Read Mizo_Old_version Leviticus 19 Bible Online

Leviticus 19 - Mizo_Old_version bible

Leviticus 19

¹Tin, LALPA chuan Mosia a bia a,

²“Israela thlah, mipuiho zawng zawng chu bia la, an hnênah, ‘In thianghlim tûr a ni; kei, LALPA in Pathian hi ka thianghlim si a.

³Mi tinin in nu leh in pa in ṭih tûr a ni a; tin, ka Chawlhnite in serh tûr a ni: kei hi LALPA in Pathian chu ka ni.

⁴Milem lamah thle suh ula, milem chhûn pathiante insiam hek suh u: kei hi LALPA in Pathian chu ka ni.

⁵Tin, LALPA tâna remna thilhlana in inthawi hunin pawm tlâk ni tûrin in hlân tûr a ni.

⁶In hlan ni tak leh a tûka ei tûr a ni a; ni thum ni thlenga awm a awm chuan hâl tûr a ni.

⁷Ni thum nia ei a nih vaih chuan thil tenawm a ni a, pawmsak a ni lo vang.

⁸A ei apiang chuan, LALPA thil thianghlim a tihbawrhbân avângin, a khawlohna mawh a phur ang a; chu mi chu a chipuite zîng ata tuithlârin a awm zâwk ang.

⁹“ ‘Tin, in lova buh in seng hunin in vau fêmte thlengin in seng vek tûr a ni lo va, a ṭo pawh in zawng tûr a ni lo.

¹⁰Tin, in grêp huana a ṭo in zawng tûr a ni lo va, in grêp huana a rah tla pawh in chhar khâwm tûr a ni lo va, mi rethei leh ram dang mi in zuahsak tûr a ni: kei hi LALPA in Pathian chu ka ni.

¹¹Rûk in ru tûr a ni lo va, a derin thil in ti tûr a ni lo va, dâwt in inhrilh tûr a ni hek lo.

¹²Pathian hming tihliauvin ka hming chhâlin dâwtin chhia in chham tûr a ni lo: kei hi LALPA chu ka ni.

¹³I ṭhenawmte i bum tûr a ni lo va, i ruksak tûr a ni hek lo. Inhlawhfa hlawh chu zankhua khuain, a tûk thlengin i kawl tûr a ni hek lo.

¹⁴Bengngawng chu ânchhia i lawh tûr a ni lo va, mitdel hmaah tlûkna i dah tûr a ni hek lo; amaherawhchu, i Pathian chu i ṭih tûr a ni: kei hi LALPA chu ka ni.

¹⁵Rorêlnaah chuan fel lo takin in rêl tûr a ni lo; mi rethei i thlei tûr a ni lo va, mi thiltithei i zah chuang tûr a ni lo; fel takin i ṭhenawm ro i rêlsak tûr a ni.

¹⁶I chipuite zîngah mite rêlin i vâk vêl ruai tûr a ni lo va, i ṭhenawm thisen thu-ah a ni lo zâwngin i ṭang tûr a ni hek lo: kei hi LALPA chu ka ni.

¹⁷“ ‘I rilruin i unau i haw tûr a ni lo. I ṭhenawm chu i zilhhau ngei tûr a ni, a sualnaa i hul nân.

¹⁸Phuba i la tûr a ni lo va, i chipui thlahte huatna i pai tûr a ni hek lo; nangmah i inhmangaih angin i ṭhenawm i hmangaih tûr a ni zâwk. Kei hi LALPA chu ka ni.

¹⁹Ka thupêkte chu in pawm tûr a ni. I ran chu chi hrang hrang thlahtîr suh. I lovah thlai chi hnih chîng suh la, thil chi hrang pahnih tah pawlh puan i sin tûr a ni hek lo.

²⁰“ ‘Tu pawh bawihnu, pasal hualtu nei, la tlan loh, la chhuahtîr loh hmeichhia nêna mu dûn apiangte chu hrem an ni ang; tihhlum tûr zawng an ni lo vang, ani chu la chhuah loh a nih avângin.

²¹Inbiakna puan in kawngka bulah LALPA hnêna a bawhchhiat thawina, bawhchhiat thawina berâmpa chu a rawn kai tûr a ni.

²²Tin, a thil tihsual tâk, a sualnaah LALPA hmaah bawhchhiat thawina berâmpa chuan puithiamin inremna a siamsak ang; tichuan, a thil tihsual tâk, a sualnaah chuan ngaihdam a ni ang.

²³“ ‘Tin, ram chu in va luaha, ei atân thei kûng chi tinrêng in phun hun chuan a rah chu thiang lovah in ngai tûr a ni. In tân kum thum thiang lova ngaih tûr a ni a; ei hauh loh tûr a ni.

²⁴Amaherawhchu, a kum li kum chuan a rah zawng zawng chu LALPA fak nân a puala tihhran tûr a ni.

²⁵Tin, a kum nga kum chuan in tân a pun zêl theih nân a rah chu in ei tûr a ni: kei hi LALPA in Pathian chu ka ni.

²⁶A thisen chawpin eng mah in ei tûr a ni lo va, dawi te in hmangin aien te in chîng tûr a ni hek lo.

²⁷I bekbawr aṭangin a vêlin i lû i mêt tûr a ni lo va, i khabe hmul sîr tuak i tan tûr a ni hek lo.

²⁸Mitthi avângin in taksa in zai tûr a ni lo va, in inṭial tûr a ni hek lo: kei hi LALPA chu ka ni.

²⁹“ ‘Nawhchizuara siam tûrin i fanu tibawrhbâng suh; ram chu uirena ramah a lo chang ang a, suahsualnain a lo khat dah ang e.

³⁰Ka Chawlhnite chu in serh tûr a ni a, ka hmun thianghlim chu in zah tûr a ni: kei hi LALPA chu ka ni.

³¹Ramhuai aienthiam zâwlte chu pan suh ula, dawithiamte pawh in bawlhhlawh phahna tûrin zawng chhuak suh u: kei hi LALPA in Pathian chu ka ni.

³²Lûa kêlsam ṭote hmaah chuan i ding zêl ṭhîn tûr a ni a, tar hmêl chu i zah tûr a ni a, i Pathian chu i ṭih tûr a ni; kei hi LALPA chu ka ni.

³³Tin, ram dang mi, in rama khawsa ve an awm chuan in tichhe tûr a ni lo.

³⁴Ram dang mi in zînga khawsate chu in tân in rama mi rêng ang an ni tûr a ni a, nangmah i inhmangaih angin i hmangaih tûr a ni; nangni pawh Aigupta ramah khân ram dang mi in nih kha: kei hi LALPA in Pathian ka nih hi.

³⁵Rorêl thu-ah te, tehna hmawlhah te, khînah te, tehnaah te fel lo takin in ti tûr a ni lo.

³⁶Bûkna dik tak, khîn dik tak, epha dik tak, hin dik tak in nei tûr a ni: kei hi LALPA in Pathian, Aigupta ram ata hruai chhuaktu che u kha ka ni.

³⁷Tin, ka thupêk zawng zawngte leh ka rorêl zawng zawngte chu in pawm ang a, in zâwm tûr a ni: kei hi LALPA chu ka ni,’ ti rawh,” tiin.