Read Mizo_Old_version Leviticus 16 Bible Online

Leviticus 16 - Mizo_Old_version bible

Leviticus 16

¹Arona fapate pahnihin LALPA an va hnaiha an thih phah hnu chuan, LALPAN Mosia a bia a;

²LALPAN Mosia hnênah, “I unau Arona bia la, puanzâr chhûng hmun thianghlimah, bâwm chunga zahngaihna ṭhutphah hmaah chuan eng lai mahin lo lût hauh suh se, a thi dah ang e; zahngaihna ṭhutphah chungah, chhûmah ka rawn inlâr dâwn a ni.

³Hetiang hian Arona chu hmun thianghlimah a kal tûr a ni: sual thawi nân bâwngtuai, hâlral thilhlanah berâmpa nên.

⁴Puan zai sîn kawr thianghlim chu a ha ang a, a tisa khuh nân puan zai sîn kekawr chu a ha ang a, puan zai sîn kâwnghrênin a inhrêng ang a, puan zai sîn diar a khim tûr a ni. Hêng hi silhfên thianghlim a ni a; a inbual tê tê ang a, a inbel tûr a ni.

⁵Tin, Israela thlahte mipuiho ta kêlpa pahnih sual thawi nân leh, hâlral thilhlanah berâmpa pakhat a keng ang a.

⁶Arona chuan ama puala sual thawina bâwngpa chu a hlân ang a, amah leh a chhûngte tân inremna a siam ang.

⁷Kêl pahnih chu a kai ang a, inbiakna puan in kawngka bulah LALPA hmaah a dah ang a.

⁸Tin, Arona chuan kêl pahnih chungchângah chuan ṭhum a vâwr ang a: pakhat chu LALPA pual a ni ang a, pakhat chu Azazela pual a ni ang.

⁹Tin, Arona chuan LALPA puala tlu kêl chu a la ang a, sual thawi nân a hlân ang a.

¹⁰Azazela puala tlu kêl erawh chu inremna siamna tûra Azazela tân thlalêra chhuah tûrin, LALPA hmaah a nungin a dah ang.

¹¹“Arona chuan ama puala sual thawina bâwngpa chu a la ang a, amah leh a chhûngte tân inremna a siam ang a, ama puala sual thawina bâwngpa chu a talh ang.

¹²LALPA hmaa maichâm ata mei lâkna meilinga khat a la ang a, rimtui tui tak râwt dip dep ṭhûm khat nên puanzâr chhûng lamah a luhpui ang a;

¹³rimtui khu chuan thuhriattîrna chunga zahngaihna ṭhutphah chu a bawhna tûrin, LALPA hmaa meiah rimtui chu a phul ang, thihna a tawh loh nân.

¹⁴Bâwngpa thisen eng emaw zât chu a la ang a, a kutzungṭangin zahngaihna ṭhutphah chhak lampang chu a theh ang a, a kutzungṭangin zahngaihna ṭhutphah bul chu thisen chuan vawi sarih a theh tûr a ni.

¹⁵“Tin, mipui pual sual thawina kêl chu a talh ang a, a thisen chu puanzâr chhûng lamah a luhpui ang a, a thisen chu bâwngpa thisen a tih ang khân a ti ang a, zahngaihna ṭhutphah leh zahngaihna ṭhutphah bul chu a theh ang.

¹⁶Israela thlahte bawlhhlawhnate avâng leh an bawhchhiatnate, an sualna zawng zawngte avângin hmun thianghlim pualah inremna a siam ang a; chutiang bawk chuan an bawlhhlawhnate zînga awm, inbiakna puan in pualah pawh a siam bawk tûr a ni.

¹⁷Hmun thianghlima inremna siam tûra a luh lai chuan, amah leh a chhûngte leh Israel mipuiho puala inremna a siam zawha a lo chhuah leh hma loh chuan, tu mah rêng rêng inbiakna puan in chhûngah chuan an awm tûr a ni lo.

¹⁸LALPA hmaa maichâm lamah chuan a chhuak ang a, chumi pual chuan inremna a siam ang a, bâwngpa thisen leh kêl thisen eng emaw zât chu a la ang a, maichâm kîahte chuan a vêlin a tât ang.

¹⁹Tin, a kutzungṭangin vawi sarih a theh ang a, a thian ang a, Israela thlahte bawlhhlawhnate lak ata chu a tithianghlim ang.

²⁰“Tin, hmun thianghlim leh inbiakna puan in leh maichâm puala inremna a siam zawh chuan kêl nung chu a hlân ang a.

²¹Arona chuan kêl nung lu chungah chuan a kut khinghnih a nghat ang a, a chungah chuan Israela thlahte khawlohna zawng zawng te, an bawhchhiatna zawng zawng te, an sualna zawng zawngte chenin a chham ang a, chûngte chu kêl lu chungah chuan a nghat ang a, mi pakhat an ruat diama khân thlalêr lamah a hruai bo daih ang.

²²Tin, kêl chuan an khawlohna zawng zawng chu chên loh leiah a phur ang a, kêl chu thlalêrah chuan a chhuah tûr a ni.

²³“Tin, Arona chu inbiakna puan inah chuan a lût ang a, hmun thianghlim a luh laia puan zai sîn silhfên a inbel chu a hlîp ang a, chutah chuan a hnutchhiah ang.

²⁴Tin, hmun thianghlimah a inbual ang a, a silhfên a inbel ang a, a lo chhuak ang a, ama puala hâlral thilhlan leh mipui puala hâlral thilhlan chu a hlân ang a, amah leh mipui tân inremna a siam ang.

²⁵Tin, sual thawina thau chu maichâmah a hâl ang.

²⁶Tin, Azazela pual kêl chhuahtu apiang chuan an puan an su ang a, an inbual ang a, chumi zawhah chuan an awmhmun lamah an haw leh tûr a ni.

²⁷Sual thawina bâwngpa leh sual thawina kêl thisen inremna a siam nâna hmun thianghlima an luhpui chu, daipâwn lama kalpui tûr a ni ang a; a vun te, a sa te, a êk te chu an hâl tûr a ni.

²⁸A hâltu chuan a puan a su ang a, a inbual ang a, chumi zawhah chuan an awmhmun lamah a haw leh tûr a ni.

²⁹“Hei hi in kumkhaw dân tûr a ni ang a: thla sarihna, chumi thla ni sâwm ni chuan in rilrute in tihrehawm ang a, in rama mi rêng emaw, ram dang mi in zînga khawsa emawin hna eng mah an thawk tûr a ni lo:

³⁰hemi ni hian nangmahni tihthianghlim nân in tân inremna siam a ni dâwn a ni; tichuan, LALPA hmaah in sualna zawng zawng lak ata in thianghlim ang.

³¹In tân chawlh hle hle ni a ni a, in rilrute in tihrehawm ang a; kumkhaw dân tûr a ni.

³²Tin, puithiam, a pa aia puithiam ni tûra hriak thih tûr leh tihhran tûra chuan inremna a siam ang a; puan zai sîn silhfên, silhfên thianghlim chu a inbel ang a;

³³hmun thianghlim pualah inremna a siam ang a, inbiakna puan in leh maichâm pualah inremna a siam bawk ang a; tin, puithiamte leh mipuiho tân inremna a siam leh bawk ang.

³⁴An sualna zawng zawngte avânga kum tin vawi khat, Israela thlahte tân inremna siam hi in kumkhaw dân tûr a ni,” a ti a. Tichuan, LALPAN Mosia thu a pêk ang chuan a ti a.