Read Mizo_Old_version Leviticus 15 Bible Online

Leviticus 15 - Mizo_Old_version bible

Leviticus 15

¹Tin, LALPA chuan Mosia leh Arona a bia a,

²“Israela thlahte chu bia ula, an hnênah, ‘Mipa tu pawh a tisaah thil a puh chuan a thil pût avâng chuan a bawlhhlawh a ni.

³A thil puh chhûng zawng chu a bawlhhlawh a ni: a tisaah chuan a pût reng emaw, a pût chu dan emaw pawh ni sela, a bawlhhlawh tho a ni.

⁴Thil pûta mutna khum tawh phawt chu a bawlhhlawh ang a, a ṭhutna tawh phawt chu a bawlhhlawh bawk ang.

⁵Tin, tu pawh a khum khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang.

⁶Thil pûta ṭhutnaa ṭhu apiangte chuan an puante an su ang a, an inbual tûr a ni a, tlai lam thlengin an bawlhhlawh ang.

⁷Tu pawh thil pûta tisa chu khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang.

⁸“ ‘Thil pûta chuan mi bawlhhlawh lo chil a chhâk chuan, a puante a su ang a, a inbual tûr a ni a, tlai lam thlengin a bawlhhlawh ang.

⁹Chuanna eng pawh thil pûta chuanna chu a bawlhhlawh ang.

¹⁰Tu pawh a innghahna hnu thil khawih apiangte chu tlai lam thlengin an bawlhhlawh ang. Chûng thil chawi sawntu apiangte chuan an puante an su ang a, an inbual tûr a ni; tlai lam thlengin an bawlhhlawh ang.

¹¹Tin, tu pawh, thil pûta chuan a kut tleuh lova a khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang.

¹²Thil pûta hlumbêl khawih hnu chu tihkeh tûr a ni; tin, thing bungbêl zawng zawng chu tleuh fai vek tûr a ni.

¹³Tin, thil pûta chu, a thil pût tihthianghlim a nih chuan a inthen nân ni sarih a intuk ang a, a puante a su ang a, lui tuiah a inbual ang a; tichuan, a lo thianghlim tawh ang.

¹⁴A ni riat ni chuan ṭhuro tuak khat emaw, pârvano tuak khat emaw kengin LALPA hmaah inbiakna puan in kawngka bulah a kal ang a, puithiam a pe tûr a ni.

¹⁵Puithiam chuan sual thawi nân pakhat, hâlral thilhlanah pakhat a hlân tûr a ni; chutiang chuan puithiam chuan a thil pût thu-ah LALPA hmaah inremna a siamsak ang.

¹⁶“ ‘Tu pawh inpâwlna chi amah aṭanga a chhuah chuan a pumin a inbual vek tûr a ni a, tlai lam thlengin a bawlhhlawh ang.

¹⁷Tin, silhfên te, savun te, inpâwlna chi awmna tawh phawt chu, sûk faia sil fai vek tûr a ni a, tlai lam thlengin a bawlhhlawh ang.

¹⁸Tin, hmeichhia a mutpui pawhin an pahnihin an inbual ve ve tûr a ni a; tin, tlai lam thlengin an bawlhhlawh ang.

¹⁹“ ‘Hmeichhiain thil pût a neiha, a taksa aṭanga thil pût chu thi a nih chuan, ni sarih chhûng chu a bawlhhlawh ang; tin, tu pawh amah khawih apiang chu tlai lam thlengin an bawlhhlawh ang.

²⁰A bawlhhlawh chhûnga a mutna tawh phawt chu a bawlhhlawh ang a, a ṭhutna tawh phawt pawh a bawlhhlawh bawk ang.

²¹Tu pawh a khum khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang.

²²Tu pawh a ṭhutna khawih apiangte chuan an puante an su ang a, an inbual tûr a ni a, tlai lam thlengin an bawlhhlawh ang.

²³Khuma thil awm emaw, a ṭhutnaa thil awm emaw khawih apiangte chu tlai lam thlengin an bawlhhlawh ang.

²⁴Tu pawhin an mutpuia, a bawlhhlawhna chu an kai chuan ni sarih an bawlhhlawh ang a; an mutna khum apiang chu a bawlhhlawh ang.

²⁵“ ‘Hmeichhia a bawlhhlawh hun pângngai ni lova ni rei fe a thi a puh emaw, a bawlhhlawh dân pângngai aia rei a thi a puh emaw chuan, a bawlhhlawhna dân pângngai chhûnga a awm ṭhin angin, thi pûta a bawlhhlawh chhûng zawng chuan a awm bawk tûr a ni; a bawlhhlawh a ni.

²⁶A thi puh chhûng zawnga a mutna khum tawh phawt chu, a bawlhhlawh dân pângngai hun laia a khum ang a ni ang a; a ṭhutna apiang chu a bawlhhlawh dân pângngai hun laia a bawlhhlawh angin a bawlhhlawh ang.

²⁷Tu pawh chûng thil khawih apiang chu an bawlhhlawh ang a, an puante an su ang a, an inbual tûr a ni a, tlai lam thlengin an bawlhhlawh ang.

²⁸Amaherawhchu, a thi pût chu tihthianghlim a nih chuan ni sarih a intuk ang a, chumi hnuah chuan a lo thianghlim tawh ang.

²⁹Tin, a ni riat niah ṭhuro tuak khat emaw, pârvano tuak khat emaw a keng ang a, inbiakna puan in kawngka bulah puithiam a pe tûr a ni.

³⁰Tin, puithiamin sual thawi nân pakhat, hâlral thilhlanah pakhat a hlân tûr a ni. Chutiang chuan puithiam chuan thi pûta a bawlhhlawhna thu-ah LALPA hmaah inremna a siamsak ang.

³¹“ ‘Hetiang hian Israela thlahte chu an bawlhhlawhna ata chu in tihrang tûr a ni, an zînga ka biakbûk an tihbawrhbân châng pawha an bawlhhlawhna avânga an thih loh nân.

³²“ ‘Hei hi thil pûtate leh bawlhhlawh phaha inpâwlna chi chhuakate tâna dân chu a ni;

³³an bawlhhlawhna avânga peihsam lo te, a hmei a pa, thil pûtho te, hmeichhia, an bawlhhlawh laia mutpuitute tân pawh,’ ” tiin.