Read Mizo_Old_version Leviticus 17 Bible Online

Leviticus 17 - Mizo_Old_version bible

Leviticus 17

¹Tin, LALPA chuan Mosia a bia a,

²“Arona leh a fapate leh Israela thlahte zawng zawng bia la, an hnênah, ‘Hei hi LALPA thupêk chu a ni:

³“Israel chhûngkaw zînga mi rêng rêng, bâwngpa emaw, berâmno emaw, kêl emawte riahhmun emaw, daipâwn emawa talha,

⁴LALPA biakbûk hmaa LALPA tâna thilhlana inbiakna puan in kawngka bula rawn la lo apiang, chu mi chu thisen chhuaha ngaih a ni ang; thisen chhuah ngei a ni a, chu mi chu a chipuite zîng ata tuithlârin a awm tûr a ni;

⁵chu chu Israela thlahten an inthawinate, tâmlaka an inthawinate chu an rawn lâka, LALPA tân ngeia inbiakna puan in kawngka bulah, puithiam hnênah an rawn lâka, LALPA tâna remna thilhlan inthawinaa an inthawi theih nân a ni.

⁶Tin, puithiamin inbiakna puan in kawngka bula maichâm chu thisen chuan a theh ang a, a thau chu LALPA tâna rimtui takah a hâl tûr a ni.

⁷An uire ṭhinna kêlpa hnênah chuan an inthawi tawh tûr a ni lo, tih hi. Hei hi an thlahte zêl chena an kumkhaw dân tûr a ni,” ’ tiin.

⁸“Tin, an hnênah, ‘Israel chhûngkaw zînga mi rêng rêng emaw, ram dang mi an zînga khawsaten emaw hâlral thilhlan emaw, inthawina emaw hlâna,

⁹LALPA hnêna inthawi tûra inbiakna puan in kawngka bula rawn la lo an awm chuan, chu mi chu a chipuite zîng ata tuithlârin a awm tûr a ni.

¹⁰“ ‘Tin, tu pawh Israel chhûngkaw zînga mi emaw, ram dang mi an zînga khawsa emaw, eng thisen pawh ei apiang chu, chu thisen eitu chungah chuan ka hmai ka thuar ang a, a chipuite zîng ata tuithlârin ka awmtîr ang.

¹¹Tisa nunna chu thisenah chuan a awm si a; in nunna atâna inremna siamna tûra maichâm chunga ka pêk che u a ni; nunna atâna inremna siamna chu thisen ngei chu a ni si a.’

¹²Chu vâng chuan Israela thlahte hnênah, ‘Tu mahin thisen in ei tûr a ni lo va, ram dang mi in zînga khawsate pawhin thisen an ei tûr a ni hek lo,’ ka ti a ni.

¹³“Tin, Israela thlahte zînga mi emaw, ram dang mi an zînga khawsain emaw ram vâka, sa emaw, sava emaw, ei theih chi a rawn hawn chuan a thisen chu a tichhuak ang a, vaivutin a vûr tûr a ni.

¹⁴Tisa zawng zawng nunna thu-ah chuan a thisen leh a nunna chu angkhat chiah a ni; chuvângin, Israela thlahte hnênah chuan, ‘Eng sa thisen mah in ei tûr a ni lo, tisa zawng zawng nunna chu a thisen chu a ni si a; tu pawh a ei apiang chu tuithlârin a awm tûr a ni.’

¹⁵Tin, amaha thi emaw, sa seh emaw ei apiang chu, chumi rama mi rêng emaw, ram dang mi emaw pawh ni sela, an puan an su ang a, an inbual tûr a ni a, tlai lam thlengin an bawlhhlawh ang a; chumi hnuah chuan an thianghlim tawh ang.

¹⁶An sûk lohva, an inbual loh phei chuan, an khawlohna mawh chu an phur ang, ka ti a, ti rawh,” tiin.