Read Mizo_Old_version Leviticus 18 Bible Online

Leviticus 18 - Mizo_Old_version bible

Leviticus 18

¹Tin, LALPA chuan Mosia a bia a,

²“Israela thlahte chu bia la, an hnênah, ‘Kei hi LALPA in Pathian chu ka ni.

³In awm tawhna Aigupta ram mite tih ang kha ti suh ula, ka hruai luhna tûr che u Kanaan ram mite tih ang pawh ti suh ang che u; an dân pawh zâwm bawk hek suh u.

⁴Ka rorêlte chu in pawm ang a, ka dânte chu zawhin in zâwm tûr a ni: kei hi LALPA in Pathian chu ka ni.

⁵Chuvângin, ka dân leh ka rorêlte chu in zâwm tûr a ni; chu chu miin a tih chuan a nun phah ang: kei hi LALPA chu ka ni.

⁶“ ‘Tu mân in chhûng bulte rêng rêng chu an saruakna hlîm tûrin in pan tûr a ni lo: kei hi LALPA chu ka ni.

⁷I pa saruakna emaw, i nu saruakna emaw chu i hlîm tûr a ni lo. I nu a ni a, a saruakna i hlîm tûr a ni lo.

⁸I pa nupui saruakna i hlîm tûr a ni lo; i pa saruakna a ni.

⁹I farnu, i pa fanu emaw, i nu fanu emaw, i pianpui emaw, i pianpui loh emawte saruakna pawh i hlîm tûr a ni lo.

¹⁰I fapaa fanu emaw, i fanua fanu emaw saruakna, an saruakna chu i hlîm tûr a ni lo. An saruakna chu nangma saruakna a ni si a.

¹¹I pa nupuia fanu, i pa hrin saruakna chu - i farnu a ni a - a saruakna i hlîm tûr a ni lo.

¹²I pa farnu saruakna chu i hlîm tûr a ni lo; i pa chhûng bul a ni.

¹³I nu laizâwn saruakna chu i hlîm tûr a ni lo; i nu chhûng bul a ni si a.

¹⁴I pa unau saruakna chu i hlîm tûr a ni lo va. A nupui chu i pan tûr a ni lo, i nu a ni.

¹⁵I monu saruakna chu i hlîm tûr a ni lo, i fapaa nupui a ni a, a saruakna i hlîm tûr a ni lo.

¹⁶I unaupa nupui saruakna chu i hlîm tûr a ni lo, i unaupa saruakna a ni.

¹⁷Nufa faa saruakna chu i hlîm tûr a ni lo. A saruakna hlîm tûrin a fapaa fanu emaw, a fanua fanu emaw i nei tûr a ni lo; i chhûng bulte an ni a. Suahsualna nasa tak a ni.

¹⁸I nupuia laizâwn chu a saruakna hlîm tûrin i nupui la dam chhûng chuan i nei kawp tûr a ni lo.

¹⁹“ ‘Tin, hmeichhia a bawlhhlawh dân pangngaia a bawlhhlawh chhûng chuan, a saruakna hlîm tûrin i pan tûr a ni lo.

²⁰A laka intibawlhhlawh tûrin i vêng pa nupui i mutpui tûr a ni lo.

²¹Moleka puala meia tihluh tûrin i rîla rahte rêng rêng i pe tûr a ni lo va, i Pathian hming i tichhe tûr a ni hek lo. Kei hi LALPA chu ka ni.

²²Hmeichhia angin mipa i pâwl tûr a ni lo; thil tenawm a ni.

²³Intihbawlhhlawhna tûrin ran rêng rêng i pâwl tûr a ni lo va, hmeichhia rêng rêng inpâwltîr tûrin ran hmaah a ding tûr a ni hek lo; suahsualna chungchuang a ni.

²⁴“ ‘Hêng thil, a enga mahah hian intibawlhhlawh suh u; hêng thil zawng zawngah hian in hmaa ka hnawh chhuah tâk hnamte chu an lo bawlhhlawh tawh a;

²⁵ram pawh chu a bawlhhlawh tawh a ni; chuvângin, chuta a khawlohna chu ka hrem a, ram chuan a chhûnga awmte chu a luak chhuak ta vek a.

²⁶Chuvângin, nangni chuan ka dân te, ka rorêlte in zâwm tûr a ni a, hêng thil tenawm hi a enga mah in ti tûr a ni lo, in rama mi rêng emaw, ram dang mi in zînga khawsate pawhin

²⁷(hêng thil tenawm zawng zawng hi in hmaa he rama awmte khân an lo ti tawh a, ram pawh chu a bawlhhlawh tawh a ni);

²⁸in hmaa awm hnam a law chhuak ang bawka in tihbawlhhlawha ram chuan a luak chhuah ve lohna tûr che uin.

²⁹Tu pawh hêng thil tenawm hi a enga pawh titu apiang chu an chipuite zîng ata tuithlârin an awm ang.

³⁰Chuvângin, hêng thil tenawm in hmaa an chîn ang hi in chîn ve loh nân leh, chûngah chuan in intihbawlhhlawh loh nân ka thupêk hi in zâwm tûr a ni: kei hi LALPA in Pathian chu ka ni,’ ti rawh,” tiin.