah an chhûng ang.

⁴²Tin, lung dang an la ang a, chûng lung hmunahte chuan an dah ang; tin, lung chârna dang an la ang a, in chu a bel ang.

⁴³“Tin, lung a lâk chhuaha, in chu a ziaha, a bel zawh hnua hri chu ina a lo chhuah leh chuan,

⁴⁴puithiam chu a va lût ang a, a va en leh ang; tin, ngai teh, hri chu ina a lo ṭai chuan chu ina phâr chu a nghet chi a ni a; in chu a bawlhhlawh a ni.

⁴⁵In chu a ṭhiat ang a, a lung te, a thing te, a lung chârna zawng zawngte pawh; tin, daipâwnah hmun bawlhhlawhah a thiar chhuak ang.

⁴⁶Tu pawh chu in khâr chhûnga lût rêng rêng chu tlai lam thlengin an bawlhhlawh bawk ang.

⁴⁷Tin, tu pawh chumi ina mu apiangte chuan an puante an su ang a; tin, tu pawh chu ina chaw ei apiangte chuan an puante an su tûr a ni.

⁴⁸Tin, puithiam chu a luha, a han en vêla, in chu bel ṭhat a nih hnua hri chu a ṭai loh chuan, in chu a thianghlim tih puithiamin a puang ang, hri chu a kian tawh avângin.

⁴⁹“In thenna tûr chuan sava pahnih leh sidar thing leh la zai sen leh husop a keng ang.

⁵⁰Sava pakhat chu hlum bêlah lui tui chungah a talh ang a;

⁵¹tin, sidar thing leh husop leh la zai sen leh sava nung chu a la ang a, sava talh tâk thisenah leh lui tuiah chuan a hnim ang a, in chu vawi sarih a theh ang.

⁵²Tin, in chu sava thisen te, lui tui te, sava nung te, sidar thing te, husop te, la zai sente chuan a thian ang.

⁵³Sava nung erawh kha chu khua aṭangin ramah a thlawh chhuahtîr tûr a ni. Chutiang chuan in tân chuan inremna a siam ang a; tichuan, a lo thianghlim tawh ang.

⁵⁴“Hei hi phâr hri chi tinrêng leh pupangliah chungchânga dân chu a ni;

⁵⁵puana phâr awm leh ina mite,

⁵⁶pâwng te, khir te, bawl chungchângahte pawh,

⁵⁷a thianghlim loh lai leh a thianghlim lai kawhhmuhna tûrin hei hi phâr chungchânga dân chu a ni,” tiin.