Read Mizo_Old_version Leviticus 2 Bible Online

Leviticus 2 - Mizo_Old_version bible

Leviticus 2

¹“ ‘Tu pawhin thilhlan, chhangphut thilhlan LALPA hnêna a hlan hunin, a thilhlan chu chhangput dip tak a ni tûr a ni. Hriak a leih ang a, a chungah beraw a dah bawk ang a;

²tin, Arona fapa puithiamte hnênah a kalpui ang a, anin a vei khatin chuta chhangphut dip tak chu, a hriak nên a beraw zawng zawng nên chuan a la chhuak ang a; tin, puithiam chuan maichâm chungah chuan hriat rengna, LALPA tâna rimtui tak, meia thilhlan atân a hâl ang.

³Chhangphut thilhlan lâk bângte chu Arona leh a fapate ta tûr a ni ang. Chu chu LALPA tâna meia thilhlantea thil thianghlim tak pakhat a ni.

⁴“ ‘Tin, chhangphut thilhlan, a urnaa ur thilhlan i hlan chuan chhangphut dip tak, hriaka hmeh dawidim telh loh chhang emaw, hriaka chulh dawidim telh loh chhangpêr pan emaw a ni tûr a ni.

⁵Tin, i thilhlan chu thlênga ur chhangphut thilhlan a nih chuan dawidim telh loh, hriaka hmeh, chhangphut dip tak a ni tûr a ni.

⁶I phel ang a, hriakin i leih tûr a ni; chu chu chhangphut thilhlan a ni e.

⁷Tin, i thilhlan chu kanbêla kan, chhangphut thihlan a nih chuan chhangput dip tak leh hriaka siam a ni tûr a ni.

⁸Tin, chûng thila siam chhangphut thilhlan chu LALPA hnênah i rawn la ang a; chu chu puithiam hnêna hlan a ni ang a, anin maichâmah a rawn kalpui tûr a ni.

⁹Tin, puithiamin chhangphut thilhlan ata hriat rengna chu a la chhuak ang a, maichâmah chuan a hâl ang; chu chu LALPA tâna rimtui tak, meia thilhlan a ni.

¹⁰Tin, chhangphut thilhlan lâk bângte chu Arona leh a fapate pual tûr a ni ang; chu chu LALPA tâna meia thilhlantea thil thianghlim ber a ni.

¹¹Chhangphut thilhlan rêng rêng, LALPA hnêna in hlan tûr chu dawidim tela siam tûr a ni lo; LALPA tâna meia thilhlanah chuan dawidim emaw, khawizu emaw rêng rêng in hâl tûr a ni lo.

¹²Siam hmasak ber thilhlan ang zawngin LALPA hnênah in hlân ang a; nimahsela, rimtui atâna maichâmah chuan dah tûr a ni lo.

¹³I chhangphut thilhlan zawng zawng chu Pathian thuthlung entîrna chi i al tûr a ni; i thilhlan zawng zawng chu chi i al zêl tûr a ni; i thilhlan zawng zawngah chuan chi i hlân tel tûr a ni.

¹⁴“ ‘Rah hmasa ber chhangphut thilhlan LALPA hnêna i hlan chuan buh thar hmasa bera mi, chhangphut thilhlan atân chhangpêr i hlân tûr a ni.

¹⁵Tin, hriak i leih ang a, a chungah beraw i dah tûr a ni; chu chu chhangphut thilhlan a ni.

¹⁶Tin, puithiamin chhangpêr leh hriak ṭhen chu hriat reng nân beraw zawng zawng nên chuan a hâl tûr a ni; chu chu LALPA tâna meia thilhlan a ni.